തിരുവനന്തപുരം: മിൽമയുടെ തിരുവനന്തപുരം മേഖലാ യൂണിയൻ (ടിആർസിഎംപിയു) പുതുതായി വിപണിയിൽ എത്തിച്ച 'മിൽമ കൗ മിൽക്ക്' 1 ലിറ്റർ ബോട്ടിലിൻറെ വിപണനത്തോടനുബന്ധിച്ചുള്ള ഉപഭോക്തൃ സമ്മാനപദ്ധതി വിജയികളെ പ്രഖ്യാപിച്ചു. മേഖലാ യൂണിയൻ ഹെഡ് ഓഫീസിൽ വെച്ച് നടത്തിയ നറുക്കെടുപ്പിലാണ് വിജയികളെ തിരഞ്ഞെടുത്തത്.
മിൽമ ഉത്പന്നങ്ങളുടെ വിപണി വർദ്ധിപ്പിക്കുന്നതിൻറെ ഭാഗമായും ഓണവിപണി ലക്ഷ്യമിട്ടുമാണ് 'മിൽമ കൗ മിൽക്ക്' 1 ലിറ്റർ ബോട്ടിൽ ടിആർസിഎംപിയു വിപണിയിലിറക്കിയത്. പാലിൻറെ തനത് ഗുണമേൻമയും സ്വാഭാവിക തനിമയും നിലനിർത്തുന്ന പ്രോട്ടീൻ സമ്പുഷ്ടമായ 'മിൽമ കൗ മിൽക്ക്' 1 ലിറ്റർ ബോട്ടിലിന് 70 രൂപയാണ് വില.
ആഗസ്റ്റ് 20, 21 തീയതികളിൽ വിതരണം ചെയ്ത 'മിൽമ കൗ മിൽക്ക്' 1 ലിറ്റർ ബോട്ടിലിൽ ബാച്ച്കോഡിൻറെ കൂടെ ഒരു അഞ്ച് അക്ക നമ്പർ ഉൾപ്പെടുത്തിയിരുന്നു. ഈ നമ്പറിൻറെ അടിസ്ഥാനത്തിലാണ് നറുക്കെടുപ്പിലൂടെ സമ്മാനാർഹരെ കണ്ടെത്തിയത്. നറുക്കെടുപ്പിലൂടെ തിരഞ്ഞെടുക്കപ്പെട്ട പത്ത് പേർക്ക് 15,000 രൂപ വീതം വിലമതിക്കുന്ന സമ്മാനം ലഭിക്കും.
സമ്മാനാർഹമായ നമ്പറുകൾ ചുവടെ ചേർക്കുന്നു:
12924, 13106, 12673, 13067, 10748, 10039, 10751, 11647, 11636, 14087
സമ്മാനാർഹരായ ഉപഭോക്താക്കൾ ചൊവ്വാഴ്ച (ആഗസ്റ്റ് 26) ഉച്ചയ്ക്ക് രണ്ടിന് സമ്മാനാർഹമായ നമ്പർ പ്രിൻറ് ചെയ്തിട്ടുള്ള ബോട്ടിലുമായി പട്ടം മിൽമ ക്ഷീരഭവനിൽ എത്തി സമ്മാനം കൈപ്പറ്റണം.
കൂടുതൽ വിവരങ്ങൾക്ക് : 9446056114
