കൊച്ചി: പള്ളുരുത്തിയിലെ സെന്റ് റീത്താസ് പബ്ലിക് സ്‌കൂളില്‍ ഒരു മുസ്ലിം വിദ്യാര്‍ത്ഥിനി ഹിജാബ് ധരിച്ചെത്തിയതിനെ തുടര്‍ന്ന് ക്ലാസിലേക്ക് പ്രവേശിക്കാന്‍ അനുവദിക്കാതിരുന്ന സംഭവം വിവാദമായി മാറിയിരിക്കുകയാണ്.
സ്‌കൂള്‍ മാനേജ്‌മെന്റ് യൂണിഫോം നിയമങ്ങള്‍ കര്‍ശനമായി പാലിക്കണമെന്ന് നിലപാടെടുത്തപ്പോള്‍, രക്ഷിതാക്കളും ചില മുസ്ലിം സംഘടനകളും പ്രതിഷേധിച്ചു. ഇതേതുടര്‍ന്ന് സ്‌കൂള്‍ രണ്ട് ദിവസത്തേക്ക് അടച്ചിട്ട് പൊലീസ് സുരക്ഷ ഏര്‍പ്പെടുത്തി. സംഭവം വിദ്യാഭ്യാസ സ്ഥാപനങ്ങളിലെ യൂണിഫോം നിയമങ്ങളും മതസ്വാതന്ത്ര്യവും തമ്മിലുള്ള തര്‍ക്കം വീണ്ടും ചര്‍ച്ചയാക്കിയിരിക്കുകയാണ്. യൂണിഫോം എല്ലാവര്‍ക്കും ഒരുപോലെ ബാധകമാണെന്നും സ്‌കൂള്‍ നിയമങ്ങള്‍ പാലിക്കേണ്ടത് അനിവാര്യമാണെന്നും കോടതി വിധികള്‍ വ്യക്തമാക്കുന്നുണ്ട്.
അഡ്മിഷന്‍ സമയത്ത് എല്ലാ രക്ഷിതാക്കളും അംഗീകരിച്ച യൂണിഫോം പോളിസിയാണ് അനുസരിക്കേണ്ടതെന്ന് സ്‌കൂള്‍ അധികൃതര്‍ പറയുന്നു. നിര്‍ദ്ദിഷ്ട യൂണിഫോമിന് പുറമെ മറ്റൊന്നും അനുവദിക്കില്ല. കുട്ടി നേരത്തെ ഹിജാബ് ധരിച്ചെത്തിയപ്പോള്‍ സ്‌കൂള്‍ താക്കീത് നല്‍കിയിരുന്നു. ഇതിനുശേഷം 4 മാസത്തോളം ഹിജാബ് ധരിക്കാതെയാണ് സ്‌കൂളിലെത്തിയത്. എന്നാല്‍, കഴിഞ്ഞദിവസം കുട്ടി വീണ്ടും ഹിജാബ് ധരിച്ച് എത്തിയതോടെയാണ് അധികൃതര്‍ക്ക് കര്‍ശന നടപടി എടുക്കേണ്ടിവന്നത്.
രക്ഷിതാക്കള്‍ ഇത് ചോദ്യം ചെയ്തതോടെ, ചില മുസ്ലിം സംഘടനകള്‍ ഇടപെട്ടു. ഇത് സ്‌കൂളില്‍ പ്രതിഷേധങ്ങള്‍ക്ക് വഴിയൊരുക്കി. 2022-ല്‍ കോഴിക്കോട് പ്രൊവിഡന്‍സ് സ്‌കൂളില്‍ ഹിജാബ് നിരോധിച്ചതിനെതിരെ പ്രതിഷേധിച്ച 12 എസ്‌ഐഒ പ്രവര്‍ത്തകര്‍ അറസ്റ്റിലായിരുന്നു. ഇത്തരം സംഭവങ്ങള്‍ മതസംഘടനകളുടെ ഇടപെടലുകളാല്‍ സങ്കീര്‍ണമാകാറുണ്ട്.
വിദ്യാഭ്യാസ സ്ഥാപനങ്ങളില്‍ യൂണിഫോം നിര്‍ബന്ധമാക്കുന്നത് സാമ്പത്തിക-സാമൂഹിക വ്യത്യാസങ്ങള്‍ ഇല്ലാതാക്കി തുല്യത ഉറപ്പാക്കാനാണ്. ഒരു കുട്ടിക്ക് മാത്രം ഇളവ് നല്‍കിയാല്‍ അത് മറ്റുള്ളവരുടെ അവകാശങ്ങളെ ബാധിക്കുമെന്നാണ് സ്‌കൂളുകളുടെ വാദം. കൊച്ചി സംഭവത്തില്‍ സ്‌കൂള്‍ മാനേജ്‌മെന്റ് ഇതേ നിലപാടാണ് സ്വീകരിച്ചത്.
സ്‌കൂളുകള്‍ക്ക് സ്വന്തം യൂണിഫോം പോളിസി നിശ്ചയിക്കാനുള്ള അവകാശമുണ്ട്, പ്രത്യേകിച്ച് പ്രൈവറ്റ് സ്ഥാപനങ്ങള്‍ക്ക്. അഡ്മിഷന്‍ സമയത്ത് ഇത് അംഗീകരിക്കുന്ന രക്ഷിതാക്കള്‍ പിന്നീട് ചോദ്യം ചെയ്യുന്നത് ന്യായമല്ല.
ഇന്ത്യന്‍ കോടതികള്‍ ഹിജാബ് വിവാദങ്ങളില്‍ വ്യക്തമായ നിലപാടുകള്‍ സ്വീകരിച്ചിട്ടുണ്ട്. 2022-ല്‍ കര്‍ണാടക ഹൈക്കോടതി ഹിജാബ് 'അനിവാര്യ മതാചാരമല്ല' എന്ന് വിധിച്ചു, സ്‌കൂള്‍ യൂണിഫോം നിയമങ്ങള്‍ ബാധകമാക്കി. കേരളത്തില്‍ 2019-ല്‍ ഹൈക്കോടതി സ്‌കൂള്‍ നിഖാബ് നിരോധനം ശരിവെച്ചിരുന്നു. ഈ വിധികള്‍ സ്‌കൂളുകള്‍ക്ക് യൂണിഫോം കര്‍ശനമാക്കാനുള്ള അധികാരം നല്‍കുന്നു.
യൂണിഫോം തുല്യതയും അച്ചടക്കവും ഉറപ്പാക്കുമ്പോള്‍, മുസ്ലിം സംഘടനകളുടെ ഇടപെടലുകള്‍ പ്രശ്‌നങ്ങള്‍ സങ്കീര്‍ണമാക്കുന്നു. സ്‌കൂള്‍ നിയമങ്ങള്‍ പാലിക്കാന്‍ കഴിയാത്തവര്‍ അവര്‍ക്ക് താത്പര്യമുള്ള സ്‌കൂളുകളിലേക്ക് മാറുന്നതാണ് ഉചിതം. മതസ്വാതന്ത്ര്യം പ്രധാനമാണെങ്കിലും, വിദ്യാഭ്യാസം തടസ്സപ്പെടുത്തുന്ന രീതിയില്‍ സംഘടനകള്‍ ഇടപെടരുത്.
