കൊച്ചി: രാജ്യദ്രോഹ കേസില്‍ സംവിധായകനും ബിഗ് ബോസ് വിജയിയുമായ അഖില്‍ മാരാരെ അറസ്റ്റ് ചെയ്യരുതെന്ന് ഹൈക്കോടതി. ബിജെപിയുടെ പരാതിയില്‍ കൊട്ടാരക്കര പോലീസ് രജിസ്റ്റര്‍ ചെയ്ത കേസിലാണ് അറസ്റ്റില്‍ നിന്നും സംരക്ഷണം നല്‍കിയത്.
അഖില്‍ മാരാര്‍ ഈ മാസം 11ാം തീയതി രാത്രി 9 മണിയോടെ രാജ്യദ്രോഹപരമായ പരാമര്‍ശങ്ങള്‍ അടങ്ങുന്ന ഫേസ്ബുക്ക് ലൈവ് ചെയ്‌തെന്ന് ആരോപിച്ചാണ് കൊട്ടാരക്കര പോലീസ് കൊട്ടാരക്കര ബിജെപിയുടെ പരാതിയില്‍ കേസ് രജിസ്റ്റര്‍ ചെയ്തത്. ഭാരതീയ ന്യായ സംഹിത സെക്ഷന്‍ 152 ജാമ്യമില്ലാ വകുപ്പ് പ്രകാരമാണ് കേസ് രജിസ്റ്റര്‍ ചെയ്തിരുന്നത്.
മെയ് 10ന് അഖില്‍ മാരാര്‍ തന്റെ ഫേസ്ബുക്ക് അക്കൗണ്ടില്‍ ഇന്ത്യ പാക്കിസ്ഥാന്‍ യുദ്ധം സംബന്ധിച്ച് ഇന്ദിരാ ഗാന്ധിയുടെയും നരേന്ദ്രമോദിയുടെ നയതന്ത്ര ഇടപെടലുകള്‍ സംബന്ധിച്ച് താരതമ്യപ്പെടുത്തി ഫേസ്ബുക്ക് ലൈവ് പബ്ലിഷ് ചെയ്തിരുന്നു. ഇതിനെ പരിഹസിച്ച് ജനം ടിവി അവതാരകന്‍ അനില്‍ കെ നമ്പ്യാര്‍ നടത്തിയ പരാമര്‍ശങ്ങള്‍ക്ക് മറുപടിയായാണ് അഖില്‍ 11 ആം തീയതി ഫേസ്ബുക്ക് ലൈവില്‍ പ്രസിദ്ധീകരിച്ചത്. അഖിലിന്റെ പ്രസ്താവനകളെ വളച്ചൊടിച്ച് സര്‍ക്കാരിനെതിരെ വൈരാഗ്യവും വിദ്വേഷവും തോന്നിക്കുന്ന ലൈവ് ആണ് അഖില്‍ പറഞ്ഞത് എന്നാരോപിച്ചാണ് ബിജെപി കൊട്ടാരക്കര മണ്ഡലം കമ്മിറ്റി അഖിലിനെതിരെ പരാതി സമര്‍പ്പിച്ചത്.
എന്നാല്‍ അഖില്‍ ഒരു ഇന്ത്യന്‍ പൗരന് അനുവദിച്ച് തന്നിട്ടുള്ള തന്റെ അഭിപ്രായം സ്വാന്ത്രന്ത്യം വിനിയോഗിക്കുക മാത്രമാണ് ചെയ്തത് എന്നും ബഹുമാനപ്പെട്ട സുപ്രീം കോടതി എസ് ജി വോംബാത്ക്കറെ (SG Vombathkere VS Union of India) കേസില്‍ റദ്ദാക്കിയ 124 എ ഐപിസി യുടെ മറ്റൊരു രൂപം മാത്രമാണ് ഭാരതീയ ന്യായ സംഹിതയിലെ സെക്ഷന്‍ 154 എന്നും അഖില്‍ മാരാര്‍ക്ക് വേണ്ടി ഹൈക്കോടതിയില്‍ ഹാജരായ അഡ്വ വിമല ബിനു വാദിച്ചു. കൂടാതെ രാജ്യത്തിന്റെ ഐക്യത്തിന്റെയും അഖണ്ഡതയും വിരുദ്ധമായി ഒന്നും തന്നെ അഖിലിന്റെ ഫേസ്ബുക്ക് ലൈവില്‍ ഉണ്ടായിരുന്നില്ലെന്നും പ്രധാനമന്ത്രി നരേന്ദ്ര മോദിയുടെ നയതന്ത്ര നീക്കങ്ങളെ മുന്‍ പ്രധാനമന്ത്രി ഇന്ദിരാ ഗാന്ധിയുടെ നയതന്ത്ര മികവിനെ വെച്ച് താരതമ്യം ചെയ്തതിനെ തുടര്‍ന്നുള്ള രാഷ്ട്രീയ പക പോക്കലിന്റെ ഭാഗമായി കെട്ടിച്ചമച്ച കേസ് മാത്രമാണിതെന്നും അഡ്വ വിമല ബിനു കൂട്ടിച്ചേര്‍ത്തു. ഭരണഘടന ഉറപ്പ് നല്‍കുന്ന അഭിപ്രായ സ്വാതന്ത്ര്യത്തിന്റെ പരിധിയില്‍ നിന്ന് കൊണ്ടാണ് അഖിലിന്റെ പ്രസ്താവന എന്ന് നിരീക്ഷിച്ച കോടതി അറസ്റ്റില്‍ നിന്ന് അഖില്‍ മാരാര്‍ക്ക് ഇടക്കാല സംരക്ഷണം നല്‍കി ഉത്തരവ് നല്‍കി.