ദക്ഷിണേന്ത്യന്‍ സിനിമകളില്‍ ശ്രദ്ധ പതിപ്പിക്കുന്നതിനായി ബോളിവുഡ് വിട്ട് പ്രമുഖ താരം അനുരാഗ് കശ്യപ്. ബോക്‌സ് ഓഫീസ് കളക്ഷനുകള്‍ക്ക് പിറകെ മാത്രം ഓടുന്ന ഹിന്ദി സിനിമ വ്യവസായത്തിന്റെ വിഷകരമായ സംസ്‌കാരമാണ് തന്റെ തീരുമാനത്തിന് കാരണമെന്ന് അദ്ദേഹം പറയുന്നു.
ബോളിവുഡിലെ സിനിമാക്കാരില്‍ നിന്ന് അകന്നുനില്‍ക്കാന്‍ ആഗ്രഹിക്കുന്നുവെന്നും, 500, 800 കോടി രൂപ നിര്‍മ്മാണ ചിലവുള്ള സിനിമകള്‍ നിര്‍മ്മിക്കാനാണ് ഹിന്ദി ഭാഷയില്‍ ശ്രമിക്കുന്നതെന്നും അദ്ദേഹം ഹിന്ദു ദിനപത്രത്തിന് നല്‍കിയ അഭിമുഖത്തില്‍ കുറ്റപ്പെടുത്തി.
ദക്ഷിണേന്ത്യന്‍ സിനിമകളില്‍ ശ്രദ്ധ കേന്ദ്രീകരിക്കുന്നതിനായി അദ്ദേഹം ബംഗളൂരുവിലേക്ക് താമസം മാറ്റിയതായും റിപ്പോര്‍ട്ടുകളുണ്ട്. കഴിഞ്ഞവര്‍ഷം ഹോളിവുഡ് റിപ്പോര്‍ട്ടര്‍ക്ക് നല്‍കിയ അഭിമുഖത്തിനും ബോളിവുഡിനെതിരായിട്ടുള്ള തന്റെ നിലപാട് അദ്ദേഹം തുറന്നു പറഞ്ഞിരുന്നു. ബോളിവുഡില്‍ സിനിമ എങ്ങനെ വില്‍ക്കും എന്നതില്‍ മാത്രമാണ് ശ്രദ്ധ കേന്ദ്രീകരിച്ചിരിക്കുന്നത്, അവിടെ ലാഭത്തില്‍ മാത്രമാണ് സിനിമ നിര്‍മ്മാണത്തിന്റെ തുടക്കം മുതല്‍ അവസാനം വരെ ചര്‍ച്ച ചെയ്യുന്നത് എന്നുമായിരുന്നു അദ്ദേഹം കഴിഞ്ഞ വര്‍ഷം നല്‍കിയ അഭിമുഖത്തില്‍ പറഞ്ഞിരുന്നത്.
അദ്ദേഹം ദക്ഷിണേന്ത്യന്‍ സിനിമകളിലേക്ക് ശ്രദ്ധ പതിപ്പിക്കുമ്പോള്‍ തന്നെയാണ്, 2024 അദ്ദേഹം നിര്‍മ്മിച്ച മഞ്ജു വാര്യര്‍ നായികയായി എത്തിയ മലയാള സിനിമ ഫൂട്ടേജ് ഹിന്ദിയിലേക്ക് മൊഴി മാറ്റി റിലീസ് ചെയ്യുന്നത്. മാര്‍ച്ച് ഏഴിന് ചിത്രം റിലീസ് ചെയ്യും. മഹേഷിന്റെ പ്രതികാരം, കുമ്പളങ്ങി നൈറ്റ്‌സ് തുടങ്ങിയ ചിത്രങ്ങളിലൂടെ ശ്രദ്ധേയനായ എഡിറ്റര്‍ സൈജു ശ്രീധരന്‍ ആദ്യമായി സംവിധാനം ചെയ്ത സിനിമയാണ് ഫൂട്ടേജ്.
