തിരുവനന്തപുരം: കേരളംകണ്ട ഏറ്റവും വലിയ ദുരന്തങ്ങളിലൊന്നായ വയനാട്ടിലെ ചൂരല്‍മല മുണ്ടക്കൈ ഉരുള്‍പൊട്ടലില്‍ കേന്ദ്ര സഹായം തഴയപ്പെട്ടപ്പോള്‍ മണ്ണിടിച്ചിലുണ്ടായ ഉത്തരാഖണ്ഡിന് ദിവസങ്ങള്‍ക്കകം പ്രഖ്യാപിച്ചത് 1,200 കോടി രൂപ.
ഒരു വര്‍ഷം കഴിഞ്ഞിട്ടും വയനാടിന് കേന്ദ്ര സര്‍ക്കാര്‍ ഒരു രൂപ പോലും സഹായമായി നല്‍കിയിട്ടില്ലെന്ന ആക്ഷേപം നിരന്തരം ഉയരുന്നതിനിടെയാണ് ഉത്തരാഖണ്ഡിന് സഹായം പ്രഖ്യാപിച്ചത്.
കേന്ദ്ര സര്‍ക്കാര്‍ പ്രകൃതി ദുരന്തങ്ങളെ നേരിടാന്‍ വിവിധ സംസ്ഥാനങ്ങള്‍ക്ക് സാമ്പത്തിക സഹായം നല്‍കാറുണ്ട്. 2025 സെപ്റ്റംബര്‍ 9-ന്, പഞ്ചാബില്‍ ഉണ്ടായ പ്രളയത്തിന് 1600 കോടി രൂപയുടെ സഹായം മോദി പ്രഖ്യാപിച്ചിരുന്നു. ഈ രീതിയില്‍ പല സംസ്ഥാനങ്ങള്‍ക്കും ഫണ്ട് അനുവദിക്കാറുണ്ട്. എന്നാല്‍, ബിജെപി ഇതര സംസ്ഥാനങ്ങളോട് ചിറ്റമ്മനയം ആണ് സ്വീകരിക്കുന്നത്.
2024-ല്‍ വയനാട്ടില്‍ ഉണ്ടായ ഉരുള്‍പൊട്ടലും പ്രളയവും നൂറുകണക്കിന് ജീവനുകള്‍ അപഹരിക്കുകയും ആളുകളെ ഭവനരഹിതരാക്കുകയും ചെയ്തു. എന്നാല്‍, ഒരു വര്‍ഷം കഴിഞ്ഞിട്ടും, കേന്ദ്ര സര്‍ക്കാര്‍ വയനാടിന് പ്രത്യേക സാമ്പത്തിക സഹായം പ്രഖ്യാപിച്ചിട്ടില്ലെന്ന ആക്ഷേപം ശക്തമാണ്. കേരള സര്‍ക്കാര്‍ ദുരിതാശ്വാസ പ്രവര്‍ത്തനങ്ങള്‍ക്കായി സ്വന്തം ഫണ്ടുകള്‍ ഉപയോഗിക്കുന്നുണ്ടെങ്കിലും, കേന്ദ്ര സഹായത്തിന്റെ അഭാവം വലിയ വിമര്‍ശനത്തിന് വഴിവെച്ചിട്ടുണ്ട്.
കേന്ദ്ര സര്‍ക്കാര്‍ വിവിധ സംസ്ഥാനങ്ങള്‍ക്ക് ദുരന്ത സഹായം പ്രഖ്യാപിക്കുമ്പോള്‍, വയനാടിന്റെ കാര്യത്തില്‍ ഇതുവരെ കാര്യമായ നടപടികളൊന്നും ഉണ്ടായിട്ടില്ല. കേന്ദ്ര സര്‍ക്കാരിന്റെ ഭാഗത്ത് നിന്നുള്ള മുന്‍ഗണനകളില്‍ വ്യത്യാസമുണ്ടോ എന്ന ചോദ്യമാണ് ഉയരുന്നത്.
ഉത്തരാഖണ്ഡിന് 1200 കോടി രൂപയുടെ സഹായം പ്രഖ്യാപിച്ചതിന്റെ പശ്ചാത്തലത്തില്‍, വയനാടിന്റെ കാര്യത്തില്‍ കേന്ദ്ര സര്‍ക്കാര്‍ എന്തുകൊണ്ട് സമാനമായ നടപടികള്‍ സ്വീകരിച്ചില്ല എന്ന ചോദ്യവും പ്രസക്തമാണ്.
പ്രകൃതി ദുരന്തങ്ങള്‍ രാജ്യത്തിന്റെ വിവിധ ഭാഗങ്ങളില്‍ വന്‍നാശനഷ്ടങ്ങള്‍ ഉണ്ടാക്കുമ്പോള്‍, കേന്ദ്ര-സംസ്ഥാന സര്‍ക്കാരുകള്‍ തമ്മിലുള്ള ഏകോപനവും സമയോചിതമായ ഇടപെടലുകളും അത്യന്താപേക്ഷിതമാണ്. എന്നാല്‍, ബിജെപി ഇതര സംസ്ഥനങ്ങളോട് പ്രത്യേകിച്ചും കേരളത്തോട് കാട്ടുന്ന അവഗണന ഫെഡറല്‍ തത്വങ്ങള്‍ക്ക് എതിരാണ്.
വയനാടിന്റെ കാര്യത്തില്‍ കേന്ദ്ര സര്‍ക്കാര്‍ കൂടുതല്‍ ശ്രദ്ധ പുലര്‍ത്തേണ്ടതുണ്ട്. എല്ലാ ദുരന്തബാധിത മേഖലകള്‍ക്കും തുല്യമായ പരിഗണന ലഭിക്കേണ്ടത് ഒരു ജനാധിപത്യ രാജ്യത്തിന്റെ ഉത്തരവാദിത്തമാണ്.