മക്കയില്‍ തീര്‍ത്ഥാടക ലക്ഷങ്ങള്‍ക്ക് ആശ്വാസമാകുന്ന ബൃഹത്തായ മെട്രോ റെയില്‍ പദ്ധതി വരുന്നു. തീര്‍ത്ഥാടകരുടെയും സന്ദര്‍ശകരുടെയും ഗതാഗതം സുഗമമാക്കുക എന്ന ലക്ഷ്യത്തോടെ ഏകദേശം 800 കോടി റിയാല്‍ ചെലവില്‍ മക്ക റോയല്‍ കമ്മീഷന്റെ നേതൃത്വത്തിലാണ് പദ്ധതി നിലവില്‍വരുന്നത്. പദ്ധതിയുടെ വിശദാംശങ്ങള്‍ ചര്‍ച്ച ചെയ്യുന്നതിനായി കരാറുകാരുടെ ആദ്യ യോഗം ഈ മാസം 21ന് ചേരും.
മക്കയുടെ എല്ലാ പ്രദേശങ്ങളെയും തമ്മില്‍ ബന്ധിപ്പിക്കുന്ന നിലയിലായിരിക്കും മെട്രോ പദ്ധതി. നാല് പ്രധാന ലൈനുകളിലായി 89 സ്റ്റേഷനുകളാണ് പദ്ധതിയുടെ ഭാഗമായി നിര്‍മ്മിക്കുക. മൂന്ന് ഘട്ടങ്ങളായി പൂര്‍ത്തിയാക്കുന്ന പദ്ധതിയുടെ ഭൂരിഭാഗം ലൈനുകളും തുരങ്കങ്ങളിലൂടെയാകും കടന്നുപോവുക.
പുതിയ മെട്രോ വരുന്നതോടെ ഓരോ വര്‍ഷവും ഹജ്ജ്, ഉംറ കര്‍മ്മങ്ങള്‍ക്കായി മക്കയിലെത്തുന്ന ദശലക്ഷക്കണക്കിന് തീര്‍ത്ഥാടകര്‍ക്ക് ഹറമിലേക്കും മറ്റ് പുണ്യസ്ഥലങ്ങളിലേക്കുമുള്ള യാത്ര കൂടുതല്‍ വേഗത്തിലും എളുപ്പത്തിലും സാധ്യമാകും. ഇത് നഗരത്തിലെ ഗതാഗതക്കുരുക്ക് ഗണ്യമായി കുറയ്ക്കാന്‍ സഹായിക്കുമെന്നാണ് പ്രതീക്ഷ. മക്ക ബസ് സര്‍വീസുകളെയും ഹറമൈന്‍ എക്സ്പ്രസ്സ് ട്രെയിന്‍ ശൃംഖലയെയും പുതിയ മെട്രോയുമായി ബന്ധിപ്പിക്കും.
