ഓപ്പറേഷന്‍ സിന്ദൂറിന് ശേഷം പാകിസ്താന്‍ നടത്തിയ ശക്തമായ ഷെല്ലാക്രമണത്തിന് തിരിച്ചടി നല്‍കിയ അതിര്‍ത്തി സുരക്ഷാ സേനയെ (ബിഎസ്എഫ്) പ്രകീര്‍ത്തിച്ച് കേന്ദ്ര ആഭ്യന്തര മന്ത്രി അമിത് ഷാ. ഈ നാശനഷ്ടങ്ങളില്‍ നിന്ന് പാകിസ്താന്‍ കരകയറാന്‍ വര്‍ഷങ്ങളെടുക്കുമെന്നും അമിത് ഷാ വ്യക്തമാക്കി. ബിഎസ്എഫിന്റെ തിരിച്ചടിയെ പ്രശംസിച്ച അമിത് ഷാ, ജമ്മു അതിര്‍ത്തിയിലെ 118-ലധികം പാകിസ്താന്‍ പോസ്റ്റുകള്‍ സൈന്യം നശിപ്പിക്കുകയോ കേടുപാടുകള്‍ വരുത്തുകയോ ചെയ്തതായും പറഞ്ഞു. ബിഎസ്എഫ് ശത്രുവിന്റെ നിരീക്ഷണ ശൃംഖല തകര്‍ത്തുവെന്നും അത് നന്നാക്കാന്‍ വര്‍ഷങ്ങളെടുക്കുമെന്നും അമിത് ഷാ കൂട്ടിച്ചേര്‍ത്തു.
'നമ്മുടെ അതിര്‍ത്തികളെയും ജനവാസ പ്രദേശങ്ങളെയും ആക്രമിച്ചുകൊണ്ട് പാകിസ്താന്‍ നമ്മുടെ ഭീകരവിരുദ്ധ പ്രവര്‍ത്തനങ്ങള്‍ക്ക് മറുപടി നല്‍കിയപ്പോള്‍ തിരിച്ചടിച്ചത് ജമ്മു അതിര്‍ത്തിയിലെ ബിഎസ്എഫ് ജവാന്മാരാണ്. 118-ലധികം പോസ്റ്റുകള്‍ നശിപ്പിക്കുകയും നാശനഷ്ടങ്ങള്‍ വരുത്തുകയും ചെയ്തുകൊണ്ടായിരുന്നു തിരിച്ചടി. ശത്രുവിന്റെ മുഴുവന്‍ നിരീക്ഷണ സംവിധാനവും അവര്‍ ഓരോന്നായി തകര്‍ത്തു. അത് പുനര്‍നിര്‍മ്മിക്കാന്‍ അവര്‍ക്ക് നാലോ അഞ്ചോ വര്‍ഷമെടുക്കും', അമിത് ഷാ പറഞ്ഞു. പാകിസ്താന്റെ ആശയവിനിമയ സംവിധാനങ്ങള്‍ക്കും നിരീക്ഷണ ഉപകരണങ്ങള്‍ക്കും ഏറ്റവും വലിയ ആഘാതം നേരിട്ടുവെന്നും കുറച്ചു കാലത്തേക്ക് പൂര്‍ണ്ണമായ വിവരാധിഷ്ഠിത യുദ്ധം നടത്താന്‍ അവര്‍ക്ക് കഴിയില്ലെന്നുമാണ് ബിഎസ്എഫ് ഡയറക്ടര്‍ ജനറലില്‍ നിന്ന് ലഭിച്ച വിവരങ്ങളെന്നും അമിത് ഷാ വ്യക്തമാക്കി.
'സമാധാനകാലത്ത് പോലും നിങ്ങള്‍ ജാഗ്രത പാലിച്ചിരുന്നുവെന്ന് ഇത് തെളിയിക്കുന്നു. നിങ്ങളുടെ കൃത്യമായ ബുദ്ധിശക്തിയുടെ അടിസ്ഥാനത്തില്‍, കൃത്യമായ ഒരു തിരിച്ചടി തന്ത്രം മുന്‍കൂട്ടി തയ്യാറാക്കിയിരുന്നു. അവസരം ലഭിച്ചപ്പോള്‍, നിങ്ങള്‍ അത് വിജയകരമായി നടപ്പിലാക്കി'', ബിഎസ്എഫിനെ പ്രശംസിച്ച് അമിത് ഷാ പറഞ്ഞു. ഇന്ത്യയുടെ അതിര്‍ത്തികളില്‍ സംഘടിതമായോ അസംഘടിതമായോ, രഹസ്യമായതോ പരസ്യമായതോ ആയ എന്ത് ആക്രമണം ഉണ്ടാകുമ്പോഴെല്ലാം ആദ്യം ആഘാതം ഏല്‍ക്കുന്നത് നമ്മുടെ ബിഎസ്എഫ് ജവാന്മാരാണ്. എന്നാല്‍ അതിര്‍ത്തി എവിടെയാണെന്ന് അവര്‍ ഒരിക്കലും ചിന്തിക്കുന്നില്ല. രാജ്യത്തോടുള്ള അഭിമാനവും, ഹൃദയത്തില്‍ ദേശസ്നേഹവും, പരമമായ ത്യാഗത്തോടുള്ള അഭിനിവേശവും ഉണ്ടാകുമ്പോള്‍ മാത്രമേ അത്തരം ധൈര്യം ഉയര്‍ന്നുവരൂ. അപ്പോഴാണ് അത്തരം ഫലങ്ങള്‍ സാധ്യമാകുന്നതെന്നും അമിത് ഷാ കൂട്ടിച്ചേര്‍ത്തു. മരുഭൂമികള്‍, പര്‍വതങ്ങള്‍, വനങ്ങള്‍, ദുര്‍ഘടമായ ഭൂപ്രദേശങ്ങള്‍ എന്നിവിടങ്ങളിലെല്ലാം അചഞ്ചലമായ സമര്‍പ്പണത്തോടെ പ്രവര്‍ത്തിക്കുന്ന ബിഎസ്എഫ് ഇന്ത്യയുടെ ഒന്നാം പ്രതിരോധ നിരയായി തുടര്‍ന്നും പ്രവര്‍ത്തിക്കുമെന്നും അമിത് ഷാ വ്യക്തമാക്കി.
