വിക്കി കൗശലിൻറെ ഛാവ ഇപ്പോൾ ഒടിടിയിൽ റിലീസ് ചെയ്തിരിക്കുകയാണ്. 130 കോടി മുടക്കിയെടുത്ത ചിത്രം തീയറ്ററിൽ നിന്നും അമ്പരിപ്പിക്കുന്ന കളക്ഷനാണ് നേടിയത്. 804 കോടിക്ക് അടുത്ത് ആഗോള ഗ്രോസ് ഈ ചരിത്ര സിനിമ നേടിയിട്ടുണ്ടെന്നാണ് വിവരം. ഏപ്രിൽ 11നാണ് ചിത്രം ഒടിടിയിൽ എത്തിയത്. നെറ്റ്ഫ്ലിക്സിലാണ് ഛാവ റിലീസ് ചെയ്ത് രണ്ട് മാസത്തോട് അടുക്കുമ്പോൾ ഒടിടി റിലീസായി എത്തിയത്. നേരത്തെ ചിത്രത്തിൻറെ റിലീസ് സംബന്ധിച്ച് വലിയ പ്രഖ്യാപനങ്ങൾ ഒന്നും നടത്താതിരുന്ന നെറ്റ്ഫ്ലിക്സ് കഴിഞ്ഞ ദിവസമാണ് ഛാവയുടെ ഒടിടി റിലീസ് ഔദ്യോഗികമായി അറിയിച്ചത്.
ഛാവയിൽ മറാത്ത രാജാവായിരുന്ന ഛത്രപതി സംഭാജി മഹാരാജിൻറെ വേഷമാണ് വിക്കി കൗശൽ അവതരിപ്പിച്ചത്. ചിത്രത്തിൽ മഹാറാണി യേശുഭായിയുടെ വേഷത്തിൽ രശ്മിക മന്ദന്ന അഭിനയിച്ചപ്പോൾ മുഗൾ ചക്രവർത്തിയായ ഔറംഗസേബിനെ അക്ഷയ് ഖന്ന അവതരിപ്പിച്ചു. അശുതോഷ് റാണ, ദിവ്യ ദത്ത, ഡയാന പെൻറി എന്നിവർ പ്രധാന വേഷങ്ങളിൽ അഭിനയിച്ചിരുന്നു.
ലക്ഷ്മൺ ഉഡേക്കർ സംവിധാനം ചെയ്യുന്ന ഛാവ മാഡോക്ക് ഫിലിംസിന്റെ ബാനറിൽ ദിനേശ് വിജനാണ് നിർമ്മിച്ചത്. 2025 ഫെബ്രുവരി 14 ന് ചിത്രം തിയേറ്ററുകളിൽ റിലീസ് ചെയ്തത്.
