ന്യൂഡല്‍ഹി: ഒരുകാലത്ത് ലോക ക്രിക്കറ്റിലെ വമ്പന്മാരായിരുന്ന പാകിസ്ഥാന് ഇന്ന് തകര്‍ച്ചയുടെ വക്കിലാണ്. വേണ്ടത്ര രീതിയില്‍ ഫണ്ട് ലഭിക്കാതായതോടെ കളിക്കാര്‍ക്ക് മെച്ചപ്പെട്ട പ്രതിഫലം നല്‍കാനോ അടിസ്ഥാന സൗകര്യങ്ങളൊരുക്കാനോ സാധിക്കുന്നില്ല.
തീവ്രവാദ ആക്രമണത്തിനുശേഷം വര്‍ഷങ്ങളോളം അന്താരാഷ്ട്ര ക്രിക്കറ്റ് ടീമുകള്‍ എത്താതിരുന്ന പാകിസ്ഥാനില്‍ അടുത്തിടെയാണ് ടീമുകള്‍ കളിക്കാനെത്തുന്നത്. എന്നാല്‍, അടിസ്ഥാന സൗകര്യം ഒരുക്കുന്നതില്‍ പാകിസ്ഥാന് വന്‍ പരാജയമായി. ടീമിന്റെ തുടര്‍തോല്‍വികളോടെ ആരാധകരും സ്‌റ്റേഡിയത്തിലെത്തുന്നില്ല. ഇന്ത്യയ്ക്ക് ഐപിഎല്‍ എന്നപോലെ പാകിസ്ഥാന്റെ സൂപ്പര്‍ ലീഗ് നടക്കുന്ന സമയമാണിത്. എന്നാല്‍, ഒഴിഞ്ഞ ഗ്യാലറികളിലാണ് കളി നടക്കുന്നത്.
ഇന്ത്യയില്‍ തീവ്രവാദ ആക്രമണം നടത്തിയതിനെ തുടര്‍ന്ന് ബിസിസിഐ കര്‍ശന നടപടിയെടുത്തതാണ് പാകിസ്ഥാന് ഫണ്ട് ലഭിക്കാതിരിക്കാന്‍ പ്രധാന കാരണം. ഇന്ത്യയുമായുള്ള ദ്വിരാഷ്ട്ര പരമ്പരകള്‍ ഇല്ലാതായത് ശതകോടികളുടെ നഷ്ടം പാകിസ്ഥാന് വരുത്തിവെച്ചു. അടുത്തിടെ നടന്ന ചാമ്പ്യന്‍സ് ട്രോഫി ടൂര്‍ണമെന്റില്‍ ഇന്ത്യ കളിക്കാനെത്താത്തതോടെ സെമി ഫൈനലും ഫൈനലും പാകിസ്ഥാനില്‍ നിന്നും മാറ്റിയതും സാമ്പത്തിക നഷ്ടത്തിനിടയാക്കി.
ഇന്ത്യന്‍ വനിതാ കളിക്കാര്‍ക്ക് ലഭിക്കുന്ന പ്രതിഫലം പോലും പാകിസ്ഥാന് കളിക്കാര്‍ക്ക് സൂപ്പര്‍ ലീഗില്‍ നിന്നും കിട്ടുന്നില്ല. മറ്റു രാജ്യങ്ങളിലെ ലീഗ് മത്സരങ്ങള്‍ കളിച്ചാണ് പാക് കളിക്കാര്‍ പണമുണ്ടാക്കുന്നത്.
പാക് ക്രിക്കറ്റിനെ തകര്‍ക്കുന്ന മറ്റ് പല കാരണങ്ങളുമുണ്ട്. പോരായ്മകളുള്ള ആഭ്യന്തര സംവിധാനമാണ് ഇപ്പോള്‍ പാക് ക്രിക്കറ്റിലേത്. ഫണ്ട് വരവ് കുറഞ്ഞതോടെ ആഭ്യന്തര ക്രിക്കറ്റിന് കാര്യക്ഷമതക്കുറവുണ്ടായി. സ്വതന്ത്രമല്ലാത്ത അസോസിയേഷനുകളും ഡമ്മി ക്ലബ്ബുകളുടെ വ്യാപനവും യോഗ്യത അടിസ്ഥാനമാക്കിയുള്ള തിരഞ്ഞെടുപ്പിനെ തകര്‍ക്കുന്നു. ഒരുകാലത്ത് പ്രതിഭകളെ വളര്‍ത്തിയ ഡിപ്പാര്‍ട്ട്‌മെന്റല്‍ ക്രിക്കറ്റിന്റെ നിരോധനം മത്സരശേഷിയുള്ള കളിക്കാരെ ഉല്‍പ്പാദിപ്പിക്കുന്ന പൈപ്പ്ലൈനിനെ ദുര്‍ബലമാക്കി.
പാകിസ്ഥാന് ക്രിക്കറ്റ് ബോര്‍ഡ് (പിസിബി) നിരന്തരമായ അസ്ഥിരത നേരിടുകയാണ്. 2021 മുതല്‍ നാല് ചെയര്‍മാന്‍മാര്‍, 2023 മുതല്‍ ആറ് പരിശീലകര്‍, സെലക്ടര്‍മാരുടെ മാറ്റം എന്നിവ ഉണ്ടായി. രാഷ്ട്രീയ ഇടപെടലുമായി ബന്ധപ്പെട്ട ഈ അസ്ഥിരത ദീര്‍ഘകാല ആസൂത്രണത്തെ തടസ്സപ്പെടുത്തുകയും കളിക്കാരുടെ ആത്മവിശ്വാസം ഇല്ലാതാക്കുകയും ചെയ്യുന്നു.
ടീം തിരഞ്ഞെടുപ്പിലും യോഗ്യതയില്ലാത്ത അഡ്മിനിസ്‌ട്രേറ്റര്‍മാരുടെ നിയമനത്തിലും പക്ഷപാത ആരോപണങ്ങള്‍ പ്രകടനത്തെ തകര്‍ത്തു. യോഗ്യതയുടെ അഭാവം, ബാബര്‍ അസം, ഷഹീന്‍ അഫ്രീദി, ഷദാബ് ഖാന്‍ തുടങ്ങിയ കളിക്കാരുടെ മോശം ഫോമിന് കാരണമായി.
പാകിസ്ഥാന് സൂപ്പര്‍ ലീഗ് പോലുള്ള ടി20 ലീഗുകള്‍ക്ക് മുന്‍ഗണന നല്‍കുന്നത് കളിക്കാരുടെ ശ്രദ്ധ സാമ്പത്തിക ലാഭത്തിലേക്കും ഷോര്‍ട്ട്-ഫോര്‍മാറ്റ് കഴിവുകളിലേക്കും തിരിച്ചു, ടെസ്റ്റ് ക്രിക്കറ്റിന്റെ ആവശ്യങ്ങള്‍ അവഗണിച്ചു. അവസാന 18 ടെസ്റ്റ് ഇന്നിംഗ്‌സില്‍ 20 മാത്രമാണ് ബാബര്‍ അസമിന്റെ ശരാശരി. ടീം ഐക്യത്തിന്റെ അഭാവവും ഫിറ്റ്‌നസ് കുറവും പ്രശ്‌നങ്ങള്‍ വര്‍ധിപ്പിക്കുന്നു.
പ്രധാനമന്ത്രി ചെയര്‍മാനെ നിയമിക്കുന്ന പിസിബി ഘടന ക്രിക്കറ്റിനെ രാഷ്ട്രീയ അസ്ഥിരതയുമായി ബന്ധിപ്പിക്കുന്നു. മൊഹ്‌സിന്‍ നഖ്വിയുടെ നിയമനം പോലുള്ള തീരുമാനങ്ങള്‍ ക്രിക്കറ്റിന്റെ യോഗ്യതയ്ക്ക് പകരം രാഷ്ട്രീയ അജണ്ടകള്‍ പ്രതിഫലിപ്പിക്കുന്നതാണ്.
വേള്‍ഡ് ടെസ്റ്റ് ചാമ്പ്യന്‍ഷിപ്പില്‍ ഏറ്റവും താഴെയാണ് ടീം. 2021 ഫെബ്രുവരി മുതല്‍ ഹോം ടെസ്റ്റ് ജയിച്ചില്ല. 2024-ല്‍ ബംഗ്ലാദേശിനോട് പോലും 2-0ത്തിന് തോല്‍വി വഴങ്ങി. ഏകദിനത്തില്‍ 2023 ലോകകപ്പിലും 2025 ചാമ്പ്യന്‍സ് ട്രോഫിയിലും ഗ്രൂപ്പ് ഘട്ടത്തില്‍ തന്നെ പുറത്തായി. 2024 ടി20 ലോകകപ്പിലും ഗ്രൂപ്പ് ഘട്ടം കടന്നില്ല. യുഎസ്എ, അയര്‍ലന്‍ഡ് എന്നീ ടീമുകള്‍ക്കെതിരേയും തോറ്റു. മോശം പ്രകടനവും ആഭ്യന്തര രാഷ്ട്രീയവുമാണ് ആരാധകരെ നിരാശരാക്കിയത്. പിഎസ്എല്‍, അന്താരാഷ്ട്ര മത്സരങ്ങളില്‍ കാണികള്‍ കുറഞ്ഞതോടെ വരുമാനവും ഇടിഞ്ഞു.
പഹല്‍ഗാമിലുണ്ടായ തീവ്രവാദി ആക്രമണത്തോടെ ബിസിസിഐ പാകിസ്ഥാനെതിരായ നിലപാട് കൂടുതല്‍ കടുപ്പിക്കും. ഐസിസി ചെയര്‍മാന്‍ ജയ് ഷാ ആണെന്നതിനാല്‍ പല വിഷയങ്ങളിലും ഇന്ത്യയ്ക്ക് അനുകൂലമായ നിലപാടുണ്ടായേക്കും. ഇത് പാക് ക്രിക്കറ്റിനെ കൂടുതല്‍ ദുര്‍ബലമാക്കും.
