മട്ടന്നൂർ : ചികിൽസ ഫലിച്ചില്ലെന്നാരോപിച്ച് പാരമ്പര്യ വൈദ്യരെ ഭീഷണിപ്പെടുത്തുകയും അപകീർത്തികരമായി സംസാരിക്കുകയും ചെയ്തുവെന്ന പരാതിയിൽ മട്ടന്നൂർ കരേറ്റസ്വദേശികളായ 12 പേർക്കെതിരെ രാജപുരം പൊലീസ് വിവിധ വകുപ്പുകൾ പ്രകാരം കേസെടുത്തു.കള്ളാറിലെ പ്രശസ്ത പാരമ്പര്യ വൈദ്യരായ മാലക്കല്ല് കപ്പള്ളിയിലെ സി.ദാമോദരൻ വൈദ്യരുടെ(53) പരാതിയിലാണ് കേസ്.മട്ടന്നൂർകരേറ്റയിലെ താളിക്കാട് വീട്ടിൽ വി.എം.ദീപ(42), ഭർത്താവ് സുധീഷ്, ദീപയുടെ ബന്ധു, ബിജീഷ്, ദീപയുടെ സഹോദരൻ എന്നിവരുടെയും കണ്ടാലറിയാവുന്ന മറ്റ് ഏഴുപേർക്കെതിരെയമാണ് കേസ്.
ഈക്കഴിഞ്ഞ ജൂൺ-6 ന് ഉച്ചയ്ക്ക് 12 നാണ് കേസിനാപദമായ സംഭവം നടന്നത്. കള്ളാറിൽ ചികിൽസ നടത്തിവരുന്ന വൈദ്യരുടെ വംശീയ വൈദ്യശാലയിലേക്ക് അതിക്രമിച്ച് കയറിയ പ്രതികൾ ചികിൽസ തേടിയെത്തിയ നിരവധിപേരുടെ മുന്നിൽ വെച്ച് ചികിൽസ ഫലിച്ചില്ലെന്നാരോപിച്ച് പാരമ്പര്യ ചികിത്സാ രീതികളെ അപകീർത്തിപ്പെടുത്തുന്ന വിധത്തിൽ സംസാരിക്കുകയും വൈദ്യരെ ഭീഷണിപ്പെടുത്തുകയുമായിരുന്നു.
കേസന്വേഷിച്ച രാജപുരം സീനിയർ സി.പി.ഒ ഫിലിപ്പ്‌തോമസ് സമർപ്പിച്ച അന്വേഷണ റിപ്പോർട്ട് പ്രകാരമാണ് വിവിധ വകുപ്പുകൾ പ്രകാരം പ്രതികൾക്കെതിരെ പൊലീസ് കേസെടുത്തത്.
