ബംഗ്ലാദേശില്‍ ഹിന്ദു നേതാവിനെ തട്ടിക്കൊണ്ടുപോയി ക്രൂരമായി മര്‍ദ്ദിച്ച് കൊലപ്പെടുത്തിയതായി റിപ്പോര്‍ട്ട്. ദിനാജ്പൂരിലെ ബിരാല്‍ ഉപാസിലയിലാണ് സംഭവം. പ്രദേശത്തെ ഹിന്ദു സമൂഹത്തിലെ നേതാവായിരുന്നു ഭാബേഷ് ചന്ദ്ര എന്നയാളാണ് കൊല്ലപ്പെട്ടത്. ഇദ്ദേഹം ബംഗ്ലാദേശ് പൂജ ഉദ്ജപന്‍ പരിഷത്തിന്റെ ബിരാല്‍ യൂണിറ്റിന്റെ വൈസ് പ്രസിഡന്റായിരുന്നു.
വ്യാഴാഴ്ച രണ്ട് മോട്ടോര്‍ സൈക്കിളുകളില്‍ എത്തിയ നാല് പേര്‍ ഭാബേഷിനെ അവരുടെ വീട്ടില്‍ നിന്ന് തട്ടിക്കൊണ്ടുപോയി.
അക്രമികള്‍ ഭാബേഷിനെ നരബാരി ഗ്രാമത്തിലേക്ക് കൊണ്ടുപോകുന്നതും അവിടെ വെച്ച് ക്രൂരമായി മര്‍ദ്ദിക്കുന്നതും കണ്ടതായി നിരവധി സാക്ഷികള്‍ പറഞ്ഞു. വൈകുന്നേരം അക്രമികള്‍ ഭാബേഷിന്റെ അബോധാവസ്ഥയില്‍ വീട്ടിലെത്തിച്ചു. ഉടന്‍ തന്നെ അദ്ദേഹത്തെ ബിരാല്‍ ഉപജില ഹെല്‍ത്ത് കോംപ്ലക്‌സിലേക്ക് കൊണ്ടുപോയി. തുടര്‍ന്ന്, അദ്ദേഹത്തെ ദിനാജ്പൂര്‍ മെഡിക്കല്‍ കോളേജ് ആശുപത്രിയിലേക്ക് മാറ്റി. അവിടെ എത്തിയപ്പോഴേക്കും മരിച്ചതായി ഡോക്ടര്‍മാര്‍ അറിയിച്ചു. സംഭവത്തില്‍ ഉള്‍പ്പെട്ട പ്രതികളെ തിരിച്ചറിയാനും അറസ്റ്റ് ചെയ്യാനും ഊര്‍ജിതമായ അന്വേഷണം നടത്തുന്നുണ്ടെന്ന് പൊലീസ് അറിയിച്ചു.
