വയനാട് : യുവതയെ ലഹരിയിൽ നിന്നും ബോധവത്കരിച്ച് കളിക്കളത്തിലേക്കെത്തിക്കുകയാണ് ലക്ഷ്യമെന്ന് കായിക വകുപ്പ് മന്ത്രി വി.അബ്ദുറഹ്മാൻ. ജില്ലാ സ്‌പോർട്‌സ് കൗൺസിലിന്റെ ആഭിമുഖ്യത്തിൽ സ്‌പോർട്‌സാണ് ലഹരി എന്ന മുദ്രാവാക്യത്തോടെ സംഘടിപ്പിച്ച ലഹരി വിരുദ്ധ സന്ദേശയാത്ര ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സമൂഹത്തിൽ കഴിഞ്ഞ കുറച്ചു നാളുകൾ കൊണ്ട് വലിയ തോതിലുള്ള രാസലഹരികളാണ് പിടിച്ചെടുത്തതെന്നും ലഹരിക്കെതിരെ ഇനിയും കൂടുതൽ ബോധവത്കരണം നടപ്പാക്കണമെന്നും മന്ത്രി അഭിപ്രായപ്പെട്ടു.
വളർന്ന് വരുന്ന കുട്ടികളെ ലഹരിയിൽ നിന്നും ബോധവത്കരിച്ച് കളിക്കളങ്ങളിലേക്ക് എത്തിക്കുന്നതോടൊപ്പം ലഹരിയുമായി ബന്ധപ്പെട്ട ദൂഷ്യവശങ്ങൾ, ഭീകരാവസ്ഥ സംബന്ധിച്ച് പൊതുസമൂഹത്തിലേക്ക് എത്തിക്കുക ലക്ഷ്യമിട്ടാണ് സന്ദേശയാത്ര നടത്തുന്നതെന്നും മന്ത്രി കൂട്ടിച്ചേർത്തു. ലഹരി വിരുദ്ധ സന്ദേശ യാത്ര കാസർഗോഡ് മുഖ്യമന്ത്രി ഉദ്ഘാടനം ചെയ്ത് മാനന്തവാടിയിലെത്തിയപ്പോൾ ആയിരക്കണക്കിന് ആളുകളാണ് സന്ദേശ യാത്രയിൽ പങ്കെടുത്തത്. ക്യാമ്പയിന്റെ ഭാഗമായി പനമരത്ത് നിന്നും ആരംഭിച്ച് മാരത്തോൺ മാനന്തവാടി വള്ളിയൂർക്കാവ് ജങ്ഷനിൽ സമാപിച്ചു. വള്ളിയൂർക്കാവ് ജങ്ഷൻ മുതൽ മാനന്തവാടി ടൗൺ വരെ മന്ത്രിയുടെ നേതൃത്വത്തിൽ വാക്കത്തോൺ ലഹരി വിരുദ്ധ സന്ദേശയാത്ര നടന്നു. വാക്കത്തോൺ ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ പനമരം പഞ്ചായത്ത് ബസ് സ്റ്റാന്റ് പരിസരത്ത് ഫ്‌ളാഗ് ഓഫ് ചെയ്തു. ജില്ലയിലെ കായിക സംഘടനകൾ, തദ്ദേശ സ്വയംഭരണ സ്ഥാപനങ്ങൾ, കേരള ക്രിക്കറ്റ് അസോസിയേഷൻ, കേരള ഫുട്‌ബോൾ അസോസിയേഷൻ കായികതാരങ്ങൾ, ജനപ്രതിനിധികൾ എന്നിവർ മരത്തോണിലും വാക്കത്തോണിലും പങ്കെടുത്തു.
കൽപറ്റ പുതിയ ബസ്റ്റാന്റിൽ നടന്ന സമാപന സമ്മേളനം പട്ടിക ജാതി പട്ടിക വർഗ പിന്നാക്ക ക്ഷേമ വകുപ്പ് മന്ത്രി ഒ.ആർ കേളു ഉദ്ഘാടനം ചെയ്തു. ടി സിദ്ധീഖ് എം എൽ എ അദ്ധ്യക്ഷനായി. ദേശീയ തലത്തിൽ കായിക മത്സരങ്ങളിലെ വിജയികൾക്കുള്ള സമ്മാന വിതരണം കായിക വകുപ്പ് മന്ത്രി വി. അബ്ദുറഹിമാൻ നിർവ്വഹിച്ചു. ജില്ലാ പഞ്ചായത്ത് പ്രസിഡണ്ട് സംഷാദ് മരക്കാർ, ജില്ലാ കലക്ടർ ഡി. ആർ മേഘശ്രീ, കൽപ്പറ്റ നഗരസഭ ചെയർമാൻ ടി.ജെ ഐസക്, കേരള സ്‌പോർട്‌സ് കൗൺസിൽ വൈസ് പ്രസിഡന്റ് എം ആർ രഞ്ജിത്ത്, സംസഥാന സ്‌പോർട്‌സ് കൗൺസിൽ കമ്മിറ്റിയംഗങ്ങളായ കെ റഫീഖ്, അഡ്വക്കറ്റ് രഞ്ജു സുരേഷ്, ജെ.എസ് ബോബൻ, ജില്ലാ പഞ്ചായത്ത് വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ മുഹമ്മദ് ബഷീർ, യുവജനക്ഷേമ ബോർഡ് അംഗം കെ.എം ഫ്രാൻസിസ്, മുൻ ഫുട്‌ബോൾ താരം സുശാന്ത് മാത്യു, ജില്ലാ സ്‌പോർട്‌സ് കൗൺസിൽ പ്രസിഡന്റ് എം. മധു, ജില്ലാ സ്‌പോർട്‌സ് കൗൺസിൽ വൈസ് പ്രസിഡന്റ് സലിം കടവൻ തുടങ്ങിയവർസംബന്ധിച്ചു
