കൊച്ചിയിലെ തൊഴില്‍ പീഡന ആരോപണത്തില്‍ പുറത്ത് വന്ന ദൃശ്യങ്ങള്‍ വ്യാജമെന്ന് യുവാക്കള്‍. കെല്‍ട്രോ എന്ന മാര്‍ക്കറ്റിംഗ് സ്ഥാപനത്തിലെ യുവാക്കള്‍ ആണ് പോലീസിനും ലേബര്‍ ഓഫീസര്‍ക്കും മൊഴി നല്‍കിയത്. ഉടമ അവധിയില്‍ പോയപ്പോള്‍ മാനേജറായി ചുമതലയേറ്റ മനാഫ് ആണ് ദൃശ്യങ്ങള്‍ ചിത്രീകരിച്ചതെന്നും യുവാക്കള്‍. മനാഫിനെതിരെ നിയമനടപടി സ്വീകരിക്കുമെന്നും യുവാക്കള്‍ പറഞ്ഞു.
ഉബൈദ് ഇക്കാര്യങ്ങള്‍ അറിഞ്ഞതിന് പിന്നാലെ മനാഫിനെ പുറത്താക്കിയിരുന്നുവെന്ന് യുവാക്കള്‍ പറയുന്നു. പിന്നീടാണ് യുവാക്കളുടെ അനുമതിയില്ലാതെ ദൃശ്യങ്ങള്‍ പുറത്തുവന്നത്. തൊഴില്‍ പീഡനം നടന്നിട്ടില്ലെന്ന് ലേബര്‍ ഓഫീസര്‍ പറഞ്ഞു. വ്യക്തികള്‍ തമ്മിലുള്ള പ്രശ്‌നമെന്ന് വിലയിരുത്തല്‍. ഇക്കാര്യം ചൂണ്ടാക്കാട്ടിയുള്ള റിപ്പോര്‍ട്ട് തൊഴില്‍ വകുപ്പിന് നല്‍കും.
ജീവനക്കാരുടെ മൊഴി രേഖപ്പെടുത്തിയ ശേഷമാണ് റിപ്പോര്‍ട്ട് തയ്യാറാക്കിയത്. ടാര്‍ഗറ്റ് തികയ്ക്കാത്തതിന് ഹിന്ദുസ്ഥാന്‍ പവര്‍ലിങ്ക്‌സ് എന്ന സ്ഥാപനത്തിലെ തൊഴിലാളികളെ ക്രൂരമായി പീഡിപ്പിക്കുന്ന ദൃശ്യങ്ങളായിരുന്നു പുറത്തുവന്നിരുന്നത്. ടാര്‍ഗറ്റ് പൂര്‍ത്തിയാകാത്തവരെ കഴുത്തില്‍ നായ്ക്കള്‍ക്ക് ഉപയോഗിക്കുന്ന ബെല്‍റ്റ് ഇട്ട് നടത്തിക്കുന്ന ദൃശ്യങ്ങളായിരുന്നു പുറത്തുവന്നത്. ടാര്‍ഗറ്റ് നേടാത്തതിന്റെ പേരില്‍ അധികൃതര്‍ ജീവനക്കാരെ ക്രൂരമായി മര്‍ദ്ദിക്കുന്ന തരത്തിലായിരുന്നു ദൃശ്യങ്ങള്‍. വിഡിയോയിലെ സംഭവങ്ങള്‍ തങ്ങളുടെ ഓഫീസില്‍ നടക്കുന്നതല്ല എന്നും ആരോപണങ്ങള്‍ നിഷേധിക്കുന്നുവെന്നും കമ്പനി അധികൃതര്‍ അറിയിച്ചിരുന്നു.
