കോഴിക്കോട്: താമരശ്ശേരിയിൽ കെഎസ്ആർടിസി ബസിൽ നിന്നും തെറിച്ച് വീണ യാത്രക്കാരിക്ക് പരിക്ക്. ബസ് സഡൻ ബ്രേക്ക് ഇട്ടത്തിന് പിന്നാലെയാണ് യാത്രക്കാരി തെറിച്ചുവീണത്. അപകടത്തിൽ ഇവരുടെ തലയ്ക്കും കൈക്കും പരിക്കേറ്റു. ഇവരെ താമരശേരി താലൂക്ക് ആശുപത്രിയിൽ പ്രവേശിപ്പിച്ചു. കോതമംഗലത്ത് നിന്ന് ബത്തേരിയിലേക്ക് പോവുകയായിരുന്നു കെഎസ്ആർടിസി ബസിൽ നിന്നാണ് യാത്രക്കാരി തെറിച്ച് വീണത്. താമരശ്ശേരി താലൂക്ക് ആശുപത്രിക്ക് മുന്നിൽ വെച്ചായിരുന്നു അപകടം.
കുന്നമംഗലം മുതൽ കെഎസ്ആർടിസി ബസിനെ മറികടക്കാനായി ഒരു സ്വകാര്യ ബസ് ശ്രമം നടത്തുന്നുണ്ടായിരുന്നു. താമരശ്ശേരിയിലെത്തിയപ്പോൾ അമിത വേഗത്തിലെത്തിയ ഇതേ സ്വകാര്യ ബസ് ഓവർ ടേക്ക് ചെയ്തപ്പോഴാണ് കെഎസ്ആർടിസി ബസ് സഡൻ ബ്രേക്കിട്ടത്. ഈ സമയത്ത് യാത്രക്കാരി ബസിൽ നിന്നും തെറിച്ച് വീഴുകയായിരുന്നു. കെഎസ്ആർടിസിയുടെ ഡോർ അടച്ചിരുന്നതിനാൽ വലിയ അപകടമാണ് ഒഴിവായത്. ആദ്യം താമരശേരി താലൂക്ക് ആശുപത്രിയിൽ എത്തിച്ച യാത്രക്കാരിയെ പിന്നീട് കോഴിക്കോട് മെഡിക്കൽ കോളേജിലേക്ക് മാറ്റി.