ഇക്കഴിഞ്ഞ ദിവസമായിരുന്നു നടന്‍ കൃഷ്ണകുമാറിന്റെ മകള്‍ ദിയ കൃഷ്ണ ഒരു ആണ്‍കുഞ്ഞിന് ജന്മം നല്‍കിയത്. ദിയകൃഷ്ണയുടെ പ്രസവത്തിന്റെ വിഡിയോ യൂട്യൂബില്‍ ട്രെന്‍ഡിങ്ങാണ്. ഇപ്പോഴിതാ മകള്‍ ദിയ കൃഷ്ണയുടെ പ്രസവവുമായി ബന്ധപ്പെട്ട അനുഭവങ്ങള്‍ പങ്കുവച്ച് രംഗത്തെത്തിയിരിക്കുകയാണ് സിന്ധു കൃഷ്ണ.
കുഞ്ഞ് വന്നശേഷമുള്ള വിശേഷങ്ങളും ആശുപത്രിയിലെ സൗകര്യങ്ങളെക്കുറിച്ചുമൊക്കെയാണ് യുട്യൂബില്‍ പങ്കുവച്ച പുതിയ ബ്ലോഗില്‍ സിന്ധു പറയുന്നത്. അമ്മൂമ്മ ആയെന്ന് വിശ്വസിക്കാന്‍ തനിക്കോ, അമ്മ ആയെന്ന് വിശ്വസിക്കാന്‍ ദിയയ്‌ക്കോ കഴിഞ്ഞിട്ടില്ലെന്നാണ് സിന്ധു പറയുന്നത്. താന്‍ പ്രസവിച്ചപ്പോഴത്തെ അവസ്ഥ അല്ല ഇപ്പോള്‍ ഉള്ളതെന്നും ഒരുപാട് മാറ്റം ഉണ്ടായെന്നും സിന്ധു പറയുന്നു. അന്നൊക്കെ തന്റെ ഒപ്പം എല്ലാവരും ഉണ്ടാകണമെന്ന് താന്‍ ആഗ്രഹിച്ചിട്ടുണ്ടെന്നും സിന്ധു വീഡിയോയില്‍ പറയുന്നു.
പ്രസവം നടക്കുന്നിടത്ത് കുടുംബം മുഴുവന്‍ നില്‍ക്കുന്നത് എങ്ങനെയെന്ന് പലരും ചോദിച്ചിരുന്നു. ഓസിയുടെ പ്രസവം നടന്നത് ലേബര്‍ സ്യൂട്ട് റൂമിലാണ്. ഈ ആശുപത്രിയില്‍ ഇതുപോലെ രണ്ട് റൂം ഉണ്ട്. അത് പ്രസവം നടക്കുന്ന ഓപ്പറേഷന്‍ തീയേറ്ററിന്റെ ഫ്‌ലോറില്‍ തന്നെയാണ്. പ്രസവം നടക്കുമ്പോള്‍ കുടുംബവും ഒപ്പം വേണമെന്ന് ആവശ്യപ്പെടുന്നവര്‍ക്ക് ഈ റൂമെടുക്കാന്‍ പറ്റും. അഹാനയുടെ സുഹൃത്താണ് ഈ റൂമിനെക്കുറിച്ച് ഞങ്ങളോട് പറഞ്ഞത്.
അഹാനയുടെ സുഹൃത്ത് സേറ മകനെ പ്രസവിച്ചത് ഇവിടെയാണ്. പണ്ട് ഞാന്‍ ഡെലിവറിക്ക് പോകുമ്പോള്‍ കിച്ചുവിന്റെ അച്ഛന്റെ സഹോദരി ഒരു ഡോക്ടര്‍ ഉണ്ടായിരുന്നു. അതുകൊണ്ട് എന്റെ അമ്മയെയും കിച്ചുവിനെയും ഇടയ്‌ക്കൊന്ന് കാണിക്കുമായിരുന്നു. പിന്നെ പ്രസവം കഴിഞ്ഞയുടന്‍ അവരെ അകത്തേക്ക് വന്ന് കാണാനും സമ്മതിച്ചു. അല്ലാതെ പ്രസവത്തിന് എന്റെ കൂടെ ആരും ഇല്ലായിരുന്നു. നാല് കുട്ടികളെ പ്രസവിച്ചിട്ടുണ്ടെങ്കിലും അവിടെ നടക്കുന്ന കലാപരിപാടികള്‍ എനിക്ക് അറിവില്ലായിരുന്നു.
ഡെലിവറി വീഡിയോസ് യൂട്യൂബില്‍ ഉണ്ടെങ്കിലും ഞാന്‍ അങ്ങനെ കാണാന്‍ ശ്രമിച്ചിട്ടില്ല. പക്ഷേ, ഇതെനിക്ക് ലൈവായി കാണാന്‍ സാധിച്ചു. അതൊരു മാജിക്കല്‍ അനുഭവം ആയിരുന്നു. വേദന വരാതിരിക്കാന്‍ ഇഞ്ചക്ഷന്‍ എടുത്തുകൊണ്ട് ദിയ ഭയങ്കരമായി കഷ്ടപ്പെട്ടില്ല. മണിക്കൂറുകള്‍ കുറേ എടുത്തെങ്കിലും പ്രസവം വളരെ സുഗമമായിരുന്നു. ആശുപത്രിയിലെ എല്ലാവരോടും ഒരുപാട് നന്ദിയുണ്ടെന്നും സിന്ധു പറഞ്ഞു.
ഇതിനുള്ളില്‍ കയറിയാല്‍ ഒരു ഫൈവ് സ്റ്റാര്‍ ഹോട്ടലിനുള്ളില്‍ കയറിയ പ്രതീതിയാണെന്നും സിന്ധു കൂട്ടിച്ചേര്‍ത്തു. നമുക്ക് താങ്ങാന്‍ പറ്റാത്ത റേറ്റ് അല്ല ഇവിടെ. ലേബര്‍ സ്യൂട്ട് റൂമിന് ഒരു ദിവസം 12,000 രൂപ മാത്രമാണ്. സാധാരണ പ്രസവം നടക്കുന്ന ആശുപത്രിയിലെ മുഴുവന്‍ ചെലവില്‍ നിന്ന് ഒരു മുപ്പത് മുതല്‍ നാല്‍പ്പതിനായിരം രൂപയുടെ വ്യത്യാസമേ ഉള്ളു. പ്രസവിക്കാന്‍ കിടക്കുന്ന കുട്ടികള്‍ക്ക് കിട്ടുന്ന സമാധാനം വളരെ വലുതാണ്. വളരെ സ്‌നേഹത്തോടെയും കരുതലോടെയുമാണ് ദിയയെ ഡോക്ടറും നഴ്സുമാരുമെല്ലാം പരിചരിച്ചതെന്നും സിന്ധു പറഞ്ഞു.
