കാസർകോട്:കാസർകോട് ടൗണിന് സമീപംനിർമ്മാണ പ്രവൃത്തി നടക്കുന്ന സ്ഥലത്ത്ഇതര സംസ്ഥാന തൊഴിലാളിയെ മരിച്ച നിലയിൽ കണ്ടെത്തിയ സംഭവത്തിൽ പൊലിസ് ഒൻപതുപേരെ കസ്റ്റഡിയിലെടുത്തു. കൊലപാതകമാണെന്ന പ്രാഥമിക നിഗമനത്തിൽ പിടിയിലായവരെ ചോദ്യം ചെയ്തു വരികയാണ്.
തിങ്കളാഴ്ച്ച പുലർച്ചെ ഒരു മണിയോടെയാണ് സംഭവം. പശ്ചിമ ബംഗാൾ ജാൽപെഗുരി ബരഗരിയ ബാര സ്വദേശി സുഭാസ് റോയിയുടെ മകൻ സുശാന്ത റോയി(28)യാണ് മരിച്ച നിലയിൽ കണ്ടെത്തിയത്.സംഭവ സ്ഥലത്ത് നിന്ന് രക്ഷപ്പെട്ട ആറു പേരിൽ 4 പേരെ ഒറ്റപ്പാലത്ത് നിന്നും കൊലപാതകസമയത്ത് സ്ഥലത്തുണ്ടായിരുന്ന മരിച്ചയാളുടെകൂടെ ജോലി ചെയ്യുന്ന അഞ്ച് പേരെ കാസർകോട് നിന്നുമാണ് പിടികൂടിയത്. ഇവരെ പൊലീസ് വിശദമായി ചോദ്യം ചെയ്തു വരികയാണ്.
14 ഓളം പേർ താമസിക്കുന്ന നിർമ്മാണ പ്രവൃത്തി നടക്കുന്ന ആനവാതുക്കലിലെ പഴയ എസ്ബിഐ ബേങ്ക് കെട്ടിടത്തിന് സമീപത്തു വെച്ചായിരുന്നു സംഭവം. ഇതര സംസ്ഥാന തൊഴിലാളികൾ തമ്മിൽ പുലർച്ചെയുണ്ടായ മദ്യപാനത്തിനിടെയുണ്ടായ വാക്തർക്കവും കയ്യാങ്കളിക്കിടയിലുമാണ് മരണം സംഭവിച്ചതെന്നാണ് സൂചന. വിവരമറിഞ്ഞ് സ്ഥലത്തെത്തിയ പൊലിസ് മൃതദേഹം സൂക്ഷ്മപരിശോധന നടത്തിയെങ്കിലും ദേഹത്ത് മുറിവുകളോ പരിക്കോ കണ്ടെത്താൻ കഴിഞ്ഞില്ല. വിദഗ്ധ പോസ്റ്റ്മോർട്ടത്തിനായി മൃതദേഹം പരിയാരത്തെ കണ്ണൂർ ഗവ.മെഡിക്കൽ കോളേജിലേക്ക് മാറ്റി.
