കൊച്ചി: സ്റ്റാര്‍ ഹെല്‍ത്ത് കമ്പനിയുടെ ഇന്‍ഷൂറന്‍സ് പോളിസി എടുത്തതിലൂടെ ചികിത്സാ തുക നിഷേധിക്കപ്പെട്ട സംഭവം വിവരിച്ച ഫേസ്ബുക്ക് പോസ്റ്റ് ശ്രദ്ധനേടി. ഫമീല്‍ മുഹമ്മദാണ് തനിക്ക് പരിക്കേറ്റതിന് ശേഷം ചികിത്സാ തുക നല്‍കാതിരിക്കാന്‍ സ്റ്റാര്‍ ഹെല്‍ത്ത് ശ്രമിച്ചതായി തുറന്നുപറഞ്ഞത്. ഇതേതുടര്‍ന്ന് ഓംബുഡ്‌സ്മാനില്‍ പരാതി നല്‍കിയാണ് നഷ്ടപരിഹാരം നേടിയെടുത്തതെന്ന് ഫമീല്‍ മുഹമ്മദ് പറയുന്നു.
ഫമീല്‍ മുഹമ്മദിന്റെ ഫേസ്ബുക്ക് പോസ്റ്റ്,
ഒരു ഇന്‍ഷുറന്‍സ് പോളിസി എടുക്കുമ്പോള്‍, നാം പ്രതീക്ഷിക്കുന്നത് അത്യാവശ്യ ഘട്ടങ്ങളില്‍ ഒരു രക്ഷാകവചമാകുമെന്നാണ്. എന്നാല്‍, Star Health And Allied Insurance സ്റ്റാര്‍ ഹെല്‍ത്ത് ഇന്‍ഷുറന്‍സില്‍ നിന്ന് എനിക്കുണ്ടായ അനുഭവം ആ പ്രതീക്ഷകളെ തകിടം മറിക്കുന്ന ഒന്നായിരുന്നു. എന്റെ ഈ അഗ്‌നിപരീക്ഷയും, ഇന്‍ഷുറന്‍സ് ഓംബുഡ്സ്മാന്റെ നിര്‍ണായക ഇടപെടലും വഴി ലഭിച്ച നീതിയും ഞാന്‍ നിങ്ങളുമായി പങ്കുവെക്കുകയാണ്.
??കാല്‍മുട്ടിനേറ്റ പരിക്കും cashless ചികിത്സയുടെ വഞ്ചനയും:
2024 ജനുവരി 23-ന് രാത്രി കൊണ്ടോട്ടിയില്‍ ഫുട്‌ബോള്‍ കളിക്കുന്നതിനിടയിലാണ് എന്റെ കാല്‍മുട്ടിന് Medial meniscus tear എന്ന പരിക്ക് പറ്റിയത്. മൂന്ന് പ്രഗത്ഭരായ ഡോക്ടര്‍മാര്‍ ശസ്ത്രക്രിയ അനിവാര്യമാണെന്ന് വിധിയെഴുതി. വേദന കടിച്ചമര്‍ത്തിക്കൊണ്ട്, 2024 ഫെബ്രുവരി 1-ന് കോഴിക്കോട്ടെ ബേബി മെമ്മോറിയല്‍ ഹോസ്പിറ്റലില്‍ ഞാന്‍ ചികിത്സ തേടി. ഫെബ്രുവരി 2-ന്, ആര്‍ത്രോസ്‌കോപ്പിക് മെഡിക്കല്‍ മെനിസ്‌കല്‍ ബാലന്‍സിംഗ് (ഇടത് കാല്‍മുട്ട്) ശസ്ത്രക്രിയക്ക് വിധേയനായി.
എന്നാല്‍, പോളിസി എടുക്കുമ്പോള്‍ വാഗ്ദാനം ചെയ്ത കാഷ്ലെസ് സൗകര്യം സ്റ്റാര്‍ ഹെല്‍ത്ത് ഇന്‍ഷുറന്‍സ് നിഷ്‌കരുണം നിഷേധിച്ചു! 'പോളിസി എടുത്ത് നാല് വര്‍ഷം തികയാത്തതിനാല്‍ റീഇംബേഴ്‌സ്മെന്റ് മാത്രമേ നല്‍കാന്‍ പറ്റൂ' എന്നതായിരുന്നു അവരുടെ വിചിത്രമായ ന്യായീകരണം.
'പ്രീ-എക്‌സിസ്റ്റിംഗ് ഡിസീസ്' എന്ന കള്ളവാദം: എന്നെ ഒരു കള്ളനാക്കാന്‍ നടത്തിയ ഹീനശ്രമം!
കാഷ്ലെസ് ചികിത്സ നിഷേധിക്കപ്പെട്ടതോടെ, ഞാന്‍ റീഇംബേഴ്‌സ്മെന്റിനായി അപേക്ഷിച്ചു. ആവശ്യമായ എല്ലാ രേഖകളും സമര്‍പ്പിച്ചു. എന്നാല്‍, കുറച്ച് ദിവസങ്ങള്‍ക്ക് ശേഷം, ആശുപത്രിയില്‍ നിന്നുള്ള In-patient case sheet record ആവശ്യപ്പെട്ട് അവര്‍ വീണ്ടും എന്നെ ബുദ്ധിമുട്ടിച്ചു. അപേക്ഷ നല്‍കി ഡോക്ടറുടെ ഒപ്പിനായി രണ്ട് ദിവസം കാത്തിരിക്കേണ്ടിവന്നു. അതും ഞാന്‍ അവര്‍ക്ക് അയച്ചുകൊടുത്തു. പക്ഷേ, എന്റെ എല്ലാ പ്രതീക്ഷകളെയും തല്ലിക്കെടുത്തിക്കൊണ്ട്, സ്റ്റാര്‍ ഹെല്‍ത്ത് എന്റെ ക്ലെയിം 'Pre-existing disease' (മുന്‍പുണ്ടായിരുന്ന അസുഖം) ആണെന്ന് പറഞ്ഞ് പൂര്‍ണ്ണമായും നിരസിച്ചു!
എനിക്കത്ഭുതം തോന്നി! അവര്‍ക്ക് എങ്ങനെ ഇങ്ങനെയൊരു നിഗമനത്തിലെത്താന്‍ കഴിഞ്ഞു? ഞാന്‍ ഉടന്‍ തന്നെ എന്റെ ഇന്‍ഷുറന്‍സ് ഏജന്റിനെ വിവരങ്ങളറിയിച്ചു. അദ്ദേഹം സ്റ്റാര്‍ ഹെല്‍ത്ത് ഇന്‍ഷുറന്‍സിലെ ഒരു ഓഫീസറുടെ നമ്പര്‍ അയച്ചുതന്നു. അവരെ നേരില്‍ കണ്ട് കാര്യങ്ങള്‍ പറയാനാണ് നിര്‍ദ്ദേശിച്ചത്. എന്നാല്‍, അങ്ങിനെ വ്യക്തിപരമായി സംസാരിക്കുന്നത് ശരിയായ നടപടിയല്ലെന്ന് തോന്നിയതുകൊണ്ട് ഞാന്‍ അതിനു മുതിര്‍ന്നില്ല.
ഇതൊരു പ്രീ-എക്‌സിസ്റ്റിംഗ് ഡിസീസ് അല്ലെന്ന് ചൂണ്ടിക്കാട്ടി ഞാന്‍ സ്റ്റാര്‍ ഹെല്‍ത്ത് Grievance Redressal-ലിന് ഇ-മെയില്‍ അയച്ചു. എന്നാല്‍, അടുത്ത ദിവസം തന്നെ അവരുടെ 'വിദഗ്ധ സമിതിയുടെ വിശദമായ പരിശോധനയ്ക്ക് ശേഷം, നിങ്ങളുടെ രോഗം പ്രീ-എക്‌സിസ്റ്റിംഗ് ആണെന്ന് സ്ഥിരീകരിക്കുന്നു' എന്ന മറുപടി വന്നു. ഞാന്‍ എന്തോ കള്ളത്തരം ചെയ്യുന്നതായി അവര്‍ വരുത്തിത്തീര്‍ക്കാന്‍ ശ്രമിക്കുന്നതായി എനിക്ക് തോന്നി. ഒരു സാധാരണക്കാരനെ ഭീഷണിപ്പെടുത്തി ക്ലെയിം നിഷേധിക്കാനുള്ള അവരുടെ ശ്രമം! അതിനാല്‍ ഇത് പ്രീ-എക്‌സിസ്റ്റിംഗ് അസുഖമല്ലെന്ന് തെളിയിക്കേണ്ടത് എന്റെ ജീവിതാവശ്യമായി മാറി.
അവരുടെ ഈ കണ്ടെത്തലിന്റെ കാരണം അറിയാന്‍ ഞാന്‍ ആകാംക്ഷയോടെ കാത്തിരുന്നു. ഇന്‍-പേഷ്യന്റ് കേസ് ഷീറ്റ് റെക്കോര്‍ഡുകള്‍ എന്റെ സഹപാഠികളായ ഡോക്ടര്‍മാര്‍ക്ക് അയച്ചുകൊടുത്തു. അവരോരോരുത്തരും അത് വിശദമായി പരിശോധിച്ചിട്ടും, ഇത് പ്രീ-എക്‌സിസ്റ്റിംഗ് ആണെന്ന് സ്ഥാപിക്കാന്‍ കഴിയുന്ന ഒരു സൂചന പോലും കണ്ടെത്താനായില്ല. ഈ സമയത്ത് ഞാന്‍ അനുഭവിച്ച മാനസിക ബുദ്ധിമുട്ട് പറഞ്ഞറിയിക്കാന്‍ പറ്റാത്തതായിരുന്നു. എന്റെ പണം നഷ്ടപ്പെടുന്നതിനപ്പുറം, ഞാന്‍ ഒരു കള്ളനാണെന്ന് അവര്‍ വരുത്തിത്തീര്‍ക്കാന്‍ ശ്രമിച്ചത് എന്നെ വല്ലാതെ തളര്‍ത്തി.
ഓംബുഡ്സ്മാന് ഹിയറിംഗിലെ നാടകീയ നിമിഷങ്ങള്‍: സത്യം ജയിച്ച നിമിഷം!
ഒടുവില്‍, എല്ലാ രേഖകളും സഹിതം ഞാന്‍ ഇന്‍ഷുറന്‍സ് ഓംബുഡ്സ്മാന് പരാതി നല്‍കി. 2025 ഏപ്രില്‍ 16-ന് ഓണ്‍ലൈന്‍ ഹിയറിംഗ് നടന്നു. ആദ്യം എന്നോട് പരാതി വിവരിക്കാന്‍ ആവശ്യപ്പെട്ടു. പിന്നീട് സ്റ്റാര്‍ ഹെല്‍ത്തിന്റെ പ്രതിനിധിയുടെ അവസരമായിരുന്നു. എങ്ങനെയാണ് അവര്‍ ഇത് പ്രീ-എക്‌സിസ്റ്റിംഗ് ആണെന്ന് വാദിക്കാന്‍ പോകുന്നത് എന്ന് ഞാന്‍ ആകാംക്ഷയോടെ, എന്നാല്‍ ഒട്ടും ഭയമില്ലാതെ കാത്തിരുന്നു.
അപ്പോഴാണ് അയാള്‍ ഞെട്ടിക്കുന്ന വാദം ഉന്നയിച്ചത്: '2021 ഡിസംബര്‍ 27-ന് ഞാന്‍ കൊണ്ടോട്ടിയിലെ റിലീഫ് ഹോസ്പിറ്റലില്‍ ഒരു ഓര്‍ത്തോ സ്‌പെഷ്യലിസ്റ്റിനെ കണ്ടിട്ടുണ്ടെന്ന്!'
ഓംബുഡ്സ്മാന് എന്നോട് ചോദിച്ചു, ഇത് ശരിയാണോ എന്ന്. എനിക്കത് ഓര്‍മ്മയില്ലെന്ന് ഞാന്‍ അറിയിച്ചു. ഒരുപക്ഷേ സംഭവിച്ചിരിക്കാം. പക്ഷേ ഒരു കാര്യം ഉറപ്പാണ്, മെനിയല്‍ മെനിസ്‌കസ് ടിയറിന് വേണ്ടി ഞാന്‍ ഇതിനുമുമ്പ് ഒരു ഡോക്ടറെയും കണ്ടിട്ടില്ല. എന്റെ കാല്‍മുട്ടിനേറ്റ ഈ പരിക്കിന് മുന്‍പ് ഞാന്‍ ഒരു ഡോക്ടറെയും കണ്ടിട്ടില്ല എന്നുള്ളത് നൂറുശതമാനം വസ്തുതയാണ്.
സ്റ്റാര്‍ ഹെല്‍ത്ത് പ്രതിനിധിക്ക് തങ്ങളുടെ ഈ വാദത്തെ സാധൂകരിക്കുന്ന ഒരു രേഖയും ഹാജരാക്കാന്‍ കഴിഞ്ഞില്ല. എന്റെ കണ്‍സള്‍ട്ടേഷന്‍ കാല്‍മുട്ടിനോ, കൈമുട്ടിനോ, തോളിനോ അതോ മറ്റെന്തിനോ ആയിരുന്നു എന്ന് പോലും അവര്‍ക്ക് അറിയില്ലായിരുന്നു! നമ്മള്‍ ഡോക്ടര്‍ അപ്പോയിന്റ്‌മെന്റ് എടുക്കുമ്പോള്‍ പേരും വയസ്സും ഫീസും നല്‍കി നമുക്ക് ബ്ലാങ്ക് പ്രിസ്‌ക്രിപ്ഷന്‍ ഷീറ്റ് നല്‍കുന്ന ഡാറ്റ മാത്രമാണ് ഹോസ്പിറ്റലില്‍ ഉള്ളത്. ആ സമയത്ത് ഡോക്ടര്‍ പേനകൊണ്ടാണ് ആ ഷീറ്റില്‍ എഴുതാറ്. (ഇപ്പോള്‍ എങ്ങനെയെന്നറിയില്ല.) കേവലം ഒരു ടോക്കണ്‍ എടുത്തതിന്റെ അടിസ്ഥാനത്തില്‍, അത് മുന്‍പുണ്ടായിരുന്ന അസുഖമാണെന്ന് സ്ഥാപിക്കാന്‍ ശ്രമിച്ചത് അങ്ങേയറ്റം വികലവും ബാലിശവുമായ വാദമായിരുന്നു! ഓംബുഡ്സ്മാന്റെ മുന്നില്‍ അവരുടെ ഈ വാദം നിലനില്‍ക്കാതെ പോയപ്പോള്‍, ഞാന്‍ നീണ്ട ഒരു ശ്വാസമെടുത്ത് ആശ്വാസത്തോടെ പുഞ്ചിരിച്ചു. സത്യം വിജയിക്കാന്‍ പോകുന്നു!
നീണ്ട പോരാട്ടം അവസാനിക്കുന്നു: സത്യം വിജയിക്കുന്നു!
ഒടുവില്‍, 2025 മെയ് 2-ന് എനിക്ക് ഓംബുഡ്സ്മാന്റെ ഇമെയില്‍ ലഭിച്ചു. സ്റ്റാര്‍ ഹെല്‍ത്ത് 30 ദിവസത്തിനകം എനിക്ക് നഷ്ടപരിഹാരം (?120806/-) നല്‍കണമെന്ന് അതില്‍ ഉത്തരവിട്ടു. ഒരാഴ്ചക്കുള്ളില്‍ തുക എന്റെ അക്കൗണ്ടില്‍ ക്രെഡിറ്റായി.
ഇതൊരു നീണ്ട പോരാട്ടമായിരുന്നു. ഇരുപതോളം ഇമെയിലുകളും അഞ്ചിലധികം രജിസ്റ്റേര്‍ഡ് പോസ്റ്റുകളും ഞാന്‍ അയച്ചിട്ടുണ്ട്. പലപ്പോഴും മടുപ്പ് തോന്നി, എല്ലാം ഉപേക്ഷിച്ചാലോ എന്ന് ചിന്തിച്ച നിമിഷങ്ങളുണ്ടായി. എന്നാല്‍, എന്റെ സുഹൃത്ത് Mohammed Iqbal തന്ന പിന്തുണ മറക്കാന്‍ കഴിയില്ല. സത്യം ഒടുവില്‍ വിജയിച്ചു. ഒരു ഇന്‍ഷുറന്‍സ് കമ്പനി ഇങ്ങനെയൊരു തെറ്റായ നിലപാട് സ്വീകരിച്ചത് വളരെ വേദനാജനകമാണ്.
?അസുഖങ്ങള്‍ മറച്ചുവെച്ചു ഇന്‍ഷുറന്‍സ് എടുക്കുകയും എന്നിട്ട് ചികിത്സക്ക് ശ്രമിക്കുന്നവരുണ്ടായേക്കാം, പക്ഷെ വ്യക്തതയില്ലാതെ ഇങ്ങനെ ചെയ്യുന്നത് സ്റ്റാര്‍ ഹെല്‍ത്തിന്റെ വിശ്വാസ്യത നഷ്ടപ്പെടുത്തി.
? ഈ അനുഭവം മറ്റുള്ളവര്‍ക്കും ഒരു പാഠമാകട്ടെ എന്ന് ഞാന്‍ ആഗ്രഹിക്കുന്നു. നിങ്ങളുടെ അവകാശങ്ങള്‍ക്കായി പോരാടുക! ഇന്‍ഷുറന്‍സ് ഓംബുഡ്സ്മാന് പോലുള്ള സംവിധാനങ്ങള്‍ നമുക്ക് നീതി ലഭിക്കാന്‍ സഹായിക്കുമെന്നതില്‍ പൂര്‍ണ്ണ വിശ്വാസമുണ്ട്. നിങ്ങളുടെ അവകാശങ്ങള്‍ ആരെയും കവര്‍ന്നെടുക്കാന്‍ അനുവദിക്കരുത്!
