ഒഡീഷയില്‍ 20 കാരിയെ കൂട്ടബലാത്സംഗത്തിന് ഇരയാക്കിയ സംഭവത്തില്‍ അറസ്റ്റിലായവരില്‍ നാല് പേര്‍ പ്രായപൂര്‍ത്തിയാകാത്തവരെന്ന് കണ്ടെത്തല്‍. പൊലീസ് അറസ്റ്റ് ചെയ്ത 10 പേരില്‍ നാല് പേര്‍ക്ക് 17വയസ് മാത്രമാണ് പ്രായമെന്ന് പൊലീസ് വിചാരണ സമയത്ത് കോടതിയില്‍ പറഞ്ഞു. കുറ്റകൃത്യത്തിന്റെ ക്രൂരത കണക്കിലെടുത്ത് ഈ നാല് പേരെയും മുതിര്‍ന്നവരായി കണക്കാക്കണമെന്നും കോടതിയില്‍ പൊലീസ് ആവശ്യപ്പെട്ടു. പ്രതികളില്‍ രണ്ട് പേരെ പൊലീസ് അറസ്റ്റ് ചെയ്തത് ബെംഗളൂരുവിലേക്കും സൂറത്തിലേക്കും രക്ഷപ്പെടാന്‍ ശ്രമിക്കുന്നതിനിടെയായിരുന്നുവെന്ന് പൊലീസ് വ്യക്തമാക്കി.
ഒഡിഷയിലെ ഗഞ്ചാം ജില്ലയില്‍ ഗേപാല്‍പുര്‍ കടല്‍ത്തീരത്ത് നടക്കുന്ന രാജ ഉത്സവത്തില്‍ പങ്കെടുക്കുവാന്‍ എത്തിയ 20കാരിയെയാണ് അതിക്രൂരമായി 10പേര്‍ ചേര്‍ന്ന് കഴിഞ്ഞ ദിവസം പീഡനത്തിനിരയാക്കിയത്. ഒപ്പമുണ്ടായിരുന്ന ആണ്‍സുഹൃത്തിനെ കെട്ടിയിട്ടായിരുന്നു സംഭവം.
കേസില്‍ കൂടുതല്‍ പ്രതികളുണ്ടോ എന്ന കാര്യം പരിശോധിച്ചുവരികയാണ്. ബീച്ചിലെ ഒഴിഞ്ഞ സ്ഥലത്ത് ഇരുന്ന യുവാവിന്റെയും യുവതിയുടെയും അടുത്തേക്ക് മൂന്ന് ബൈക്കുകളിലായി 10പേരങ്ങുന്ന സംഘം എത്തുകയായിരുന്നു. തുടര്‍ന്ന് ഇവരുടെ ഫോട്ടോ എടുക്കുമെന്ന് പറഞ്ഞ് ഭീഷണിപ്പെടുത്തുകയും ആണ്‍സുഹൃത്തിനെ കെട്ടിയിടുകയുമായിരുന്നു. യുവതിയെ ഇവര്‍ പിന്നീട് അടുത്തുള്ള ആളൊഴിഞ്ഞ വീട്ടിലേക്ക് കൊണ്ട് പോയി ബലാത്സംഗത്തിനിരയാക്കുകയായിരുന്നു. യുവതിയും സുഹൃത്തും പിന്നീട് പോലീസ് സ്റ്റേഷനിലെത്തി പരാതി നല്‍കിയതോടെയാണ് സംഭവം പുറം ലോകം അറിയുന്നത്.