ന്യൂഡല്‍ഹി: ഇന്ത്യന്‍ റെയില്‍വേ ട്രെയിന്‍ യാത്രക്കാര്‍ക്ക് പുതിയ നിയമങ്ങള്‍ നടപ്പാക്കിയിരിക്കുകയാണ്. ഈ മാറ്റങ്ങള്‍ യാത്രക്കാര്‍ക്ക് കൂടുതല്‍ സൗകര്യം ഉറപ്പാക്കാന്‍ ലക്ഷ്യമിടുന്നു. പുതിയ നിയമങ്ങള്‍ പ്രകാരം, വെയിറ്റിംഗ് ലിസ്റ്റില്‍ ഉള്ള യാത്രക്കാര്‍ക്ക് സ്ലീപ്പര്‍, എസി കോച്ചുകളില്‍ യാത്ര ചെയ്യാന്‍ അനുവാദമില്ല. ഇവര്‍ക്ക് ജനറല്‍ (അണ്‍റിസര്‍വ്ഡ്) കോച്ചുകളില്‍ മാത്രമേ യാത്ര ചെയ്യാന്‍ സാധിക്കൂ.
മെയ് 1 മുതല്‍, വെയിറ്റിംഗ് ലിസ്റ്റ് ടിക്കറ്റുകളുള്ള യാത്രക്കാര്‍ക്ക് സ്ലീപ്പര്‍, എസി കോച്ചുകളില്‍ യാത്ര ചെയ്യാന്‍ അനുവാദമില്ലെന്ന് റെയില്‍വെ അറിയിച്ചിരുന്നു. നേരത്തെ ഓഫ്‌ലൈനായി ടിക്കറ്റെടുക്കുന്നവര്‍ വെയിറ്റിംഗ് ലിസ്റ്റില്‍ യാത്ര ചെയ്തിരുന്നു. എന്നാല്‍, ഇനിമുതല്‍ ഇവര്‍ക്ക് ജനറല്‍ കോച്ചുകളില്‍ മാത്രമേ യാത്ര അനുവദനീയമായിരിക്കൂ. ഈ നിയമം ഓണ്‍ലൈനായോ ഓഫ്ലൈനായോ ബുക്ക് ചെയ്ത ടിക്കറ്റുകള്‍ക്ക് ബാധകമാണ്. റിസര്‍വ്ഡ് കോച്ചുകളില്‍ വെയിറ്റിംഗ് ലിസ്റ്റ് ടിക്കറ്റുമായി യാത്ര ചെയ്യുന്നവര്‍ക്ക് പിഴ ഈടാക്കുകയും അടുത്ത സ്റ്റേഷനില്‍ ഇറക്കിവിടുകയും ചെയ്യും. ഈ നിയമം റിസര്‍വ്ഡ് കോച്ചുകളില്‍ യാത്രക്കാരുടെ തിരക്ക് കുറയ്ക്കാനും കൂടുതല്‍ ഓര്‍ഗനൈസ്ഡ് യാത്രാനുഭവം ഉറപ്പാക്കാനും ലക്ഷ്യമിടുന്നു.
ജൂലൈ 1 മുതല്‍, തത്കാല്‍ ടിക്കറ്റ് ബുക്കിംഗിന് ആധാര്‍ അധിഷ്ഠിത ഒടിപി പരിശോധന നിര്‍ബന്ധമായിട്ടുണ്ട്. തത്കാല്‍ ബുക്കിംഗ് വിന്‍ഡോ തുറക്കുന്ന ആദ്യ 30 മിനിറ്റിനുള്ളില്‍ ഐആര്‍സിടിസി അംഗീകൃത ഏജന്റുമാര്‍ക്ക് ടിക്കറ്റ് ബുക്ക് ചെയ്യാന്‍ അനുവാദമില്ല. എസി കോച്ചുകള്‍ക്ക് രാവിലെ 10:00 മുതല്‍ 10:30 വരെയും, നോണ്‍-എസി കോച്ചുകള്‍ക്ക് 11:00 മുതല്‍ 11:30 വരെയുമാണ് ഈ നിയന്ത്രണം.
ഓണ്‍ലൈന്‍ ലോഗിന്‍ ചെയ്യുന്നവര്‍ ആധാര്‍ നമ്പറുമായി തങ്ങളുടെ അക്കൗണ്ടുകള്‍ ബന്ധിപ്പിക്കണം. ഇതോടെ ഏജന്റുമാര്‍ വ്യാജ ഐഡികളില്‍ നിന്നും കയറി ബുക്ക് ചെയ്യുന്നത് കുറയും. സാധാരണക്കാര്‍ക്ക് ബുക്കിംഗ് എളുപ്പമാവുകയും ചെയ്യും.
സോഷ്യല്‍ മീഡിയയില്‍ ചില യാത്രക്കാര്‍ ഈ പുതിയ സംവിധാനത്തെ സ്വാഗതം ചെയ്തിട്ടുണ്ടെങ്കിലും, എല്ലാ ഡിവിഷനുകളിലും ഇത് ഏകീകൃതമായി നടപ്പാക്കപ്പെടുമോ എന്ന ആശങ്കയും പ്രകടിപ്പിക്കുന്നുണ്ട്. ജനറല്‍ കോച്ചുകളിലെ തിരക്ക് വര്‍ദ്ധിക്കുമോ എന്നും ചിലര്‍ ചോദിക്കുന്നു.
