യാത്രക്ക് ഗൂഗിൾ മാപ്പിനെ വിശ്വസിച്ച് മുന്നോട്ട് പോകുന്നവരാണ് നമ്മളിൽ പലരും. അവൻ പറയുന്നത് എന്തും കണ്ണും പൂട്ടി വിശ്വസിക്കുന്ന നമ്മളെ ഇവൻ ചിലപ്പോൾ കുഴിയിൽ ചാടിക്കാനും സാധ്യതയുണ്ട്. ചിലയിടങ്ങളിൽ ചെന്നാൽ മാപ്പിന് പിന്നെ അനക്കം ഉണ്ടാവില്ല, സംഭവം ഇന്റർനെറ്റ് കണക്ഷൻ പോകുന്നതാവാം. എന്നാൽ അതൊരു കാട്ടുവഴിയിലോ അല്ലെങ്കിൽ ആരുമില്ലാത്ത ഇടങ്ങളിലോ ആണെങ്കിൽ ? പെട്ടുപോവില്ലേ.. ? എന്നാൽ ആ പേടിയ്ക്ക് വിട പറഞ്ഞോളൂ.. ഓഫ്‌ലൈനായിരിക്കുമ്പോഴും മാപ്പ് ഉപയോഗിക്കാൻ സഹായിക്കുന്ന ഒരു സവിശേഷ സംവിധാനം ഗൂഗിൾ മാപ്പ് വാഗ്ദാനം ചെയ്യുന്നുണ്ട്.
ഇന്റർനെറ്റ് ഇല്ലാതെ ഗൂഗിൾ മാപ്പ് ഉപയോഗിക്കാൻ ചെയ്യേണ്ടത്..
1: ആൻഡ്രോയിഡിലും iOS-ലും ഒരു ഓഫ്ലൈൻ ഫീച്ചർ ഗൂഗിൾ മാപ്സ് വാഗ്ദാനം ചെയ്യുന്നുണ്ട്. ഇത് ഉപയോഗിക്കാൻ ആദ്യം നിങ്ങളുടെ ഡിവൈസിൽ ഗൂഗിൾ മാപ്പിന്റെ ആപ്പ് തുറക്കുക.
2: ഇന്റർനെറ്റുമായി കണക്റ്റ് ചെയ്തിട്ടുണ്ടെന്നും ഇൻകോഗ്‌നിറ്റോ മോഡ് ഉപയോഗിക്കുന്നില്ലെന്നും ഉറപ്പാക്കുക.
3: സ്‌ക്രീനിന്റെ മുകളിൽ വലത് കോണിലുള്ള നിങ്ങളുടെ പ്രൊഫൈൽ ചിത്രത്തിൽ ടാപ്പ് ചെയ്യുക.
4: മെനുവിൽ നിന്ന് ‘ഓഫ്ലൈൻ മാപ്പുകൾ’ തിരഞ്ഞെടുക്കുക, തുടർന്ന് ‘നിങ്ങളുടെ സ്വന്തം മാപ്പ് തിരഞ്ഞെടുക്കുക’.
5: ഇപ്പോൾ നീല നിറത്തിലുള്ള ഒരു ബോക്‌സുള്ള മാപ്പ് ദൃശ്യമാകും. നിങ്ങൾ ഡൗൺലോഡ് ചെയ്യാൻ ആഗ്രഹിക്കുന്ന ഏരിയയ്ക്ക് അനുയോജ്യമായ രീതിയിൽ മാപ്പ് ക്രമീകരിക്കുക. അല്ലെങ്കിൽ സൂം ചെയ്യുക.
6: ഏരിയ സജ്ജീകരിച്ചുകഴിഞ്ഞാൽ, സ്‌ക്രീനിന്റെ താഴെയുള്ള ഡൗൺലോഡ് ബട്ടണിൽ ടാപ്പ് ചെയ്യുക.
7: നിങ്ങളുടെ ഡൗൺലോഡ് ചെയ്ത മാപ്പ് ആപ്പിലെ ഓഫ്ലൈൻ മാപ്പ് ലഭ്യമാകും. ഈ ലമയത്ത് ഓൺലൈനിൽ ചെയ്യുന്നതുപോലെ ഇന്റർനെറ്റ് കണക്ഷൻ ഇല്ലാതെയും ഇത് ആക്സസ് ചെയ്യാൻ കഴിയും.
