സ്ത്രീകളെ കബളിപ്പിച്ച് പണം തട്ടിയ കേസില് പ്രവാസി അറസ്റ്റില്. ഹവല്ലി ഗവര്ണറേറ്റ് ക്രിമിനല് ഇന്വെസ്റ്റിഗേഷന് വിഭാഗത്തിലെ ഉദ്യോഗസ്ഥരാണ് ഒരു പ്രവാസി തട്ടിപ്പുകാരനെ പിടികൂടിയത്.ഇയാളുടെ തട്ടിപ്പ് രീതി കൃത്യമായ ആസൂത്രണത്തോടെയുള്ളതായിരുന്നു.
വാട്ട്സ്ആപ്പ് വഴി ഉയര്ന്ന ബ്രാന്ഡഡ് ഹാന്ഡ്ബാഗുകളുടെ ആകര്ഷകമായ ഫോട്ടോകള് അയക്കുകയും പ്രത്യേക കിഴിവുകള് വാഗ്ദാനം ചെയ്യുകയും ചെയ്യും. പണം ഇലക്ട്രോണിക് ട്രാന്സ്ഫര് വഴി കൈക്കലാക്കിയ ശേഷം വ്യാജ ഉല്പ്പന്നങ്ങള് നല്കി മുങ്ങുകയായിരുന്നു പതിവ്. ഒരു യുവതി പരാതി നല്കിയതോടെയാണ് വഞ്ചന, കബളിപ്പിക്കല് എന്നീ കുറ്റങ്ങള് ചുമത്തി രജിസ്റ്റര് ചെയ്ത ഈ കേസിന് തുടക്കമായത്.
പ്രമുഖ ആഗോള ബ്രാന്ഡുകളുടെ സ്ത്രീകളുടെ ഹാന്ഡ്ബാഗുകള് വില്ക്കുന്നതിനെക്കുറിച്ചുള്ള ഒരു പരസ്യം സോഷ്യല് മീഡിയയില് കണ്ടാണ് യുവതി വില്പ്പനക്കാരനെ ബന്ധപ്പെട്ടത്. തുടര്ന്ന് ഇയാള് പ്രീമിയം ഹാന്ഡ്ബാഗുകളുടെ മികച്ച ചിത്രങ്ങള് അയച്ചു. എല്ലാം യഥാര്ത്ഥമെന്ന് തോന്നിപ്പിക്കുന്നവയായിരുന്നു. താന് തിരഞ്ഞെടുത്ത ഹാന്ഡ്ബാഗിന് 650 ദിനാര് നല്കാന് സമ്മതിച്ച യുവതി, മൊബൈല് വഴി പണം ട്രാന്സ്ഫര് ചെയ്തു. എന്നാല് സാധനം ലഭിച്ചപ്പോള് അത് വ്യാജമാണെന്ന് മനസ്സിലാക്കുകയും തട്ടിപ്പിന് ഇരയാവുകയുമായിരുന്നു.
