ആവശ്യമായ ചേരുവകൾ
കറിവേപ്പില – 50 ഗ്രാം
വാളൻ പുളി – 30 ഗ്രാം
എണ്ണ – 1/4 കപ്പ് + 3 ടേബിൾ സ്‌പൂൺ
ഉലുവ – 1 ടേബിൾ സ്‌പൂൺ
ചെറിയ ജീരകം – 1/2 ടീസ്‌പൂൺ
കടലപരിപ്പ് – 2 ടേബിൾ സ്‌പൂൺ
വെളുത്തുള്ളി – 15 എണ്ണം
മുളകുപൊടി – 4 ടേബിൾ സ്‌പൂൺ
മഞ്ഞൾപ്പൊടി – 1 ടീസ്‌പൂൺ
കടുക് – 1 ടേബിൾ സ്‌പൂൺ
ഇഞ്ചി ചെറുതായി അരിഞ്ഞത് – 2 ടേബിൾ സ്‌പൂൺ
വെളുത്തുള്ളി – 20 അല്ലി തൊലി കളഞ്ഞത്
കാന്താരി മുളക് – 15 ഗ്രാം
കായപ്പൊടി – 1/2 ടീസ്‌പൂൺ
ഉപ്പ് – ആവശ്യത്തിന്
ശർക്കര പൊടിച്ചത് – 2 ടേബിൾ സ്‌പൂൺ
വിനാഗിരി – 3 ടേബിൾ സ്‌പൂൺ
തയ്യാറാക്കുന്ന വിധം
കഴുകി വൃത്തിയാക്കിയ ശേഷം കറിവേപ്പില വെള്ളം കളഞ്ഞ് ഉണക്കി വെയ്ക്കുക. അതിനു ശേഷം കുരു കളഞ്ഞ വാളൻപുളി ഒരു കപ്പ് തിളച്ച വെള്ളത്തിൽ കുതിർക്കുക. ഇനി ഒരു പാത്രം എടുക്കുക, ശ്രദ്ധിക്കുക അടി കട്ടിയുള്ള പാത്രം വേണം ഉപയോഗിക്കാൻ. പാത്രം ചൂടായ ശേഷം 3 ടേബിൾ സ്‌പൂൺ എണ്ണ ഒഴിക്കാം.
എണ്ണ ചൂടായി കഴിയുമ്പോൾ ഉലുവ, ജീരകം, കടലപ്പരിപ്പ് എന്നിവ ചേർക്കുക. അതിനുശേഷം വെളുത്തുള്ളി കൂടി ചേർത്ത് വഴറ്റിയെടുക്കുക. ഇനി ഇതിലേക്ക് കഴുകി ഉണക്കി വെച്ചിരിക്കുന്ന കറിവേപ്പില ചേർത്ത് യോജിപ്പിച്ചെടുക്കാം.
കറിവേപ്പില നന്നായി മൊരിഞ്ഞ് കഴിയുമ്പോൾ മുളക് പൊടിയും മഞ്ഞൾ പൊടിയും ചേർക്കുക. നന്നായി ഇത് മിക്സ് ചെയ്ത് കഴിഞ്ഞാൽ അടുപ്പിൽ നിന്നും മാറ്റാം. അതിനു ശേഷം ഇത് ഒരു മിക്സിയിലിട്ട് അരക്കുക.
അരച്ചെടുത്ത കൂട്ടിലേക്ക് പുളി പിഴിഞ്ഞ വെള്ളം ചേർക്കുക. ഇനി ചീനച്ചട്ടിയിൽ കാൽ കപ്പ് എണ്ണയൊഴിച്ച് കടുക് പൊട്ടിച്ചെടുക്കുക. ഇതിലേക്ക് ഇഞ്ചിയും വെളുത്തുള്ളിയും കാന്താരി മുളകും അൽപം കറിവേപ്പിലയും ചേർത്ത് വീണ്ടും വഴറ്റിയെടുക്കുക. അതിനുശേഷം കായപ്പൊടി ചേർത്ത് ഇളക്കി യോജിപ്പിക്കുക.
ഇനി ഇതിലേക്ക് നേരത്തെ തയ്യാറാക്കി വെച്ചിരിക്കുന്ന കറിവേപ്പില മിശ്രിതം കൂടി ചേർക്കുക. ആവശ്യത്തിന് ഉപ്പ്, രണ്ട് ടേബിൾ സ്‌പൂൺ ശർക്കര പൊടി, വിനാഗിരി എന്നിവ കൂടി ചേർത്താൽ ഇത് അടുപ്പിൽ നിന്ന് മാറ്റാം. കറിവേപ്പില അച്ചാർ തയ്യാർ.
