ശബരിമല : മണ്ഡല - മകരവിളക്ക് കാലയളവിൽ ഇതുവരെ ശബരിമല ദർശനം നടത്തിയത് അരക്കോടിയിലേറെ തീർത്ഥാടകർ. ബുധനാഴ്ച ഉച്ചവരെ ലഭിച്ച കണക്ക് അനുസരിച്ച് 50,86667 പേർ ദർശനത്തിന് എത്തി. 40,95566 ഭക്തരാണ് മണ്ഡലകാലത്ത് എത്തിയത്. മകരവിളക്ക് ഉത്സവത്തിന് നടതുറന്ന 30 മുതൽ ബുധനാഴ്ച ഉച്ചവരെ 9,91101 തീർത്ഥാടകർ ദർശനം പൂർത്തിയാക്കി.
മകരവിളക്കിനായി നടതുറന്ന ശേഷമുള്ള എല്ലാദിനങ്ങളിലും ലക്ഷത്തിനടുത്ത് തീർത്ഥാടകർ എത്തുന്നുണ്ട്. മകരവിളക്കിന് 5 ദിനങ്ങൾ മാത്രം അവശേഷിക്കേ സമാനമായ തിരക്ക് ഉണ്ടാവും എന്ന് തന്നെയാണ് ദേവസ്വം ബോർഡും പോലീസും കണക്കുകൂട്ടുന്നത്. ഇതിൻ്റെ ഭാഗമായി മകരവിളക്ക് ഉത്സവ ദിവസവും അതിന് മുൻപുള്ള രണ്ട് ദിവസങ്ങളിലും ഹൈക്കോടതിയുടെ നിർദ്ദേശപ്രകാരം വെർച്ച്വൽ ക്യൂവിൻ്റെയും സ്പോട്ട് ബുക്കിങ്ങിൻ്റെയും എണ്ണത്തിൽ നിയന്ത്രണം വരുത്തിയിട്ടുണ്ട്.
മകരവിളക്ക് ദിനത്തിൽ അടക്കം സുഖ ദർശനത്തോടൊപ്പം തീർത്ഥാടകരുടെ സുരക്ഷ കൂടി മുൻനിർത്തി വിവിധ വകുപ്പുകളുടെ നേതൃത്വത്തിൽ മുന്നൊരുക്കങ്ങൾ ധൃതഗതിയിൽ പുരോഗമിക്കുകയാണെന്ന് ശബരിമല എഡിഎം അരുൺ എസ്. നായർ പറഞ്ഞു.
