ചപ്പാത്തി മുന്കൂട്ടി തയാറാക്കി വയ്ക്കുന്നത് എങ്ങനെയെന്നു പഠിക്കാം...
ഘട്ടം 1: മാവ് തയാറാക്കുക
ആദ്യം തന്നെ ആട്ടയില് ഉപ്പു ചേര്ത്ത് ചൂടുവെള്ളത്തില് നന്നായി കുഴച്ചെടുക്കുക. സ്വാദും മൃദുത്വവും കൂട്ടാന് ഒരു ടീസ്പൂൺ എണ്ണയും ചേർക്കാം. ഇത് കുറച്ചു നേരം മുകളില് ഒരു തുണി കൊണ്ടു മൂടി അടച്ചുവയ്ക്കാം.
ഘട്ടം 2: പരത്തിയെടുക്കുക
കുറച്ചു നേരം കഴിഞ്ഞാല്, മൂടി വെച്ച മാവ് എടുത്ത് ഉരുളകളാക്കുക. ഇത് ചപ്പാത്തിപ്പലകയ്ക്ക് മേല് വച്ച് പൊടിയിട്ട് ഓരോന്നായി പരത്തി എടുക്കുക.
ഘട്ടം 3: ചപ്പാത്തി ഉണ്ടാക്കുക
അടുത്ത ഘട്ടം ചപ്പാത്തി ഉണ്ടാക്കിയെടുക്കല് ആണ്. എണ്ണയോ നെയ്യോ പുരട്ടി രണ്ടു വശവും നന്നായി വേവിച്ചെടുക്കുക.
ഘട്ടം 4: ഉണ്ടാക്കിവെച്ച ചപ്പാത്തി, വായു കടക്കാത്ത പാത്രത്തിലോ സിപ് ലോക്ക് ബാഗിലോ ആക്കി ഫ്രിജില് വയ്ക്കുക. ആദ്യമേ വെയിലത്ത് വെച്ച് ഉണക്കിയ ശേഷം സൂക്ഷിക്കുകയാണെങ്കില് ചപ്പാത്തികള് തമ്മില് പരസ്പരം ഒട്ടിപ്പിടിക്കുന്നത് തടയാം. ഓരോ ചപ്പാത്തിക്കുമിടയിൽ കടലാസ് പേപ്പറോ വൃത്തിയുള്ള തുണിയോ വയ്ക്കുന്നതും നല്ലതാണ്. ഈ ചപ്പാത്തി 3-4 ദിവസം വരെ റഫ്രിജറേറ്ററിൽ കേടാകാതെ സൂക്ഷിക്കാം.
ഘട്ടം 5: വീണ്ടും ചൂടാക്കാന്
ആവശ്യമുള്ളപ്പോള് ഈ ചപ്പാത്തി പത്തു മിനിറ്റ് നേരം പുറത്ത് എടുത്തു വയ്ക്കുക. ശേഷം തവയിലോ മൈക്രോവേവിലോ വച്ച് ചൂടാക്കിയെടുക്കുക. വീണ്ടും ചൂടാക്കുമ്പോൾ അല്പം എണ്ണയോ നെയ്യോ ഉപയോഗിച്ച് ബ്രഷ് ചെയ്യാം.