കണ്ണൂർ : സി.പി.എം കണ്ണൂർ ജില്ലാ സെക്രട്ടറി പദവി ഒഴിഞ്ഞ് സംസ്ഥാന സെക്രട്ടറിയേറ്റ് അംഗമായ എം.വി ജയരാജൻ മുഖ്യമന്ത്രിയുടെ പ്രൈവറ്റ് സെക്രട്ടറിയുടെ ചുമതല ഏറ്റെടുത്തേക്കും. കെ.കെ. രാഗേഷ് രാജിവെച്ച ഒഴിവിലേക്കാണ് എം.വി ജയരാജൻ മുഖ്യമന്ത്രിയുടെ ഓഫിസിലേക്ക് എത്തുക.
പാർട്ടിയും മുഖ്യമന്ത്രിയുടെ ഓഫിസും തമ്മിലുള്ള ബന്ധം ശക്തിപ്പെടുത്തുന്നതിൻ്റെ ഭാഗമായാണ് സംസ്ഥാന സെക്രട്ടറിയേറ്റ് അംഗമായ എം.വി ജയരാജനെ മുഖ്യമന്ത്രിയുടെ പി. എസായി നിയോഗിക്കണമെന്ന ആവശ്യം ഉയർന്നത്. കെ. കെ. രാഗേഷിന് പകരം തൻ്റെ പി. എസായി എംവി ജയരാജൻ വരണമെന്ന താൽപര്യം മുഖ്യമന്ത്രിക്കുണ്ടെന്നാണ് സൂചന.
നേരത്തെ മുഖ്യമന്ത്രിയുടെ പൊളിറ്റിക്കൽ സെക്രട്ടറിയായി പ്രവർത്തിച്ചതിൻ്റെ അനുഭവപരിചയംഎം.വി ജയരാജനുണ്ട്. ഈ കാലയളവിൽ നടത്തിയ കാര്യക്ഷമമായ പ്രവർത്തനമാണ് എം.വി ജയരാജന് അനുകൂലമായ ഘടകം. സംസ്ഥാന സെക്രട്ടറിയേറ്റ് അംഗമായ എം.വി ജയരാജന് സി.ഐ.ടി.യുവിൻ്റെ ഭാരവാഹിത്വമല്ലാതെ മറ്റു ചുമതലകളൊന്നുമില്ല. ഈ സാഹചര്യത്തിൽ വിവാദങ്ങളിൽ ഉഴലുന്ന മുഖ്യമന്ത്രിയുടെ ഓഫിസിനെ കൂടുതൽ സുതാര്യമാക്കാൻ എം.വി ജയരാജന് കഴിയുമെന്നാണ് സംസ്ഥാന നേതൃത്വത്തിൻ്റെ പ്രതീക്ഷ.
