പത്തനംതിട്ട: ശബരിമല സ്വർണ്ണക്കൊളള കേസുമായി ബന്ധപ്പെട്ട് നിർണായകമായ ഒരു നീക്കത്തിൽ, രമേശ് ചെന്നിത്തലയ്ക്ക് വിവരങ്ങൾ നൽകിയ വ്യവസായിയുടെ മൊഴി പ്രത്യേക അന്വേഷണ സംഘം (എസ്.ഐ.ടി.) രേഖപ്പെടുത്തി. അന്താരാഷ്ട്ര പുരാവസ്തു കള്ളക്കടത്ത് സംഘവുമായി ഈ കേസിന് ബന്ധമുണ്ടോ എന്നതിനെക്കുറിച്ചുള്ള വിവരങ്ങളാണ് എസ്.ഐ.ടി. ഈ വ്യവസായിയിൽ നിന്ന് തേടിയത്. സുരക്ഷാ കാരണങ്ങളാൽ അതീവ രഹസ്യമായാണ് മൊഴിയെടുപ്പ് നടന്നത്.
കേരളത്തിന് പുറത്തുള്ള ഈ വ്യവസായിയെക്കുറിച്ചുള്ള വിവരങ്ങൾ രമേശ് ചെന്നിത്തല വഴിയാണ് അന്വേഷണ സംഘത്തിന് ലഭിച്ചത്. തനിക്ക് ലഭിച്ച വിവരങ്ങൾ എസ്.ഐ.ടിക്ക് കൈമാറിയതായി ചെന്നിത്തല നേരത്തെ വ്യക്തമാക്കിയിരുന്നു. ശബരിമല സ്വർണ്ണക്കൊള്ളയിൽ ഏകദേശം 500 കോടി രൂപയുടെ തട്ടിപ്പാണ് നടന്നതെന്ന ഗുരുതരമായ ആരോപണം ചെന്നിത്തല ഉന്നയിച്ചിരുന്നു.
നേരത്തെ, ഡിസംബർ പതിനാലിന് രമേശ് ചെന്നിത്തലയും എസ്ഐടിയുടെ ഈഞ്ചയ്ക്കൽ ഓഫീസിലെത്തി മൊഴി നൽകിയിരുന്നു. അദ്ദേഹത്തിന്റെ തിരക്കുകൾ കാരണം നേരത്തെ നിശ്ചയിച്ചിരുന്ന രണ്ടു മൊഴിയെടുപ്പുകൾ നീണ്ടുപോവുകയായിരുന്നു.
“തനിക്ക് ലഭിച്ച വിവരങ്ങൾ സത്യമാണോ അല്ലയോ എന്ന കാര്യം എസ്.ഐ.ടി. തീരുമാനിക്കട്ടെ. അത് സത്യമാണെന്നാണ് താൻ വിശ്വസിക്കുന്നത്. കൈമാറിയത് തെളിവുകളല്ല, മറിച്ച് വിവരങ്ങളാണ്. കാണാതെ പോയ സ്വർണ്ണം എവിടെയെന്ന് കണ്ടെത്തേണ്ടത് എസ്.ഐ.ടിയുടെ ഉത്തരവാദിത്വമാണ്. ഇതേവരെ കണ്ടെത്താൻ കഴിയാത്തതുകൊണ്ടാണ് തന്റെ ആരോപണത്തിന് പ്രസക്തിയുണ്ടാകുന്നത്,” മൊഴി നൽകിയ ശേഷം ചെന്നിത്തല മാധ്യമങ്ങളോട് പറഞ്ഞിരുന്നു. പുരാവസ്തു കള്ളക്കടത്ത് സംഘങ്ങൾക്ക് ശബരിമല സ്വർണ്ണ മോഷണക്കേസുമായി ബന്ധമുണ്ടെന്ന് ചൂണ്ടിക്കാട്ടി അദ്ദേഹം നേരത്തെ എസ്.ഐ.ടിക്ക് കത്ത് നൽകിയിരുന്നു.
