ഷവോമി 15 അൾട്ര ഫോൺ ഇന്ത്യയിൽ അവതരിപ്പിച്ചു

ചൈനീസ് സ്മാർട്ട്‌ഫോൺ ഭീമൻമാരായ ഷവോമി ഇന്ത്യയിൽ ഷവോമി 15 സീരീസ് സ്മാർട്ട്ഫോണുകൾ അവതരിപ്പിച്ചു. ബാഴ്‌സലോണയിലെ മൊബൈൽ വേൾഡ് കോൺഗ്രസിൽ അവതരിപ്പിച്ച ഷവോമി 15 ഫ്ലാഗ്ഷിപ്പ് സീരീസിൽ ഷവോമി 15, ഷവോമി 15 അൾട്ര എന്നീ രണ്ട് സ്മാർട്ട്ഫോണുകളാണുള്ളത്. ആൻഡ്രോയ്ഡ് 15 അടിസ്ഥാനത്തിലുള്ള ഹൈപ്പർഒഎസ് 2.0 പ്ലാറ്റ്‌ഫോമിൽ കരുത്തുറ്റ സ്നാപ്‌ഡ്രാഗൺ 8 എലൈറ്റ് എസ്ഒസി ചിപ്‌സെറ്റിൽ എത്തിയിരിക്കുന്ന ഫോണുകളുടെ ഫീച്ചറുകളും ഇന്ത്യയിലെ വിലയും വിശദമായി അറിയാം.

ഷവോമി 15

ഷവോമി 15 120Hz റിഫ്രഷ് റേറ്റോടെ 6.36 ഇഞ്ച് അമോലെഡ് ഡിസ്പ്ലെ വാഗ്ദാനം ചെയ്യുന്നു. ഫോണിൻറെ സ്ക്രീൻ-ടു-ബോഡി റേഷ്യോ 94 ശതമാനമാണ്. ആൻഡ്രോയ്ഡ് 15 അടിസ്ഥാനത്തിലുള്ള ഹൈപ്പർഒഎസ് 2.0-യിലാണ് പ്രവർത്തനം. സ്നാപ്‌ഡ്രാഗൺ 8 എലൈറ്റ് പ്രൊസസറിൽ വരുന്ന ഫോണിനൊപ്പം 5,240 എംഎഎച്ച് ബാറ്ററിയും 90 വാട്സ് വയേർഡ്, 50 വാട്സ് വയർലെസ് ചാർജിംഗ് സംവിധാനവുമുണ്ട്. റീയർ ക്യാമറ മൊഡ്യൂളിൽ ട്രിപ്പിൾ-ക്യാമറയാണ് ഷവോമി 15ൽ വരുന്നത്. 50 എംപി ലൈക്ക സമ്മിലക്സ് പ്രധാന ക്യാമറ, 60 എംഎം ലൈക്ക ഫ്ലോട്ടിംഗ് ടെലിഫോട്ടോ ലെൻസ്, 14 എംഎം മുതൽ 120 എംഎം വരെ ഫോക്കൽ ലെങ്തുള്ള അൾട്രാ-വൈഡ് ലെൻസ് എന്നിവ ഉൾപ്പെടുന്നു. 8കെ റെക്കോർഡിംഗും ഡോൾബി വിഷനും ഷവോമി 15നുണ്ട്. സെൽഫിക്കും വീഡിയോ കോളിംഗിനുമായി 32 എംപിയുടേതാണ് സെൽഫി ക്യാമറ. 

ഇൻ-ഡിസ്‌പ്ലെ അൾട്രാസോണിക് ഫിംഗർപ്രിൻറ് സെൻസർ, 5ജി, 4ജി എൽടിഇ, വൈ-ഫൈ-7, ബ്ലൂടൂത്ത്, ജിപിഎസ്, എൻഎഫ്എസ്, യുഎസ്ബി 3.2, ടൈപ്പ്-സി പോർട്ട്, ഐപി68 റേറ്റിംഗ് സുരക്ഷ എന്നിവയാണ് ഷവോമി 15ൻറെ മറ്റ് ഫീച്ചറുകൾ. 

ഷവോമി 15 വില

ഏപ്രിൽ മൂന്ന് മുതൽ ഷവോമി 15 ഫോൺ ഇന്ത്യയിൽ ലഭ്യമാവും. 64,999 രൂപയാണ് വിലത്തുടക്കം. മാർച്ച് 19ന് പ്രീ-ഓർഡർ തുടങ്ങും. 

ഷവോമി 15 അൾട്ര

ഷവോമി 15 അൾട്രയ്ക്കും ക്വാൽകോമിൻറെ ഒക്റ്റ-കോർ സ്നാപ്‌ഡ്രാഗൺ 8 എലൈറ്റ് ചിപ്പാണുള്ളത്. വാനില വേരിയൻറ് ഫോൺ 12 ജിബി വരെ റാമും 512 ജിബി വരെ സ്റ്റോറേജും പിന്തുണയ്ക്കുന്നു. മുന്തിയ ഓപ്ഷൻ 16 ജിബി റാമും 1 ടിബി സ്റ്റോറേജിലുമുള്ളത്. ആൻഡ്രോയ്ഡ് 15 അടിസ്ഥാനത്തിലുള്ള ഹൈപ്പർഒഎസ് 2.0-യിലാണ് പ്രവർത്തനം.  

പ്രൊഫഷണൽ-ഗ്രേഡ് ഫോട്ടോ നിലവാരം അവകാശപ്പെടുന്ന ഷവോമി 15 അൾട്രാ ക്യാമറകൾ ലൈക്കയുമായി ചേർന്നാണ് ഷവോമി നിർമിച്ചിരിക്കുന്നത്. സോണി എൽവൈറ്റി-900 സെൻസറോടെ 51 എംപി ലൈക്ക സമ്മിലക്സ് ക്യാമറ, 50 എംപി അൾട്രാ-വൈഡ് ക്യാമറ, സോണി ഐഎംഎക്സ്858 സെൻസറോടെ ടെലിഫോട്ടോ ക്യാമറ, 200 എംപി ഐസോസെൽ എച്ച്പി9 പെരിസ്‌കോപ്പ് ടെലിഫോട്ടോ ക്യാമറ എന്നിവ റീയർ ക്യാമറയിൽ ഉൾപ്പെടുന്നു. ഷവോമി 15 അൾട്രയിലും 32 എംപിയുടേതാണ് സെൽഫി ക്യാമറ. 6.73 ഇഞ്ച് ഡബ്ല്യൂക്യൂഎച്ച്ഡി+ അമോലെഡ് ഡിസ്പ്ലെ, 3200 നിറ്റ്സ് പീക്ക് ബ്രൈറ്റ്നസ്, 5,410 എംഎഎച്ച് ബാറ്ററി, 90 വാട്സ് വയേർഡ് ചാർജിംഗ്, 80 വാട്സ് വയർലെസ് ഹൈപ്പർചാർജ് എന്നിവയും ഉൾപ്പെടുന്നു. 

ഷവോമി 15 അൾട്ര വില

ഷവോമി 15 അൾട്രയുടെ വില ഇന്ത്യയിൽ 1,09,999 രൂപയിലാണ് ആരംഭിക്കുന്നത്. മാർച്ച് 19 മുതൽ ഷവോമി 15 അൾട്ര മുൻകൂറായി ബുക്ക് ചെയ്താൽ 11,999 രൂപ വിലയുള്ള ഷവോമി 15 അൾട്ര ഫോട്ടോഗ്രാഫി കിറ്റ്- ലെജൻസ് എഡിഷൻ സൗജന്യമായി ലഭിക്കും. ഒരു ഷട്ടർ ബട്ടൺ, ഇർഗോണമിക് ഗ്രിപ്പ്, 2,000 എംഎഎച്ച് അധിക ബാറ്ററി, 67 എംഎം ഫിൽട്ടർ അഡാപ്ട്ടർ റിംഗ് എന്നിവയാണ് ഈ കിറ്റിലുള്ളത്.