പാലക്കാട്: മുഖത്തേക്ക് ടോര്‍ച്ചടിച്ചത് ചോദ്യം ചെയ്ത് യുവാക്കള്‍ തമ്മില്‍ ഏറ്റുമുട്ടി. കത്തികുത്തില്‍ മൂന്ന് പേര്‍ക്ക് പരുക്കേറ്റു. പാലപ്പുറത്താണ് യുവാക്കള്‍ തമ്മില്‍ ഏറ്റുമുട്ടലുണ്ടായത്. വെളിച്ചം മുഖത്തേക്ക് അടിച്ചതിനെ തുടര്‍ന്നുണ്ടായ തര്‍ക്കമാണ് സംഘര്‍ഷത്തില്‍ കലാശിച്ചത്. പാലപ്പുറം സ്വദേശികളായ വിഷ്ണു, സിനു രാജ്, വിനീത് എന്നിവര്‍ക്കാണ് കുത്തേറ്റത്.
സംഭവവുമായി ബന്ധപ്പെട്ട് 10 പേര്‍ പിടിയിലായിട്ടുണ്ട്. തിങ്കളാഴ്ച്ച രാത്രി പതിനൊന്നരക്കാണ് സംഭവം. പാടവരമ്പത്ത് ഇരിക്കുകയായിരുന്ന ഒരു സംഘത്തിന് നേരെ മറ്റൊരു സംഘം ടോര്‍ച്ചടിച്ചു. വെളിച്ചം മുഖത്ത് അടിച്ചതിനെ തുടര്‍ന്നുണ്ടായ നിസാര തര്‍ക്കമാണ് വലിയ സംഘര്‍ഷത്തിലേക്ക് എത്തിയത്. കുത്തേറ്റ മൂവരെയും ഒറ്റപ്പാലത്ത് സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.
പത്ത് പേരെ കസ്റ്റഡിയിലെടുത്ത് ചോദ്യം ചെയ്ത് വരികയാണ്. സംഭവത്തില്‍ കൂടുതല്‍ പേരെ കസ്റ്റഡിയിലെടുത്തേക്കുമെന്ന് പോലീസ് അറിയിച്ചു.