കരളിൽ കൊഴുപ്പ് അടിഞ്ഞ് കൂടുന്ന അവസ്ഥയെയാണ് ഫാറ്റി ലിവർ എന്ന് പറയുന്നത്. ആഹാരക്രമവും ജീവിതശൈലിയും കാരണം മദ്യപിക്കാത്തവരിലും ഫാറ്റി ലിവർ വരാനുള്ള സാധ്യതയുണ്ട്. പ്രമേഹം, രക്താതിസമ്മർദം, കൊളസ്‌ട്രോൾ തുടങ്ങിയവയുള്ളവർക്ക് ഫാറ്റി ലിവർ ഉണ്ടാകാനുള്ള സാധ്യത കൂടുതലാണ്. വ്യായാമം, ആഹാര ക്രമീകരണം (കൊഴുപ്പുള്ളത് പരമാവധി നിയന്ത്രിക്കുക), ശരീരഭാരം കുറയ്ക്കുക എന്നിവയാണ് ഫാറ്റി ലിവർ തടയാനുള്ള പ്രധാന മാർഗങ്ങൾ.
ആഗോളതലത്തിൽ വിട്ടുമാറാത്ത കരൾ രോഗങ്ങളുടെ ഒരു പ്രധാന കാരണം നോൺ-ആൽക്കഹോളിക് ഫാറ്റി ലിവർ ഡിസീസ് നോൺ ആൾക്കഹോളിക്‌ ഫാറ്റി ലിവർ ഡിസീസ് (എൻഎഎഫ്എൽഡി ) ആണെന്നാണ് ഇന്ത്യയുടെ നാഷണൽ ഹെൽത്ത് പോർട്ടൽ (എൻഎച്പി) വ്യക്തമാക്കുന്നത്.ആഫ്രിക്കയിലെ 13.5% മുതൽ മിഡിൽ ഈസ്റ്റിലെ 31.8% വരെയുള്ള ആഗോള മുതിർന്ന ജനസംഖ്യയുടെ 25% പേരെ എൻഎഎഫ്എൽഡി ബാധിക്കുന്നു. ഇന്ത്യയിൽ എൻഎഎഫ്എൽഡി യുടെ വ്യാപനം ഏകദേശം 9% മുതൽ 32% വരെയാണെന്ന്, ആരോഗ്യ സംഘടന റിപ്പോർട്ട് ചെയ്യുന്നു.
അമിതമായ അളവിൽ കൊഴുപ്പ് കരളിൽ അടിഞ്ഞുകൂടുന്ന അവസ്ഥയാണ് നോൺ-ആൽക്കഹോളിക് ഫാറ്റി ലിവർ ഡിസീസ്. കൊഴുപ്പിന്റെ ഈ നിക്ഷേപം മദ്യപാനവുമായി ബന്ധപ്പെട്ടതോ അല്ല. എൻഎഎഫ്എൽഡി രണ്ട് തരത്തിലാകാം: ലളിതമായ ഫാറ്റി ലിവർ (എൻഎഎഫ്എൽ), നോൺ-ആൽക്കഹോളിക് സ്റ്റീറ്റോഹെപ്പറ്റൈറ്റിസ് (എൻഎഎസ്എച് ).
നോൺ-ആൽക്കഹോളിക് സ്റ്റീറ്റോഹെപ്പറ്റൈറ്റിസ് (എൻഎഎസ്എച്) എൻഎഎഫ്എൽഡി യുടെ കൂടുതൽ ഗുരുതരമായ രൂപമാണ്. ഇത് സിറോസിസ് അല്ലെങ്കിൽ കരൾ കാൻസറിലേക്ക് നയിക്കുന്ന സങ്കീർണതകൾക്ക് കാരണമാകും. നോൺ-ആൽക്കഹോളിക് ഫാറ്റി ലിവർ ഉള്ളവരിൽ രാവിലെ എഴുന്നേൽക്കുമ്പോൾ ചില ലക്ഷണങ്ങൾ ഉണ്ടാകാം. അതിലൊന്നാണ് ക്ഷീണം. എത്ര ഉറങ്ങിയാലും ചിലരിൽ ക്ഷീണം മാറാറില്ല. എന്നാൽ ഈ ലക്ഷണത്തെ നിസ്സാരമായി കാണുന്നതിനെതിരെ വിദഗ്ധർ മുന്നറിയിപ്പ് നൽകുന്നു. രാവിലെ എഴുന്നേൽക്കുമ്പോശ്‍ ക്ഷീണം പതിവായി നിലനിൽക്കുന്നുണ്ടെങ്കിൽ ശ്രദ്ധിക്കണമെന്നും വിദഗ്ധർ പറയുന്നു. വയറിലെ അസ്വസ്ഥത, മഞ്ഞപ്പിത്തം, പെട്ടെന്ന് വണ്ണം കുറയുക എന്നിവയെല്ലാമാണ് നോൺ-ആൽക്കഹോളിക് ഫാറ്റി ലിവറിന്റെ മറ്റ് ലക്ഷണങ്ങൾ.
നോൺ-ആൽക്കഹോളിക് ഫാറ്റി ലിവർ രോഗത്തിന്റെ കൃത്യമായ കാരണം അറിവായിട്ടില്ലെങ്കിലും, പ്രമേഹരോഗികളിലും അമിതവണ്ണമുള്ളവരിലും ഇത് വ്യാപകമാണെന്ന് ഗവേഷകർ പറയുന്നു. കൊളസ്‌ട്രോൾ, ട്രൈഗ്ലിസറൈഡുകൾ എന്നിവ പോലുള്ള ഉയർന്ന അളവിലുള്ള കൊഴുപ്പുള്ള ആളുകൾക്കും ഉയർന്ന രക്തസമ്മർദ്ദമുള്ളവർക്കും രോഗസാധ്യത കൂടുതലാണെന്നും പഠനങ്ങൾ ചൂണ്ടിക്കാട്ടുന്നു.
