തിയേറ്റര്‍ റിലീസിന് ശേഷം മണിക്കൂറുകള്‍ക്ക് ഉള്ളില്‍ തന്നെ സിനിമയുടെ വ്യാജ പതിപ്പ് പുറത്തു ഇറങ്ങുന്നത് പതിവ് കാഴ്ചയാണ്. ഇപ്പോഴിതാ വ്യാജ പതിപ്പുകളുമായി പാകിസ്ഥാന്‍ വെബ്‌സൈറ്റ് ഇന്ത്യയില്‍ സജീവമായിരിക്കുകയാണ്. തിയേറ്ററില്‍ പ്രദര്‍ശനം തുടരുന്ന മലയാള ചിത്രങ്ങളായ ലോക, ഹൃദയപൂര്‍വ്വം തുടങ്ങിയ സിനിമകളും കോളിവുഡ്, ബോളിവുഡ്, ഹോളിവുഡിലെ പുത്തന്‍ ചിത്രങ്ങളും പാക് സൈറ്റില്‍ ഉണ്ട്. സിനിമകളുടെ വ്യാജ പതിപ്പുകള്‍ മികച്ച ക്വാളിറ്റിയിലാണ് ഈ വെബ്സൈറ്റുകളില്‍ ലഭ്യമാകുന്നത്.
ആര്‍ക്കും സൗജന്യമായി കാണാന്‍ കഴിയും വിധമാണ് വെബ്‌സൈറ്റ് സജ്ജീകരിച്ചിരിക്കുന്നത്. ഗൂഗിളില്‍ ഡോട്ട് കോം എന്ന ഡൊമൈനില്‍ കവര്‍ ചിത്രമടക്കം ഓരോ സിനിമകളുടെയും വിവരങ്ങള്‍ കാണാം. തുടര്‍ന്ന് സൈറ്റ് അഡ്രസ് പരിശോധിച്ചാല്‍ അത് ഡോട്ട് പി കെ (.pk) എന്നതിലേക്ക് മാറും. ഈ വെബ്സൈറ്റില് ഭാഷകള്‍ തരം തിരിച്ച് നൂറുകണക്കിന് പുതിയ സിനിമകളുടെ വ്യാജ പതിപ്പുകളുണ്ട്. ടെലിഗ്രാം വഴിയാണ് വെബ്‌സൈറ്റിന്റെ ലിങ്ക് വ്യാപകമായി പ്രചരിപ്പിക്കുന്നത് എന്നാണ് വിവരം.
ലോകയുടെ മലയാളം പതിപ്പ് കൂടാതെ തമിഴ്, ഹിന്ദി വ്യാജ പതിപ്പുകളും സൈറ്റില്‍ ഉണ്ട്. കഴിഞ്ഞ ദിവസം പുറത്തിറങ്ങിയ മദ്രാസി സിനിമയുടെ അടക്കം വ്യാജന്‍ സൈറ്റില്‍ ഉണ്ട്. നിര്‍മ്മാതാക്കള്‍ക്ക് വലിയ നഷ്ടമുണ്ടാക്കുന്നതാണ് ഈ നീക്കം.
