കുഴലപ്പം; രുചിയൂറും നാലുമണി പലഹാരം

ആവശ്യമുള്ള സാധനങ്ങൾ

അരിപ്പൊടി-അഞ്ച് കപ്പ്
തേങ്ങ ചിരകിയത്-രണ്ട് കപ്പ്
ചുവന്നുള്ളി-15 അല്ലി
വെളുത്തുള്ളി-എട്ട് അല്ലി
ജീരകം-ഒരു ടീസ്പൂൺ
കട്ടി തേങ്ങാപാൽ-ഒരു കപ്പ്
ഉപ്പ്-ഒരു ടീസ്പൂൺ
എള്ള്-രണ്ട് ടേബിൾ സ്പൂൺ
വെള്ളം-ആവസ്യത്തിന്
വെളിച്ചെണ്ണ- വറുക്കാൻ ആവശ്യത്തിന്

തയ്യാറാക്കുന്ന വിധം

തേങ്ങ പൊടിയായി ചിരവിയെടുക്കണം. അരിപ്പൊടിയും തേങ്ങ ചിരവിയതും കട്ടിയില്ലാതെ കുഴച്ച് ഒരു മണിക്കൂർ വയ്ക്കുക. ജീരകം വെളുത്തുള്ളി, ചുവന്നുള്ളി ഇവ നന്നായി അരയ്ക്കുക. തേങ്ങാപാലിൽ ഉപ്പ് ചേർക്കുക. ചുവടുകട്ടിയുള്ള പാത്രത്തിൽ അരിപ്പൊടി ചേർത്ത് കുറഞ്ഞ തീയിൽ മൂന്ന് മിനിറ്റ് ഇളക്കി ചൂടാക്കുക. ഇതിലേക്ക് തേങ്ങാപാൽ ചേർത്ത് ആവി വരുന്നതുവരെ ചൂടാക്കുക. അടുപ്പിൽനിന്ന് വാങ്ങി എള്ള് ചേർക്കുക. പാകത്തിന് വെള്ളം ചേർത്ത് കുഴച്ച് മയമുള്ള മാവ് ചേർക്കുക.

ഇത് നനഞ്ഞ തുണിവച്ച് മൂടി ഒരു മണിക്കൂർ വയ്ക്കുക. ഒരിഞ്ച് വലിപ്പമുള്ള ഉരുളകൾ മാവിൽനിന്ന് അടർത്തിയെടുത്ത് രണ്ട് വാഴയിലയുടെ ഇടയിൽവച്ച് പരത്തുക. ഓരോ ഉരുളകളും നാലിഞ്ച് വട്ടത്തിൽ പരത്തുക. ഒരു മരത്തവിയിൽ എണ്ണ പുരട്ടി ഓരോ വട്ടവും കുഴലപ്പത്തിന്റെ ആകൃതിയിൽ ആക്കിയെടുക്കുക. എണ്ണ നന്നായി ചൂടായ ശേഷം തയാറാക്കിയ മാവ് ചേർത്ത് വറുത്തെടുക്കുക. മൊരിഞ്ഞ് ഇളം ബ്രൗൺ നിറമാകണം. ടിഷ്യൂപേപ്പറിൽ നിരത്തി എണ്ണ വലിഞ്ഞ ശേഷം ടിന്നുകളിലാക്കി സൂക്ഷിക്കാം