മുകേഷ് അംബാനിനിക്ക് റിയൽ എസ്റ്റേറ്റിലും ബിസിനസ് സാന്നിദ്ധ്യമുണ്ടെന്നത് അധികമാർക്കും അറിയാത്ത കാര്യമാണ്. ലണ്ടനിലെ ചരിത്രപരമായ സ്റ്റോക് പാർക് പ്രോപർട്ടി മാത്രമല്ല, ന്യൂയോർക്കിലെ മാൻഡരിൻ ഓറിയന്റൽ എന്ന പ്രീമിയം ലക്ഷ്വറി ഹോട്ടലും അംബാനി സ്വന്തമാക്കിയിട്ടുണ്ട്. ഹോളിവുഡ് താരങ്ങളുടെ ഇഷ്ട ഇടമാണ് ഈ ഹോട്ടൽ. ഒരു രാത്രിക്ക് 55,000 രൂപ മുതൽ 10 ലക്ഷം രൂപ രൂപ വരെയാണ് ഇവിടെ ചാർജ്ജ് ഈടാക്കുന്നത്
പ്രൈം ലൊക്കേഷൻ
35 മുതൽ 54 നിലകൾ വരെ വ്യാപിച്ചിരിക്കുന്ന ഹോട്ടലിൽ നിന്ന് സമീപത്തെ ഹഡ്സൺ നദിയുടെ നയന മനോഹരമായ കാഴ്ച്ച ലഭിക്കും സെൻട്രൽ പാർക്ക്, കൊളംബസ് സർക്കിൾ എന്നീ പ്രൈം ലൊക്കേഷനുകൾക്ക് സമീപത്തായിട്ടാണ് ഹോട്ടൽ സ്ഥിതി ചെയ്യുന്നത്. 2003 വർഷത്തിൽ പ്രവർത്തനം ആരംഭിച്ച ഹോട്ടലിൽ 248 റൂമുകൾ/സ്യൂട്ടുകൾ എന്നിവയാണുള്ളത്.
മുറി വാടക
ഹോട്ടലിലെ ഏറ്റവും കുറഞ്ഞ നിരക്കുള്ള മുറിക്ക് ഒരു രാത്രിക്ക് 745 ഡോളറുകൾ (ഏകദേശം 55,000 രൂപ) ചാർജ്ജ് ഈടാക്കുന്നു. അത്യാഡംബരമുള്ള മുറികൾക്ക് ഒരു രാത്രിക്ക് 14,000 ഡോളറുകളാണ് (10 ലക്ഷം രൂപയിലധികം) നിരക്ക്. ഇതിൽ കൂടുതൽ നിരക്കുള്ള 2 തരം റൂമുകൾ തെരഞ്ഞെടുക്കാനുള്ള ഓപ്ഷനുകളും ഇവിടെയുണ്ട്. 53ാം നിലയിൽ സ്ഥിതി ചെയ്യുന്ന 'Presidential Suite', 'Suite 5000' എന്നിവയ്ക്കാണ് ഏറ്റവും ഉയർന്ന തുക നൽകേണ്ടത്.
പ്രോപർട്ടിയുടെ വില
ഈ പ്രോപർട്ടി അംബാനിയുടെ റിലയൻസ് ഇൻഡസ്ട്രീസ് 98.1 മില്യൺ ഡോളറുകൾക്കാണ് (ഏകദേശം 728 കോടി രൂപ) സ്വന്തമാക്കിയത്. റിലയൻസിന്റെ സബ്സിഡിയറി കമ്പനിയും, മാൻഡരിൻ ഹോട്ടലിൽ 73.37% പങ്കാളിത്തത്തോടെ ഉടമസ്ഥത വഹിച്ചിരുന്ന കൊളംബബസ് സെന്റർ കോർപ്പറേഷനും തമ്മിലാണ് ഡീൽ നടന്നത്.
