ആവശ്യമായ സാധനങ്ങൾ
ഫ്രഷ്‌ കറിവേപ്പില – 40 -60 ഗ്രാം
വാളൻ പുളി കുരു കളഞ്ഞത് – 30 ഗ്രാം
ഉലുവ – 1 ടേബിൾ സ്‌പൂൺ
എള്ളെണ്ണ – 1/4 കപ്പ് + 3 ടേബിൾ സ്‌പൂൺ
ചെറിയ ജീരകം – 1/2 ടീസ്‌പൂൺ
വെളുത്തുള്ളി – 15 എണ്ണം
കടലപരിപ്പ് – 2 ടേബിൾ സ്‌പൂൺ
മുളകുപൊടി – 4 ടേബിൾ സ്‌പൂൺ
മഞ്ഞൾപ്പൊടി – 1 ടീസ്‌പൂൺ
ഇഞ്ചി ചെറുതായി അരിഞ്ഞത് – 2 ടേബിൾ സ്‌പൂൺ
വെളുത്തുള്ളി – 20 അല്ലി തൊലി കളഞ്ഞത്
കടുക് – 1 ടേബിൾ സ്‌പൂൺ
കാന്താരി മുളക് – 15 ഗ്രാം
കായപ്പൊടി – 1/2 ടീസ്‌പൂൺ
ഉപ്പ് – ആവശ്യത്തിന്
വിനാഗിരി – 3 ടേബിൾ സ്‌പൂൺ
ശർക്കര പൊടിച്ചത് – 2 ടേബിൾ സ്‌പൂൺ
തയ്യാറാക്കുന്ന വിധം
കറിവേപ്പില നന്നായി കഴുകി വൃത്തിയാക്കി വെള്ളം ഉണക്കി മാറ്റി വയ്ക്കുക. ഒരു കപ്പ് തിളച്ച വെള്ളത്തിലേക്ക് വാളൻ പുളിയിട്ട് കുതിര്‍ത്തി വയ്ക്കുക.ശേഷം അടി കട്ടിയുള്ള ഒരു പാത്രം ചൂടാക്കി 3 ടേബിൾ സ്‌പൂൺ എണ്ണ ഒഴിക്കുക. ഇത് ചൂടായി വരുമ്പോൾ ഉലുവ, ജീരകം, കടലപ്പരിപ്പ് എന്നിവ ചേർക്കുക. ഇവ നന്നായി മൂത്തു വരുമ്പോൾ തൊലി കളഞ്ഞ വെളുത്തുള്ളി ചേർത്ത് വഴറ്റാം. ഇതിലേക്ക് കറിവേപ്പില ചേർത്ത് നന്നായി യോജിപ്പിച്ചെടുക്കുക.
കറിവേപ്പില നന്നായി മൊരിഞ്ഞ് വരുമ്പോൾ മുളക് പൊടിയും മഞ്ഞൾ പൊടിയും ചേർത്ത് വഴറ്റുക. നന്നായി വഴറ്റിയതിന് ശേഷം ഇത് അടുപ്പില്‍ നിന്നും മാറ്റി വയ്ക്കുക. തണുത്തതിന് ശേഷം ഒരു മിക്‌സി ജാറിലേക്ക് ആക്കുക. ഇതിലേക്ക് പുളി പിഴിഞ്ഞ വെള്ളം ചേർത്ത് അരച്ചെടുക്കുക.
ഇനി ഒരു ചീനച്ചട്ടിയില്‍ കാൽ കപ്പ് എണ്ണ ഒഴിച്ച്, ചൂടായി വരുമ്പോൾ കടുക് പൊട്ടിച്ച് ചെറുതായി അരിഞ്ഞ ഇഞ്ചിയും തൊലി കളഞ്ഞ വെളുത്തുള്ളിയും ചേർത്ത് വഴറ്റിയെടുക്കാം. കാന്താരി മുളകും അൽപം കറിവേപ്പിലയും ചേർത്ത് വീണ്ടും വഴറ്റുക.
ഇതിലേക്ക് കായപ്പൊടി ചേർത്ത് ഇളക്കി യോജിപ്പിക്കാം. ശേഷം നേരത്തെ അരച്ചെടുത്ത കറിവേപ്പില മിശ്രിതം കൂടി ചേർത്ത് നന്നായി മിക്‌സ് ചെയ്യുക. ഇനി ആവശ്യത്തിന് ഉപ്പ്, രണ്ട് ടേബിൾ സ്‌പൂൺ ശർക്കര, വിനാഗിരി എന്നിവ കൂടി ചേർത്ത് യോജിപ്പിച്ച് അടുപ്പില്‍ നിന്നും ഇറക്കിവയ്ക്കാം. വായിൽ കപ്പലോടുന്ന രുചിയിൽ കറിവേപ്പില അച്ചാർ തയാർ.
