തിരുവനന്തപുരം : ജനങ്ങളുടെ പങ്കാളിത്തമാണ് പൊതുവിദ്യാഭ്യാസത്തിന്റെ ശക്തിയെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി.ശിവൻകുട്ടി. ചെറുന്നിയൂർ ഗവ.ഹയർസെക്കൻഡറി സ്‌കൂളിലെ ബഹുനില കെട്ടിടത്തിന്റെ ഉദ്ഘാടനം നിർവ്വഹിച്ച് സംസാരിക്കുകയായിരുന്നു മന്ത്രി.
പൊതുവിദ്യാലയങ്ങളുടെ അടിസ്ഥാന സൗകര്യങ്ങൾ നവീകരിച്ച്, വിദ്യാർത്ഥികൾക്ക് മികച്ച പഠനാന്തരീക്ഷം ഒരുക്കുന്നതിന് പരിപൂർണ്ണമായ പ്രതിബദ്ധതയോടെ സംസ്ഥാന സർക്കാർ മുന്നേറുകയാണ്. ചെറുന്നിയൂർ പോലെയുള്ള ഗ്രാമങ്ങളിലെ ഈ മുന്നേറ്റം, 'എല്ലാ കുട്ടിക്കും ഗുണമേന്മയുള്ള വിദ്യാഭ്യാസം' എന്ന ലക്ഷ്യത്തെ ശക്തിപ്പെടുത്തുന്നതാണെന്നും അദ്ദേഹം പറഞ്ഞു. പുതിയ തലമുറയുടെ അറിവും കഴിവും ഉയർത്തുന്ന യാത്രയിൽ ഇത്തരത്തിലുള്ള പദ്ധതികൾ കൂടുതൽ സ്‌കൂളുകളിലേക്ക് വ്യാപിപ്പിക്കുമെന്നും മന്ത്രി പറഞ്ഞു.
കില-കിഫ്ബി പ്രൊജക്ടിന്റെ ഭാഗമായി ഒരു കോടി 30 ലക്ഷം രൂപ വിനിയോഗിച്ചാണ് ചെറുന്നിയൂർ സ്‌കൂളിൽ കെട്ടിട നിർമ്മാണം പൂർത്തിയാക്കിയത്.
ഒ.എസ് അംബിക എംഎൽഎ ചടങ്ങിൽ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് ഡി.സുരേഷ് കുമാർ, വർക്കല ബ്ലോക്ക് പഞ്ചായത്ത് പ്രസിഡന്റ് സ്മിത സുന്ദരേശൻ. ചെറുന്നിയൂർ ഗ്രാമപഞ്ചായത്ത് പ്രസിഡന്റ് എസ്.ശശികല, ത്രിതല പഞ്ചായത്ത് അംഗങ്ങൾ, സ്‌കൂൾ അധികൃതർ തുടങ്ങിയവർ പങ്കെടുത്തു.
