അഹമ്മദാബാദ് വിമാന അപകടത്തില്‍ നിന്ന് അത്ഭുതകരമായി രക്ഷപ്പെട്ട ബ്രിട്ടീഷ് പൗരനും ഇന്ത്യന്‍ വംശജനുമായ രമേഷ് വിശ്വാസ് കുമാറിനെതിരെ സോഷ്യല്‍ മീഡിയയില്‍ പോസ്റ്റ് പങ്കുവെച്ച് നടി. ബോളിവുഡ് നടിയും ഗായികയുമായ സുചിത്ര കൃഷ്ണമൂര്‍ത്തിയാണ് രമേഷ് വിശ്വാസിനെതിരെ പോസ്റ്റ് പങ്കുവെച്ചത്. വിശ്വാസ് കുമാര്‍ വിമാനത്തിലെ യാത്രക്കാരനല്ലെന്നും കള്ളം പറഞ്ഞു എന്നുമായിരുന്നു സുചിത്രയുടെ ആരോപണം. ഇത് വിവാദമായതോടെ പോസ്റ്റ് പിന്‍വലിച്ച് നടി ക്ഷമാപണം നടത്തി.
കഴിഞ്ഞ ദിവസമായിരുന്നു വിശ്വാസ് കുമാറിനെതിരെ സുചിത്ര എക്സിലൂടെ ആരോപണം ഉന്നയിച്ചത്. വിശ്വാസ് കുമാര്‍ വിമാനത്തിലെ യാത്രക്കാരനല്ലെന്നും അപകടത്തില്‍ നിന്ന് രക്ഷപ്പെട്ടു എന്ന് കള്ളം പറഞ്ഞതാണെന്നുമായിരുന്നു ഇവര്‍ എക്സില്‍ കുറിച്ചത്.. വിശ്വാസ് കുമാര്‍ പറഞ്ഞ കാര്യങ്ങള്‍ യുകെയിലുള്ള അദ്ദേഹത്തിന്റെ ബന്ധുക്കള്‍ സ്ഥിരീകരിച്ചിരുന്നോ എന്നും സുചിത്ര ചോദിച്ചിരുന്നു. സുചിത്രയുടെ പോസ്റ്റ് സോഷ്യല്‍ മീഡിയയില്‍ വൈറലായതോടെ നിരവധി പേരാണ് വിമര്‍ശനവുമായി രംഗത്തെത്തിയത്. ഇതിന് പിന്നാലെ നടി പോസ്റ്റ് പിന്‍വലിക്കുകയും വിശദീകരണം നല്‍കുകയും ചെയ്തു. പ്രചരിക്കുന്നത് തെറ്റായ വാര്‍ത്തയാണെന്ന് തോന്നുന്നുവെന്നും ക്ഷമ ചോദിക്കുന്നതായും അവര്‍ പറഞ്ഞു. ഒരു സുഹൃത്ത് പങ്കിട്ട വിവരങ്ങള്‍ താന്‍ വീണ്ടും പോസ്റ്റ് ചെയ്തതാണെന്നും ആദ്യം അത് സ്ഥിരീകരിക്കാത്തതില്‍ ഖേദിക്കുന്നുവെന്നും അവര്‍ പറഞ്ഞു.