ഭാര്യയും ഭര്‍ത്താവും തമ്മിലുള്ള തര്‍ക്കത്തില്‍ പൊലിഞ്ഞത് കുരുന്ന് ജീവന്‍. പൂനെയിലെ വഖാരി ഗ്രാമത്തിലാണ് സംഭവം. വീട്ടില്‍ സൂക്ഷിച്ചിരുന്ന ത്രിശൂലം ഉപയോഗിച്ച് സ്ത്രീ ഭര്‍ത്താവിനെ ആക്രമിക്കാന്‍ ശ്രമിക്കുമ്പോള്‍ അബദ്ധത്തില്‍ മറ്റൊരു യുവതിയുടെ കയ്യിലിരുന്ന കുട്ടിയുടെ ദേഹത്ത് തറയ്ക്കുകയും ജീവന്‍ നഷ്ടമാവുകയുമായിരുന്നു. പല്ലവി മെന്‍ഗാവാഡെയും ഭര്‍ത്താവ് നിതിന്‍ മെന്‍ഗാവാഡെയും തമ്മിലാണ് തര്‍ക്കമുണ്ടായത്. പെട്ടെന്നുണ്ടായ ദേഷ്യത്തില്‍ പല്ലവി വീട്ടിലെ പൂജാമുറിയില്‍ നിന്ന് ത്രിശൂലം എടുത്ത് ഭര്‍ത്താവിന് നേരെ വീശി.
എന്നാല്‍ നിതിന്റെ സഹോദരഭാര്യയുടെ കയ്യിലിരുന്ന 11 മാസം പ്രായമുള്ള കുഞ്ഞിന്റെ വയറില്‍ അബദ്ധത്തില്‍ തറയ്ക്കുകയായിരുന്നു. സംഭവസ്ഥലത്തുവെച്ചുതന്നെ കുഞ്ഞ് മരിച്ചു. ഗ്രാമവാസികള്‍ പൊലീസില്‍ വിവരം അറിയിക്കുകയും പല്ലവിയെയും നിതിനെയും കസ്റ്റഡിയിലെടുക്കുകയും ചെയ്തു.പൊലീസ് മനഃപൂര്‍വമല്ലാത്ത നരഹത്യയ്ക്ക് കേസെടുത്തു. ദമ്പതികളെ കോടതിയില്‍ ഹാജരാക്കും.
