ടെക്‌സസിലെ മിന്നല്‍ പ്രളയത്തില്‍ മരിച്ചവരുടെ എണ്ണം 104 ആയി. കേര്‍ കൗണ്ടിയില്‍ മാത്രം മരിച്ചത് 84 പേരാണ്. ഇവരില്‍ 28 പേര്‍ കുട്ടികളാണ്. 24 പേരെ ഇപ്പോഴും കണ്ടെത്താനുണ്ട്. ക്യാമ്പ് മിസ്റ്റിക്കിലെ 10 കുട്ടികളും ഒരു കൗണ്‍സലറും ഇതില്‍ ഉള്‍പ്പെടുന്നു. കാണാതായവര്‍ക്കായി തെരച്ചില്‍ തുടരുകയാണ്. ടെക്‌സസിന്റെ മധ്യ മേഖലയില്‍ ഇന്നും മഴക്ക് സാധ്യതയുണ്ടെന്നാണ് വിവരം.
ഞെട്ടിക്കുന്ന ദൃശ്യങ്ങളാണ് ടെക്‌സസില്‍ നിന്ന് പുറത്തുവരുന്നത്. ഗുവാഡലൂപ്പ് നദി 45 മിനിറ്റിനുള്ളില്‍ 26 അടിയിലധികമാണ് ഉയര്‍ന്നത്. ഇത് സ്ഥിതി അതീവ ഗുരുതരമാക്കി. പ്രദേശങ്ങളില്‍ ഫ്‌ലാഷ് ഫ്‌ലഡ് മുന്നറിയിപ്പുകള്‍ ഇപ്പോഴും നിലവിലുണ്ട്.
കെര്‍ കൗണ്ടിയിലെ ക്രിസ്ത്യന്‍ ക്യാമ്പില്‍ നിരവധി കുടുംബങ്ങള്‍ ട്രെയിലര്‍ വീടുകള്‍ക്കുള്ളില്‍ കുടുങ്ങുകയും ആളുകള്‍ വെള്ളത്തില്‍ ഒഴുകിപ്പോകുകയും ചെയ്തു. ഏകദേശം രണ്ട് ഡസനോളം ക്യാമ്പംഗങ്ങളെക്കുറിച്ച് ഇപ്പോഴും വിവരമില്ലെന്ന് അധികൃതര്‍ വ്യക്തമാക്കി. കാണാതായവരുടെ എണ്ണം ഇനിയും വര്‍ധിക്കാനാണ് സാധ്യത.
പുറത്തുവരുന്ന വീഡിയോകളില്‍ ഭീകര കാഴ്ചകളാണുള്ളത്. വീടുകള്‍ നിന്നിരുന്ന സ്ഥലങ്ങളില്‍ കോണ്‍ക്രീറ്റ് തറകള്‍ മാത്രം ബാക്കിയായിരിക്കുന്നു. പുഴയുടെ തീരങ്ങളില്‍ കെട്ടിടാവശിഷ്ടങ്ങള്‍ കൂമ്പാരമായി കിടക്കുന്നു. രക്ഷാപ്രവര്‍ത്തകര്‍ വീടുകളുടെ മേല്‍ക്കൂരകളില്‍ നിന്നും മരങ്ങളില്‍ നിന്നും ആളുകളെ രക്ഷിക്കുന്നു. വീടുകളും കാറുകളും ഒഴുകി നടക്കുന്നതും പലയിടത്തായി കെട്ടിടാവശിഷ്ടങ്ങള്‍ അടിഞ്ഞുകൂടിയതും ദൃശ്യങ്ങളിലുണ്ട്.