ട്രെയിനില്‍ യാത്ര ചെയ്യുകയായിരുന്ന യുവതിയെ കാണാനില്ലെന്ന പരാതിയില്‍ അന്വേഷണം. മധ്യപ്രദേശിലെ കത്‌നിയിലാണ് സംഭവം. 28കാരിയായ അര്‍ച്ചന തിവാരിയെയാണ് കാണാതായത്. ട്രെയിനില്‍ യുവതിയെ ബാഗ് കണ്ടെത്തിയിട്ടുണ്ട്.
ഇന്‍ഡോര്‍ - ബിലാസ്പൂര്‍ നര്‍മദ എക്സ്പ്രസ് ട്രെയിനിലാണ് സംഭവം. അര്‍ച്ചന ജുഡീഷ്യല്‍ സര്‍വീസസ് പരീക്ഷയ്ക്കായി തയ്യാറെടുക്കുകയായിരുന്നു. ഇതിനായി ഇന്‍ഡോറിലാണ് താമസിച്ചിരുന്നത്. ട്രെയിനില്‍ ബി3 കോച്ചിലെ യാത്രക്കാരിയായിരുന്നു. ഓഗസ്റ്റ് ഏഴിന് രാവിലെ വീട്ടിലേക്ക് പുറപ്പെട്ട ഇവര്‍ സ്വദേശമായ കത്‌നി റെയില്‍വെ സ്റ്റേഷനില്‍ ഇറങ്ങിയില്ല.
മകള്‍ പുറത്തിറങ്ങാത്തത് കണ്ട് സംശയം തോന്നിയ ബന്ധുക്കള്‍ ട്രെയിനിന്റെ അടുത്ത സ്റ്റോപ്പായ ഉമരിയയിലുള്ള ബന്ധുക്കളോട് ട്രെയിനില്‍ പരിശോധന നടത്താന്‍ ആവശ്യപ്പെട്ടു. ഇവിടെ വച്ച് പരിശോധന നടത്തിയിട്ടും യുവതിയെ കണ്ടെത്താനായില്ല. പിന്നീലെ റെയില്‍വെ പൊലീസിനെ വിവരമറിയിച്ചു. ട്രെയിന്‍ ഭോപ്പാല്‍ വിട്ട സമയത്ത് മകളോട് സംസാരിച്ചതാണെന്നും പിന്നീട് ഫോണ്‍ സ്വിച്ച് ഓഫായെന്നും ബന്ധുക്കള്‍ പൊലീസിനോട് പറഞ്ഞു.
ഭോപ്പാലിനടുത്തുള്ള റാണി കമലാപതി സ്റ്റേഷനില്‍ യുവതിയെ കണ്ടവരുണ്ട്. എന്നാല്‍ ഭോപ്പാല്‍ പിന്നിട്ട ശേഷം യുവതിയെ ആരും കണ്ടിട്ടില്ല. യുവതിയെ കാണാനില്ലെന്ന പരാതിയില്‍ പൊലീസ് അന്വേഷണം തുടരുകയാണ്. സിസിടിവി ദൃശ്യങ്ങളും മൊബൈല്‍ ഫോണ്‍ ലൊക്കേഷനും കേന്ദ്രീകരിച്ചാണ് അന്വേഷണം.