ഒരു സംശയം വന്നാൽ അടുത്തിരിക്കുന്നവരോട് ചോദിക്കുന്നതിനു പകരം ഫോണിൽ പരതുന്നവരാണ് നമ്മളിൽ പലരും. നമ്മുടെ ഏത് സംശയങ്ങൾക്കും മറുപടിയുമായി ചാറ്റ് ജിപിടി ഉള്ളപ്പോൾ വേറെ അവിടെയും പോകേണ്ടതില്ലല്ലോ ? എന്ത് ആവശ്യപ്പെട്ടാലും പറഞ്ഞു തരുന്ന ചാറ്റ് ജിപിടിയോട് പക്ഷെ ഈ കാര്യം മാത്രം ചോദിച്ചാൽ ഉത്തരം ഉണ്ടാവില്ല. എന്താണെന്ന് അല്ലേ ? ഒരു കാര്യം ചെയ്യുക, ചാറ്റ്ജിപിടിയോട് ഇപ്പോള് സമയം എത്രയായി എന്ന് ഒന്ന് ചോദിച്ചു നോക്കിക്കേ ? മറുപടി കിട്ടില്ല. പകരം ‘എനിക്ക് ഒരു തത്സമയ ക്ലോക്കിലേക്ക് ആക്സസ് ഇല്ല. അതിനാല് നിങ്ങളുടെ ഉപകരണത്തിലോ മറ്റെവിടെയെങ്കിലുമോ എനിക്ക് നിലവിലെ സമയം കാണാന് കഴിയില്ല’ എന്നാകും കക്ഷി പറയുക. മാത്രമല്ല, കൃത്യമായ സമയമറിയാന് സ്വന്തം ഉപകരണം പരിശോധിക്കാന് ആകും ഇത് നിർദേശം നൽകുക.
ലോകത്തുള്ള സകലമാന കാര്യങ്ങൾക്കും ഉത്തരം പറയുന്ന ചാറ്റ്ജിപിടിക്ക് എന്തുകൊണ്ടാണ് ഈ ചോദ്യത്തിന് ഉത്തരം നല്കാൻ കഴിയാത്തത് ? അതിനുള്ള ഉത്തരം നൽകുകയാണ് എഐ റോബോട്ടിക് വിദഗ്ധന് യെര്വന്ത് കുല്ബഷ്യാന്. ഒരു LLM, ഭാഷയുടെയും വാക്കുകളുടെയും ഇടയിലാണ് പ്രവർത്തിക്കുന്നത്. അതിനാൽ, ഇതിനകം ഉൾപ്പെടുത്തിയിട്ടുള്ള ഡാറ്റ മാത്രമേ അതിന് ലഭിക്കുകയുള്ളൂ.
AI-യുടെ കോൺടെക്സ്റ്റ് വിൻഡോയിലാണ് കാതലായ പ്രശ്നമെന്ന് കുൽബഷ്യാൻ ചൂണ്ടിക്കാട്ടുന്നു. ഒരേ സമയം ഒരു സംഭാഷണം മാത്രം പ്രോസസ്സ് ചെയ്യാനാകുന്ന വിധത്തിലാണ് ഇതിനെ സജ്ജീകരിച്ചിരിക്കുന്നത്. ആവർത്തിച്ചുള്ള സംഭാഷണങ്ങൾ ചാറ്റ്ജിപിടിയുടെ കോൺടെക്സ്റ്റ് വിൻഡോയുടെ ഗുണം കുറയ്ക്കാൻ കാരണമാവുകയും അടിസ്ഥാന കാര്യങ്ങളിൽ പോലും അബദ്ധങ്ങൾ സംഭവിക്കാൻ ഇടയാക്കുകയും ചെയ്യും.
ഒരു മോഡൽ അല്ലെങ്കിൽ സിസ്റ്റം ക്ലോക്കിലേക്ക് നിരന്തരം ആക്സസ് ചെയ്യുകയും സമയം അപ്ഡേറ്റ് ചെയ്യുകയും ചെയ്താൽ, ആ സ്ഥിരമായ സമയവിവര സ്ട്രീം കോൺടെക്സ്റ്റ് വിൻഡോയിലെ വിലയേറിയ ഇടം അപഹരിക്കും. ഇടയ്ക്കിടെയുള്ള സമയ അപ്ഡേറ്റുകൾ ആശയക്കുഴപ്പമുണ്ടാക്കുന്ന ശബ്ദമായി മാറുമെന്നും, അത് AI-യുടെ പ്രാഥമിക സംഭാഷണ ടാസ്കിന്റെ ഗുണനിലവാരം കുറയ്ക്കുമെന്നും കുൽബഷ്യാൻ അഭിപ്രായപ്പെടുന്നു.
ചാറ്റ്ജിപിടിയുടേത് പോലെയുള്ള സമയപരിധി എല്ലാ AI പ്ലാറ്റ്ഫോമുകളിലും ഇല്ല എന്നതും ശ്രദ്ധേയമാണ്. ജെമിനി, ഗ്രോക്ക് തുടങ്ങിയവയൊക്കെ തിരിച്ചറിയൽ പ്രവർത്തനങ്ങൾ സ്വയമേ സംയോജിപ്പിച്ചോ സിസ്റ്റം ഡേറ്റ ഉപയോഗിച്ചോ തത്സമയ വിവരങ്ങൾ വിജയകരമായി പ്രദർശിപ്പിക്കുന്നു.
നാച്ചുറൽ ലാംഗ്വേജ് പ്രോസസ്സിംഗ് വിദഗ്ധനായ പാസ്ക്വോൽ മിനെർവി ഈ പ്രശ്നത്തിന് ഒരു പരിഹാരം കണ്ടെത്തിയിട്ടുണ്ട്. ഉപയോക്താവിന്റെ ബിൽറ്റ്-ഇൻ സമയ ഉപകരണങ്ങളിലേക്ക് ആക്സസ് ഉള്ള ഒരു ഡെസ്ക് ടോപ്പ് ആപ്പിനുള്ളിൽ പ്രവർത്തിക്കുന്നതിലൂടെ നിലവിലുള്ള സമയം കണ്ടെത്താൻ ചാറ്റ്ജിപിടിയോട് ആവശ്യപ്പെടാൻ സാധിക്കുമെന്ന് അദ്ദേഹം തെളിയിച്ചിട്ടുണ്ട്. Atlas ബ്രൗസറിനുള്ളിൽ ചാറ്റ്ജിപിടി ഉപയോഗിക്കുകയാണെങ്കിൽ AI ചാറ്റ്ബോട്ടിന് സമയം പറയാൻ കഴിയും
