തന്തൂരി ചിക്കൻ വീട്ടിൽ തന്നെ ഉണ്ടാക്കാം

ആവശ്യമുള്ള സാധനങ്ങൾ

ചിക്കൻ – 1 കിലോ ചിക്കൻ

കട്ടിത്തൈര് – ½ കപ്പ് .

കശ്മീരി മുളകുപൊടി – 2 -3 ടേബിൾസ്പൂൺ

മഞ്ഞൾപ്പൊടി – ½ ടീസ്പൂൺ

ഇഞ്ചി-വെളുത്തുള്ളി പേസ്റ്റ് – 1 ടേബിൾസ്പൂൺ

നാരങ്ങാനീര് – 1 ടേബിൾസ്പൂൺ

ജീരകപ്പൊടി – 1 ടീസ്പൂൺ

മല്ലിപ്പൊടി – 1 ടീസ്പൂൺ

ഗരം മസാല – 2 ടീസ്പൂൺ

ഉപ്പ് – ആവശ്യത്തിന്

ചാട്ട് മസാല – ½ ടീസ്പൂൺ (വേണമെങ്കിൽ)

കസൂരി മേത്തി – 1 ടീസ്പൂൺ

ഒരു ചെറിയ സ്റ്റീൽ സ്റ്റാൻഡ്

തയ്യാറാക്കുന്ന വിധം

ആദ്യം തന്തൂരി മസാല കൂട്ട് തയ്യാറാക്കിയെടുക്കണം. അതിനായി ഒരു വലിയ പാത്രത്തിൽ തൈര്, നാരങ്ങാനീര്, ഇഞ്ചി-വെളുത്തുള്ളി പേസ്റ്റ്, കശ്മീരി മുളകുപൊടി, മഞ്ഞൾപ്പൊടി, ജീരകപ്പൊടി, മല്ലിപ്പൊടി, ഗരം മസാല, ഉപ്പ്, ചാട്ട് മസാല, കസൂരി മേത്തി, എണ്ണ എന്നിവ ചേർത്ത് നന്നായി യോജിപ്പിക്കുക. ഇതിലേക്ക് കഴുകിയെടുത്ത് വരഞ്ഞുവെച്ച ചിക്കൻ കഷ്ണങ്ങൾ ചേർത്ത് മസാല എല്ലാ ഭാഗത്തും നന്നായി പുരട്ടിയെടുക്കുക.

മിനിമം 4-6 മണിക്കൂറെങ്കിലും മസാല പുരട്ടിയ ചിക്കൻ ഫ്രിഡ്ജിൽ വയ്ക്കണം. ഒരു രാത്രി മുഴുവൻ വെക്കുകയാണെങ്കിൽ രുചി വർധിക്കും. ശേഷം ഇത് പാകം ചെയ്തെടുക്കാനായി ആദ്യം ഒരു പ്രഷർ കുക്കറിന്‍റെ അടിയിൽ ഒരു ചെറിയ സ്റ്റീൽ സ്റ്റാൻഡ് വെക്കുക. സ്റ്റാൻഡിന്‍റെ അടിയിൽ ഏകദേശം അര കപ്പ് വെള്ളം ഒഴിക്കുക. ചിക്കൻ വെള്ളത്തിൽ മുങ്ങാൻ പാടില്ല. സ്റ്റാൻഡിന് താഴെ മാത്രം വെള്ളം മതി. അതിന് ശേഷം മസാല പുരട്ടിവച്ച ചിക്കൻ കഷ്ണങ്ങൾ സ്റ്റാൻഡിന് മുകളിൽ വെക്കുക. ശേഷം കുക്കറിന്‍റെ വിസിൽ ഊരിമാറ്റുക. ശേഷം കുക്കർ ഒരു അടപ്പ് കൊണ്ട് അടച്ച് ചെറിയ തീയിൽ 20-25 മിനിറ്റ് നേരം വേവിച്ചെടുക്കുക. ചിക്കൻ അടിക്ക് പിടിക്കാതിരിക്കാൻ ശ്രദ്ധിക്കണം. ആവശ്യമാണെങ്കിൽ അല്പം വെള്ളം ചേർക്കാം. വെന്തുവന്ന ശേഷം കരിച്ചെടുക്കുകയാണ് വേണ്ടത്. ഇതിനായി കുക്കർ തുറന്ന് ചിക്കൻ കഷ്ണങ്ങൾ ശ്രദ്ധയോടെ പുറത്തെടുക്കുക.

ഇനി ഇത് ഒരു ഗ്രില്ലിലോ, പാനിലോ, അല്ലെങ്കിൽ നേരിട്ട് ഗ്യാസ് അടുപ്പിന്‍റെ തീയിലോ വെച്ച് ചെറുതായി കരിച്ചെടുക്കാം. നോൺ സ്റ്റിക്ക് പാനിൽ ആണ് കരിച്ചെടുക്കുന്നതെങ്കിൽ പാൻ ചൂടാക്കി അല്പം എണ്ണ തേച്ച്, ചിക്കൻ കഷ്ണങ്ങൾ എല്ലാ വശവും മൊരിഞ്ഞും കരിഞ്ഞും വരുന്നതുവരെ തിരിച്ചും മറിച്ചുമിട്ട് വേവിക്കുക. റസ്റ്റോറന്റിൽ കിട്ടുന്ന അതെ ടേസ്റ്റിൽ തന്തൂരി ചിക്കൻ റെഡി.