കോട്ടയം: ഈരാറ്റുപേട്ടയിൽ കാപ്പ കേസ് പ്രതിയെ പിടികൂടാനെത്തിയ പൊലീസുകാരന് കുത്തേറ്റു. ഈരാറ്റുപേട്ട പൊലീസ് സ്റ്റേഷനിലെ സിപിഓ ശ്രീജേഷിനാണ് കുത്തേറ്റത്. കാപ്പാ കേസ് പ്രതി അബ്ദുൾ ഹക്കീമാണ് കുത്തിയത്. വീട്ടിലെ കറിക്കത്തി ഉപയോഗിച്ചാണ് അബ്ദുൾ ഹക്കീം ശ്രീജേഷിനെ കുത്തിയത്. ശ്രീജേഷിനെ ആശുപത്രിയിൽ പ്രവേശിപ്പിച്ചിരിക്കുകയാണ്. പരിക്ക് സാരമുള്ളതല്ലെന്നാണ് വിവരം. അബ്ദുൾ ഹക്കീമിനെ പൊലീസ് അറസ്റ്റ് ചെയ്തു.
ഈ മാസമാണ് അബ്ദുൾ ഹക്കീമിനെതിരെ കാപ്പ ചുമത്തിയത്. ഇയാളെ കസ്റ്റഡിയിലെടുക്കുന്നതിന് വേണ്ടിയാണ് പൊലീസ് സംഘം വീട്ടിലെത്തിയത്. ഔദ്യോഗിക കൃത്യനിർവഹണത്തിനിടെ പൊലീസുകാരെ ആക്രമിച്ച് പരിക്കേൽപ്പിച്ചതിന് അബ്ദുൾ ഹക്കീമിനെതിരെ പുതിയ കേസെടുക്കും.
