തിരുവനന്തപുരം: ബ്രെഡ് പാക്കറ്റിൽ എംഡിഎംഎ ഒളിപ്പിച്ച് കടത്തിയ സംഭവത്തിൽ പ്രധാന പ്രതിയേയും കൂട്ടാളിയേയും ബെംഗളൂരുവിൽ നിന്ന് പൊലീസ് പിടികൂടി. കൊല്ലം മുതുകുളം സ്വദേശി നന്ദു (24 ), ഇയാളുടെ കൂട്ടാളിയായ കോഴിക്കോട് സ്വദേശി അഫാൻ (23) എന്നിവരാണ് തിരുവനന്തപുരം കാട്ടാക്കട പൊലീസിന്റെ പിടിയിലായത്.
അതേസമയം കാട്ടാക്കട പൊലീസ് സ്റ്റേഷനിലെ പത്തോളം കേസുകളിലെ പ്രതിയായ വിഷ്ണു എന്നയാളുടെ വീട്ടിൽ നിന്നും കഴിഞ്ഞ മാസം 23നാണ് എംഡിഎംഎ കണ്ടെത്തിയത്. ഇയാളുടെ സുഹൃത്തായ പൂജപ്പുര സ്വദേശി അനൂപ് എന്നയാളും അന്ന് കൂടെ പിടിയിലായിരുന്നു. ഇരുവരെയും ചോദ്യം ചെയ്തപ്പോൾ ബെംഗളൂരുവിൽ നിന്നാണ് ഇവർ എംഡിഎംഎ കേരളത്തിൽ എത്തിക്കുന്നതെന്ന വിവരം പൊലീസിന് ലഭിച്ചിരുന്നു. ഏഴ് ബ്രെഡ് പാക്കറ്റുകളായിരുന്നു പ്രതികളിൽ നിന്ന് കണ്ടെത്തിയത്. ബെംഗളൂരുവിൽ നിന്നും ബ്രെഡ് പാക്കറ്റ് വാങ്ങി അതിലാണ് ഇവർ എംഡിഎംഎ കടത്തിക്കൊണ്ട് വന്നത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.