ഓപ്പണ്‍ എഐ സ്വന്തം വെബ് ബ്രൗസര്‍ ആഴ്ചകള്‍ക്കുള്ളില്‍ പുറത്തിറക്കുമെന്ന് റിപ്പോര്‍ട്ട്. ഗൂഗിളിന്റെ ക്രോം ബ്രൗസറിനെ വെല്ലുവിളിച്ചുകൊണ്ടാണ് ഓപ്പണ്‍ എഐയുടെ ബ്രൗസറിന്റെ വരവ്. ചാറ്റ് ജിപിടി എന്ന എഐ ചാറ്റ്‌ബോട്ട് അവതരിപ്പിച്ചതിന് പിന്നാലെ തന്നെ ഗൂഗിളിന്റെ സെര്‍ച്ച് എഞ്ചിന്‍ വിപണിക്ക് ഓപ്പണ്‍ എഐ വെല്ലുവിളി സൃഷ്ടിച്ചേക്കുമെന്ന് വിലയിരുത്തപ്പെട്ടിരുന്നു. അത് ശരിവെക്കും വിധമായിരുന്നു പിന്നീടുള്ള ഓപ്പണ്‍ എഐയുടെ നീക്കങ്ങള്‍. ചാറ്റ് ജിപിടിയില്‍ നേരത്തെ തന്നെ വെബ്‌സെര്‍ച്ച് ഫീച്ചര്‍ അവതരിപ്പിച്ചിരുന്നു.
സാധാരണ വെബ് ബ്രൗസറുകളും സെര്‍ച്ച് എഞ്ചിനുകളും വെബ്‌പേജുകളിലേക്കുള്ള ഇടനിലക്കാര്‍ മാത്രമായാണ് പ്രവര്‍ത്തിക്കുന്നത്. എന്നാല്‍ ആര്‍ട്ടിഫിഷ്യല്‍ ഇന്റലിജന്‍സിന്റെ കഴിവുകള്‍ സന്നിവേശിപ്പിച്ചാവും ഓപ്പണ്‍ എഐയുടെ ബ്രൗസര്‍.
ടിക്കറ്റ് ബുക്ക് ചെയ്യുക, ഫോമുകള്‍ പൂരിപ്പിക്കുക, വെബ് പേജുകളുടെ സംഗ്രഹം കാണുക തുടങ്ങിയ ജോലികള്‍ ബ്രൗസര്‍ വിന്‍ഡോയില്‍ നിന്ന് പുറത്തുപോവാതെ തന്നെ ആളുകളെ അനുവദിക്കുന്ന ചാറ്റ്ജിപിടി ശൈലിയിലുള്ള ചാറ്റ് ഇന്റര്‍ഫെയ്‌സ് ആയിരിക്കും ഓപ്പണ്‍ എഐ വെബ് ബ്രൗസറിനെന്നാണ് കരുതുന്നത്. സാധാരണ ബ്രൗസറുകളെ പോലെ വിവിധങ്ങളായ ടാബുകള്‍ തുറക്കേണ്ടതിന്റേയും ഒരുപാട് തവണ ക്ലിക്ക് ചെയ്യേണ്ടതിന്റേയും ആവശ്യം ഇവിടെ ഇല്ലാതാവും.
