ഏഷ്യാ കപ്പിനുള്ള 15 അംഗ ഇന്ത്യൻ ടീമിനെ പ്രഖ്യാപിച്ചു. മലയാളി താരം സഞ്ജു സാംസൺ ടീമിൽ സ്ഥാനം നിലനിർത്തി. സൂര്യകുമാർ യാദവ് നയിക്കുന്ന ടീമിൽ ടെസ്റ്റ് ടീം നായകൻ ശുഭ്മാൻ ഗിൽ വൈസ് ക്യാപ്റ്റനായി ടീമിലെത്തി. അതേസമയം ജസ്പ്രീത് ബുമ്രയും തിരിച്ചെത്തിയപ്പോൾ ശ്രേയസ് അയ്യരെ ടീമിലേക്ക് പരിഗണിച്ചില്ല.
ചീഫ് സെലക്ടർ അജിത് അഗാർക്കറും ടി20 ടീം നായകൻ സൂര്യകുമാർ യാദവും മുംബൈ ബിസിസിഐ ആസ്ഥാനത്ത് നടത്തിയ വാർത്താ സമ്മേളനത്തിലാണ് ഏഷ്യാ കപ്പിനുള്ള ടീമിനെ പ്രഖ്യാപിച്ചത്. സഞ്ജു സാംസൺ ടീമിലുണ്ടെങ്കിലും വിക്കറ്റ് കീപ്പറായി ജിതേഷ് ശർമയുടെ പേരാണ് ചീഫ് സെലക്ടർ അജിത് അഗാർക്കർ പ്രഖ്യാപിച്ചത്.
സ്പിന്നർമാരായി കുൽദീപ് യാദവ്, വരുൺ ചക്രവർത്തി എന്നിവർ ടീമിലെത്തിയപ്പോൾ ഇംഗ്ലണ്ടിൽ തിളങ്ങിയ വാഷിംഗ്ടൺ സുന്ദറെ പരിഗണിച്ചില്ല. അർഷ്ദീപ് സിംഗിനും ബുമ്രക്കുമൊപ്പം മൂന്നാം പേസറായി ഹർഷിത് റാണ ടീമിലെത്തിയപ്പോൾ പ്രസിദ്ധ് കൃഷ്ണ പുറത്തായി. പേസ് ഓൾ റൗണ്ടറായി ഹാർദ്ദിക് പാണ്ഡ്യയും ശിവം ദുബെയും സ്പിൻ ഓൾ റൗണ്ടറായി അക്സർ പട്ടേലും ടീമിലുണ്ട്.
