സജീവ ഉപഭോക്താക്കളുടെ എണ്ണം വർധിപ്പിക്കുന്നതിൽ ഭാരതി എയർടെൽ ഒന്നാമതെന്ന് ട്രായ് . ട്രായ് ഫെബ്രുവരിയിൽ പുറത്തുവിട്ട കണക്ക് പ്രകാരം 14.4 ലക്ഷം സജീവ ഉപഭോക്താക്കളെയാണ് എയർടെലിന് ലഭിച്ചത്. ജിയോയ്ക്ക് ഫെബ്രുവരിയിൽ 3.8 ലക്ഷം പേരെ മാത്രമാണ് അധികമായി ലഭിച്ചത്. ഇതോടെ എയർടെലിന്റെ ആകെ സജീവ ഉപഭോക്താക്കളുടെ എണ്ണം 38.81 കോടി ആയി ഉയർന്നു. എന്നാൽ, ആകെ പ്രതിമാസ സജീവ ഉപഭോക്താക്കളുടെ എണ്ണത്തിൽ ജിയോ തന്നെയാണ് മുന്നിൽ.
അതേസമയം വോഡഫോൺ ഐഡിയയുടെ സജീവ ഉപഭോക്താക്കളുടെ എണ്ണത്തിൽ ഫെബ്രുവരിയിലും കുറവ് രേഖപ്പെടുത്തി.17.53 കോടിയാണ് വിഐയുടെ ആകെ സജീവ ഉപഭോക്താക്കളുടെ എണ്ണം. സർക്കാർ ഉടമസ്ഥതയിലുള്ള ബിഎസ്എൻഎല്ലി ന് 20.2 ലക്ഷം സജീവ ഉപഭോക്താക്കളെ അധികമായി ലഭിച്ചു. ഇതോടെ ആകെ സജീവ ഉപഭോക്താക്കളുടെ എണ്ണം 5.83 കോടിയായി ഉയർന്നു. ജിയോയേക്കാൾ വേഗത്തിലാണ് എയർടെലും ബിഎസ്എൻഎലും കഴിഞ്ഞമാസം സജീവ ഉപഭോക്താക്കളുടെ എണ്ണം വർധിപ്പിച്ചത്.
താരിഫ് നിരക്ക് വർധനവായിരിക്കാം ജിയോയുടെ ഉപഭോക്താക്കളുടെ എണ്ണത്തെ ബാധിച്ചതെന്നാണ് വിലയിരുത്തൽ. ജിയോ തന്നെയാണ് ഇന്ത്യൻ വിപണിയിലെ ഏറ്റവും വലിയ ടെലികോം സേവനദാതാവ്. 40.52 ശതമാനം ആണ് ജിയോയുടെ വിപണി വിഹിതം. എയർടെൽ 33.67 ശതമാനം വോഡഫോൺ ഐഡിയ 17.84 ശതമാനം, ബിഎസ്എൻഎൽ 7.89 ശതമാനം വിപണി വിഹിതവും കയ്യേറി.
