നഗരപ്രദേശങ്ങളില്‍ നിന്നും മാലിന്യം ശേഖരിച്ച് ഗ്രാമ പ്രദേശങ്ങളില്‍ നിക്ഷേപിക്കുന്നയാള്‍ പിടിയില്‍. വാഹനത്തില്‍ രാത്രിയിലെത്തി വഴിവക്കില്‍ മാലിന്യം തള്ളിയിരുന്ന മുളയറ അണമുഖം സ്വദേശി ജെ.ബി. ബിനോയിയെയാണ് കഴിഞ്ഞ ദിവസം അരുവിക്കര പൊലീസ് പിടികൂടിയത്. മാലിന്യം കൊണ്ടുവരുന്നതിനു വേണ്ടി ഇയാള്‍ ഉപയോഗിച്ചിരുന്ന പിക്കപ്പ് ലോറിയും പൊലീസ് പിടിച്ചെടുത്തു.
നാട്ടുകാരുടെ പരാതിയെ തുടര്‍ന്ന് സിസിടിവി ദൃശ്യങ്ങള്‍ പരിശോധിച്ചാണ് പൊലീസ് പ്രതിയെ കണ്ടെത്തിയത്. നഗര പ്രദേശങ്ങളില്‍ നിന്നുള്ള മാലിന്യങ്ങള്‍ അരുവിക്കര, കരകുളം തുടങ്ങിയ പഞ്ചായത്തുകളിലെ വിവിധ പ്രദേശങ്ങളില്‍ ഇയാള്‍ സ്ഥിരമായി നിക്ഷേപിക്കുന്നത് പതിവായിരുന്നു. പിക്കപ്പ് വാഹനത്തിന്റെ പേരും നമ്പരും മാറ്റിയാണ് ഇയാള്‍ മാലിന്യങ്ങള്‍ കൊണ്ടുവന്നിരുന്നതെന്ന് പൊലീസ് പറഞ്ഞു.
നഗരത്തിലെ ഹോട്ടലുകള്‍, വീടുകള്‍ തുടങ്ങിയ ഇടങ്ങളില്‍ നിന്നുമാണ് പ്രതി മാലിന്യം ശേഖരിക്കുന്നതെന്നും കേസ് നടപടികളുടെ ഭാഗമായി വാഹനം കസ്റ്റഡിയിലുണ്ടെന്നും പൊലീസ് പറഞ്ഞു.
