നിരോധിത സമയങ്ങളില്‍ മീന്‍ പിടിക്കുന്നവരെ പിടികൂടിയാല്‍ 5,000 ദിനാര്‍ വരെ വലിയ പിഴ ചുമത്തുമെന്ന് പരിസ്ഥിതി സംരക്ഷണ വിഭാഗം ഡയറക്ടര്‍ ബ്രിഗേഡിയര്‍ ജനറല്‍ മിഷാല്‍ അല്‍-ഫറാജ്. കുവൈത്തിന്റെ പരിസ്ഥിതി സംരക്ഷിക്കുന്നതില്‍ വകുപ്പ് ഊര്‍ജിതമായാണ് പ്രവര്‍ത്തിക്കുന്നത്. പരിസ്ഥിതി ലംഘനങ്ങള്‍ക്കുള്ള പിഴകള്‍, മറ്റ് ഏജന്‍സികളുമായുള്ള വകുപ്പിന്റെ സഹകരണ ശ്രമങ്ങള്‍, രാജ്യത്തുടനീളം പരിസ്ഥിതി സംരക്ഷണം നിലനിര്‍ത്തുന്നതില്‍ നേരിടുന്ന വെല്ലുവിളികള്‍ എന്നിവയുള്‍പ്പെടെ നിരവധി പ്രധാന വിഷയങ്ങള്‍ അല്‍-ഫറാജ് പരാമര്‍ശിച്ചു.
ചര്‍ച്ച ചെയ്ത ഏറ്റവും പ്രധാനപ്പെട്ട വിഷയങ്ങളിലൊന്ന് പരിസ്ഥിതി ലംഘനങ്ങളുടെ വര്‍ധിച്ചുവരുന്ന എണ്ണവും അവ തടയുന്നതിനുള്ള നിയമങ്ങളുടെ നടപ്പാക്കലുമാണ്. പരിസ്ഥിതി നിയമം ലംഘിക്കുന്നവരെ പിടികൂടുന്നതിന് പരിസ്ഥിതി പോലീസ്, ജനറല്‍ ഡയറക്ടറേറ്റ് ഓഫ് കോസ്റ്റ് ഗാര്‍ഡുമായി സഹകരിച്ച് ശ്രമങ്ങള്‍ ശക്തമാക്കുകയാണെന്ന് ബ്രിഗേഡിയര്‍ അല്‍ ഫറാജ് വ്യക്തമാക്കി. വിവരങ്ങള്‍ കൈമാറുന്നതിലൂടെയും സംയുക്ത പരിശോധന പര്യടനങ്ങളിലൂടെയും കുറ്റവാളികളെ ബന്ധപ്പെട്ട അധികാരികള്‍ക്ക് കൈമാറുന്നതിലൂടെയുമാണ് ഇത് സാധ്യമാക്കുന്നതെന്നും അദ്ദേഹം കൂടിച്ചേര്‍ത്തു.
പൊതു ഇടങ്ങളിലെ പുകവലി നിയന്ത്രിക്കുന്നതിലും വകുപ്പ് ജാഗ്രത പുലര്‍ത്തുന്നു. അടച്ചിട്ട വാണിജ്യ ഇടങ്ങളില്‍ പുകവലിക്കുന്നതിന് 500 ദിനാര്‍ വരെ പിഴ ചുമത്തും, അതേസമയം പാര്‍ക്കിങ് സ്ഥലങ്ങളിലും വിമാനത്താവളങ്ങളിലും പുകവലിക്കുന്നതിന് സമാനമായി പിഴ ചുമത്തും. ശരിയായ ലൈസന്‍സില്ലാതെ പുകവലി അനുവദിക്കുന്ന സ്ഥാപനങ്ങള്‍ക്ക് 1,000 ദിനാര്‍ വരെ പിഴ ചുമത്തും. മാളുകള്‍, വിമാനത്താവളങ്ങള്‍ തുടങ്ങിയ അടച്ചിട്ടതും പകുതി അടച്ചതുമായ സ്ഥലങ്ങളില്‍ പുകവലിക്കുന്നത് നിയമലംഘനമായി കണക്കാക്കപ്പെടുന്നു, പുകവലിക്കാര്‍ക്ക് 50 മുതല്‍ 500 ദിനാര്‍ വരെ പിഴ ചുമത്തും. നിയുക്തമല്ലാത്ത സ്ഥലങ്ങളില്‍ സിഗരറ്റ് കുറ്റികള്‍ ഉപേക്ഷിക്കുന്നവര്‍ക്കും മാലിന്യം വലിച്ചെറിയുന്നതിന് 500 ദിനാര്‍ വരെ പിഴ ചുമത്താം.
