ഇന്ത്യയിലെ പോസ്റ്റ്പെയ്ഡ് ഉപയോക്താക്കൾക്കായി ഇന്റർനാഷണൽ റോമിംഗ് പ്ലാനില്‍ അപ്ഡേഷനുമായി എയര്‍ടെല്‍.10 ദിവസം വാലിഡിറ്റിയോടെ വരുന്ന 2,999 രൂപയുടെ റോമിംഗ് പ്ലാൻ പരിധിയില്ലാത്ത ഡാറ്റ ആക്‌സസാണ് ഇപ്പോള്‍ വാഗ്ദാനം ചെയ്യുന്നത്. എന്നാല്‍ 5ജിബി എന്ന എഫ്യുപി പരിധിയോടെയാണിത്. എന്നിരുന്നാലും, പ്ലാനിനുള്ളിലെ ഹൈ-സ്പീഡ് ഡാറ്റ ഉപയോഗ പരിധി എയർടെൽ ഇപ്പോൾ ഇരട്ടിയാക്കിയിട്ടുണ്ട്. പ്ലാൻ തെരഞ്ഞെടുക്കുന്ന ഉപയോക്താക്കൾക്ക് ഇപ്പോൾ 10ജിബി ഹൈ-സ്പീഡ് ഡാറ്റ ലഭിക്കും, അതിനുശേഷം ഡാറ്റ ഉപയോഗത്തിന് നിരക്ക് ഈടാക്കുന്നതായിരിക്കും.
2,999 രൂപയുടെ എയർടെൽ പോസ്റ്റ്പെയ്ഡ് ഇന്റർനാഷണൽ റോമിംഗ് പായ്ക്ക് 10 ദിവസത്തെ വാലിഡിറ്റിയോടെയാണ് വരുന്നത്. ഇത് പ്രതിദിനം ആകെ 20 സൗജന്യ എസ്എംഎസും 100 മിനിറ്റ് കോൾ സമയവും വാഗ്ദാനം ചെയ്യുന്നുണ്ട്. ഇൻകമിംഗ്, ഔട്ട്‌ഗോയിംഗ്, ലോക്കൽ, ഇന്ത്യയിലേക്കുള്ള കോളുകൾ എന്നിവ ഇതിൽ ഉൾപ്പെടുന്നുണ്ട്. 2,999 രൂപയുടെ എയർടെൽ പോസ്റ്റ്പെയ്ഡ് ഐആർ പായ്ക്ക്, യുണൈറ്റഡ് അറബ് എമിറേറ്റ്സ് (യുഎഇ), സൗദി അറേബ്യ തുടങ്ങിയ ഗൾഫ് രാജ്യങ്ങൾ ഉൾപ്പെടെ ലോകമെമ്പാടുമുള്ള 189 രാജ്യങ്ങളിൽ സാധുതയുള്ളതാണ്. ഉപയോക്താവ് ഇന്ത്യയ്ക്ക് പുറത്തുള്ള ഒരു രാജ്യത്ത് എത്തുമ്പോൾ പ്ലാൻ ആക്ടിവേറ്റാകും.
അതേസമയം, 2,999 രൂപയുടെ എയർടെൽ ഐആർ പായ്ക്ക് ഇൻ-ഫ്ലൈറ്റ് ആനുകൂല്യങ്ങളില്ലാത്ത ചുരുക്കം ചില പോസ്റ്റ്പെയ്ഡ് ഐആർ പായ്ക്കുകളിൽ ഒന്നാണ്. നിലവിൽ അത്തരത്തിലുള്ള മറ്റൊരു പ്ലാൻ 648 രൂപയുടെ ഒരു ദിവസത്തെ പായ്ക്ക് മാത്രമാണ്. അതായത് ഉപയോക്താക്കൾക്ക് ഒരു വിമാനത്തിൽ കോളിംഗ്, സന്ദേശമയയ്ക്കൽ അല്ലെങ്കിൽ ഡാറ്റ ആനുകൂല്യങ്ങൾ ലഭിക്കുന്നില്ല എന്നര്‍ഥം.