കൊച്ചി: തരൂര്‍ വിവാദം കോണ്‍ഗ്രസ് ഗൗരവത്തില്‍ പരിശോധിക്കണമെന്ന് മുസ്ലിം ലീഗ്. തെരഞ്ഞെടുപ്പ് അടുക്കുമ്പോള്‍ ഇത്തരം വിവാദങ്ങള്‍ ഗുണം ചെയ്യില്ല. കോണ്‍ഗ്രസിന്റെ ആഭ്യന്തര പ്രശ്‌നത്തില്‍ കൂടുതല്‍ പ്രതികരണത്തിനില്ലെന്നും പി കെ കുഞ്ഞാലിക്കുട്ടി വ്യക്തമാക്കി.കോണ്‍ഗ്രസിന്റെ നേതൃനിരയില്‍ പ്രശ്‌നങ്ങള്‍ പരിഹരിച്ച് മുന്നോട്ട് പോകണമെന്ന് സാദിഖലി ശിഹാബ് തങ്ങള്‍ പറഞ്ഞു. തെരഞ്ഞെടുപ്പില്‍ കോണ്‍ഗ്രസാണ് നേതൃത്വം നല്‍കേണ്ടത്. പ്രശ്‌നങ്ങള്‍ കോണ്‍ഗ്രസ് നേതൃത്വം പരിഹരിക്കുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.
കോണ്‍ഗ്രസിനെ പ്രതിസന്ധിയിലാക്കുന്ന ശശി തരൂരിന്റെ നിലപാടിനോട് പിന്തുണ പ്രഖ്യാപിച്ച് സിപിഐഎം നേതാക്കള്‍ രംഗത്തെത്തി. ശശി തരൂരിന്റെ കോണ്‍ഗ്രസിനെക്കുറിച്ചുള്ള അഭിപ്രായം എല്‍ഡിഎഫും സിപിഐഎമ്മും ആവര്‍ത്തിക്കുന്ന കാര്യമാണെന്ന് സിപിഐഎം സംസ്ഥാന സെക്രട്ടറി എം.വി ഗോവിന്ദന്‍ പറഞ്ഞു. കൃത്യമായ നിലപാട് സ്വീകരിക്കാന്‍ കഴിയുന്ന നേതാവാണ് തരൂര്‍. അദ്ദേഹത്തെ അവഗണിക്കേണ്ടെതില്ലെന്നും ഗോവിന്ദന്‍ അഭിപ്രായപ്പെട്ടു.
തരൂര്‍ അഭിപ്രായസ്ഥിരതയുള്ളയാളാണെന്നും കേരളത്തിലെ വ്യവസായ മേഖലയെ കുറിച്ച് തരൂര്‍ പറഞ്ഞത് വസ്തുതയെന്നും സിപിഐഎം കേന്ദ്രം കമ്മിറ്റിയംഗം ഇ.പി ജയരാജനും പ്രതികരിച്ചു.അതേസമയം, തരൂരിന്റെ നീക്കങ്ങള്‍ പാര്‍ട്ടിയെ ദുര്‍ബലപ്പെടുത്തുന്നതായും തെറ്റിദ്ധാരണ പരത്തുന്നുതായും എഐസിസി വ്യക്തമാക്കി.