നമ്മുടെ പ്രധാന പ്രഭാത ഭക്ഷണത്തിൽ ഒന്നാണ് ഇഡ്ഡലി. സാമ്പാർ അല്ലെങ്കിൽ തേങ്ങാ ചട്ണിക്കൊപ്പം കഴിക്കാൻ ഇത് രുചികരമാണ്. രുചിയിൽ മാത്രമല്ല, ആരോഗ്യക്കാര്യത്തിലും ഇഡ്‌ലി ബഹുകേമൻ തന്നെയാണ് കെട്ടോ. ദോശയേക്കാൾ മികച്ചത് എന്ന് തന്നെ പറയാം.
വയറിന് മികച്ച ഭക്ഷണം
നമ്മുടെ വയറിന്റെ ആരോഗ്യത്തിന് ഏറ്റവും മികച്ച ഭക്ഷണമാണ് ഇഡ്‌ലിയെന്നാണ് ഡയറ്റീഷന്മാരുടെ അഭിപ്രായം. ഇഡ്‌ലി രാവിലെ ബ്രേക്ക്ഫാസ്റ്റിനും അല്ലെങ്കിൽ വൈകിട്ട് അത്താഴമായും കഴിക്കാം.
അരിയും ഉഴുന്നും അരച്ച് പുളിപ്പിച്ചാണ് ഇഡ്‌ലി മാവ് തയ്യാറാക്കുന്നത്. ഇത് കുടലിലെ നല്ല ബാക്ടീരിയകളെ പ്രോത്സാഹിപ്പിക്കുകയും പോഷകങ്ങളെ എളുപ്പത്തിൽ ആഗിരണം ചെയ്യാൻ സഹായിക്കുകയും ചെയ്യുന്നു. പുളിപ്പിച്ച ഭക്ഷണം ദഹനവും ശരീരവീക്കവും കുറയ്ക്കാനും സഹായിക്കുമെന്ന് പഠനങ്ങൾ തെളിയിച്ചിട്ടുള്ളതാണ്.
ഇഡ്‌ലിയുടെ ഗുണങ്ങൾ
കൊഴുപ്പ് കുറവാണെന്നതാണ് ഇഡ്‌ലിയുടെ ഒരു സവിശേഷത. മറ്റൊന്ന് ഇത് ഗ്ലൂട്ടൻ രഹിതമാണ്. അതുകൊണ്ട് തന്നെ അസിഡിറ്റി, ദഹന പ്രശ്‌നങ്ങൾ, ഗ്യാസ് രൂപപ്പെടുന്നതുമായി ബന്ധപ്പെട്ട പ്രശ്‌നങ്ങൾ എന്നിവ പരിഹരിക്കും. പുളിപ്പിക്കൽ ബി വിറ്റാമിനുകളെ പ്രോത്സാഹിപ്പിക്കും. കൂടാതെ ആവിയിൽ പുഴുങ്ങുന്നതു കൊണ്ട് തന്നെ, ഇഡ്‌ലി ഹൃദയാരോഗ്യത്തിനും ശരീരഭാരം നിയന്ത്രിക്കുന്നതിനും നല്ലതാണ്.
സാമ്പാറിനൊപ്പം ഇഡ്‌ലി കഴിക്കുന്നതാണ് മികച്ച കോമ്പിനേഷൻ. ഇത് പ്രോട്ടീനും നാരുകളും ലഭ്യമാകാൻ സഹായിക്കുന്നു. അതിലൂടെ രക്തത്തിലെ പഞ്ചസാര നിയന്ത്രിക്കാനും കഴിയും. ഇതിനൊപ്പം ചമ്മന്തി ചേർക്കുന്നത് ആരോഗ്യകരമായ കൊഴുപ്പ് കിട്ടാൻ സഹായിക്കും. ഇത് തലച്ചോറിന്റെ ആരോഗ്യവും ഹോർമോൺ പ്രവർത്തനവും പ്രോത്സാഹിപ്പിക്കും..
അതെ സമയം , ഇഡ്‌ലി ദിവസവും കഴിക്കാവുന്ന ഭക്ഷണമാണ്. എന്നാൽ പ്രിസർവേറ്റീവുകൾ ചേർത്ത ഇൻസ്റ്റന്റ് മിക്‌സുകൾ ഒഴിവാക്കുന്നതാണ് നല്ലത്. ഗർഭിണികൾക്ക് ഏറ്റവും മികച്ച ചോയ്‌സ് ആണ് ഇഡ്‌ലിയെന്നാണ് ഡയറ്റീഷന്മാർ ചൂണ്ടിക്കാണിക്കുന്നത്.
